الماتىدا قازاقستان ۇلتتىق كىتاپحاناسىندا باس ءمۇفتي ناۋرىزباي قاجى تاعان ۇلىنىڭ جەتەكشىلىگىمەن شىققان «بابالار ىزىمەن: قازاق دالاسىنداعى مۇسىلماندىق مەكتەپ» كىتابىنىڭ تانىتىمى ءوتتى. ءىس-شاراعا عالىمدار، جازۋشىلار، تاريحشىلار مەن زيالى قاۋىم وكىلدەرى قاتىستى، دەپ حابارلايدى almaty-akshamy.kz
جاڭا كىتاپ تانىتىمىندا ءبىرىنشى ءسوز العان باس ءمۇفتي ناۋرىزباي قاجى تاعان ۇلى: «ءبىزدىڭ كوزدەگەن مۇراتىمىز – قازىرگە دەيىن ساقتالىپ كەلە جاتقان ادەت-عۇرىپ، سالت-سانانىڭ نەگىزى مۇسىلمانشىلىقتا جاتقاندىعىن دالەلدەۋ. سەبەبى سوڭعى كەزدەرى قازاقتى ءتۇرلى دەڭگەيدە يسلامنان الىستاتۋعا تىرىسۋشى پىكىرلەر پايدا بولدى. كەيبىرى تەرىس پيعىلمەن ادەيى ارەكەت ەتسە، ەندى ءبىرى بىلمەستىكپەن اتا-بابامىزدان كەلە جاتقان ءداستۇرلى دىنىمىزگە تەرىس پىكىر ايتۋدا. حالقىمىز قاستەر تۇتقان، جاۋگەرشىلىك زاماندا باتىرلاردى وتاندى قورعاۋعا ۇندەگەن، جيىن-تويلاردا جۇرتتى ىزگىلىككە شاقىرعان ءتول اسپابىمىز – دومبىرانى «حارام» دەپ جۇرگەن جاستاردى وسى كىتاپتى وقۋعا شاقىرامىن. سالەم سالۋدى اللاعا سەرىك قوسۋ دەپ سانايتىندارعا دا وسى كىتاپتا جاۋاپ جازىلعان. سالەم سالۋ – اللاعا سەرىك قوسۋ ەمەس، ۇلكەن قۇرمەتتىڭ بەلگىسى. سان عاسىردان بەرى جالعاسىپ كەلە جاتقان تاربيەلىك ءمانى زور ۇلتتىق قۇندىلىقتارىمىزدى جوققا شىعارۋ ۇلكەن قاتەلىك دەپ اتار ەدىم. مىنە، وسىنداي جاڭساق پىكىرلەرگە «بابالار ىزىمەن: قازاق دالاسىنداعى مۇسىلماندىق مەكتەپ» كىتابى تولىققاندى جاۋاپ بەرەدى دەگەن ويدامىز»، – دەدى.
ءىس-شارادا پرەزيدەنت جانىنداعى ۇلتتىق عىلىم اكادەمياسىنىڭ ۆيسە-پرەزيدەنتى اسقار جۇمادىلدايەۆ، جازۋشىلار وداعىنىڭ باسقارما ءتوراعاسىنىڭ ورىنباسارى قاسىمحان بەگمانوۆ، اكادەميك، الاشتانۋشى مامبەت قويگەلدى سىندى عالىمدار مەن زيالى قاۋىم وكىلدەرى جاستاردى جات ءدىني اعىمداردىڭ ىقپالىنان ساقتاۋدا جاڭا كىتاپتىڭ ءرولىن ايرىقشا اتاپ ءوتتى.