ەشبىر ادام كارى كورىنگىسى كەلمەيدى. بۇل قاي زاماندا دا وسىلاي.
ادام قانشا جەردەن جاس قالپىن ساقتاعىسى كەلگەنىمەن، تابيعات زاڭدىلىعى وعان باعىنبايدى. بۇل كونتەكستتە «قازىرگى» جاستار دەپ ءبولىپ ايتقان دۇرىس بولار. 50-60 جاس بىلاي تۇرسىن، وتىزدىڭ ءوزى جاستار ءۇشىن «ونشا» ۇناماي تۇر.
«زۋمەرلەر»، ياعني Z بۋىنىنىڭ (1995-2010 جج ارالىعىندا تۋعاندار) الدى ءقازىر 28-29-عا كەلسە، جاس دەگەندەرى 14-تە. وسى بۋىن وكىلدەرى وزدەرىنىڭ بەت الپەتىمەن تۋراسىن ايتقاندا، قاتتى "الىسىپ" قالعان. ءبارى بولماسا دا، مەكتەپتىڭ جوعارى سىنىبىنا وتكەننەن باستاپ، شامامەن 20-عا تاياعان جاستاردىڭ كوبى جاستىعىن ساقتاۋ ءۇشىن جاپپاي قارتايۋعا قارسى پروسەدۋرالاردى ەرتە باستاپ كەتكەن.
بۇنداي ءۇردىستىڭ بەلەڭ الۋىنا بارىنە ۇلگەرىپ جۇرەتىن تيكتوكەرلەر دە بارىنشا ۇلەستەرىن قوسىپ جاتىر. ولار «قارتايۋدى 14 جاستان باستاپ باياۋلاتۋ ءۇشىن نە ىستەۋگە بولادى؟» دەگەن سىڭايداعى تاقىرىپتاردا ءتۇرلى بەينە-روليكتەردى ءتۇسىرىپ تە تاستاعان. ءبىراق... قانشا جەردەن جاستارىمىز جاس كورىنەمىن دەپ تىرىسقانىمەن، كەرىسىنشە، تۇرلەرى ۇلكەن كورىنەدى. بۇنى دارىگەرلەردىڭ وزدەرى دە راستاپ وتىر. ماسەلەن، 20 جاستاعى قىزدار وزىنەن ون جاس ۇلكەن اپكەلەرىنە قاراعاندا الدەقايدا «كارى» كورىنەدى. زۋمەرلەر نەلىكتەن قارتايۋدان سونشالىقتى قورقاتىنىن تالداپ كورەيىك.
«زۋمەرلەردىڭ ميللەنيالداردان (شامامەن 1982-2004 جىلى ارالىعىندا تۋعاندار) ايىرماشىلىعى، كوسمەتولوگيانىڭ ارتىقشىلىقتارىن تىم ەرتە قولدانا باستۋىندا، ال فيللەرلەر مەن بوتوكستى جاس كەزىندە شامادان تىس (كوبىنەسە قاجەتسىز) قولدانۋ بەتتىڭ تابيعي قۇرىلىمىنا قالپىنا كەلمەيتىندەي اسەر ەتەدى. سوندىقتان ولار كوبىنەسە الدىڭعى بۋىن وكىلدەرىنەن ۇلكەن كورىنەدى»، - دەپ تۇسىندىرەدى اتاقتى ادامدارمەن جۇمىس ىستەيتىن كوسمەتولوگ راشا راحشاني-موگادام.
دارىگەردىڭ سوزىنشە، ميللەنيالدار ءوز دەنساۋلىقتارىنا بارىنشا مۇقيات قارايدى جانە سالاۋاتتى ءومىر سالتىن ۇستانادى. ولاردىڭ بۇل ارەكەتتەرى دە سىرت كەلبەتتەرىنىڭ جاقسى كورىنۋىنە وڭ اسەر ەتەدى. ال جاستار بولسا، ءاجىم، ارتىق سالماقپەن جانە باسقا دا كەمشىلىكتەرمەن تەز جانە وڭاي ادىستەرمەن – كوسمەتيكا جانە پلاستيكالىق وتا كومەگىمەن كۇرەسۋدى ءجون سانايدى.
#antiaging حەشتەگىمەن («قارتايۋعا قارسى») TikTok پلاتفورماسىندا شىققان جاريالانىمدار 7،9 ميلليارد قارالىم جيناسا، «بوتوكس» حەشتەگىندە 10،2 ميلليارد قارالىم بولعان.
زۋمەرلەردىڭ ۋاقىتىنان بۇرىن قارتايۋىنا ولاردىڭ ءومىر سالتى اسەر ەتەدى.
كوسمەتيكا مەن بەت-اۋزىن كوپ بوياۋ - جاستاردىڭ ەرتە قارتايۋىنىڭ جالعىز سەبەبى ەمەس. زۋمەرلەردىڭ سىرت كەلبەتىنىڭ كورىنىسىنە تەرىس اسەر ەتەتىن باسقا فاكتورلاردىڭ قاتارىندا ماماندار كۇيزەلىس، ناشار ەكولوگيا جانە جامان ادەتتەر دە بارىن ايتادى. كوبىنەسە «وزدەرىن جاقسى سەزىنەتىندەر قاتارىنانبىز» دەپ سانايتىن ميللەنيالدار باسقا ۇرپاققا قاراعاندا از ىشەدى جانە تەمەكىنى دە از شەگەدى.
تەمەكى شەگۋگە كەلەتىن بولساق، ءقازىر 25 جاسقا دەيىنگىلەردىڭ دەنى ۆەيپ پەن باسقا دا ەلەكتروندى تەمەكى تۇرلەرىن شەگۋگە اۋەس. ال مەديسينا ماماندارىنىڭ ايتۋىنشا، تەمەكى شەگەتىن ادامداردىڭ بەتى ءۇش ەسە تەز قارتايادى.
كوسمەتولوگ اميش پاتەلدىڭ ايتۋىنشا، 20 جاستاعىلار فاست-فۋد، گازدالعان سۋسىندار جانە مايلى تاعامدارعا ارتىقشىلىق بەرە وتىرىپ، ولاردىڭ تاماقتانۋىنا دا نەمقۇرايلى قارايدى.
«مۇنداي تاماقتانۋ ادەتتەرى، تەمەكى شەگۋ، SPF قورعانىسىن ەلەمەۋ جانە سپورتتى ۇناتپاۋ جاسىنان ەرتە قارتايۋعا اكەلەدى. مۇندا قىمبات كۇتىم كومەكتەسپەيدى»، - دەپ تۇسىندىرەدى ساراپشى.
دوكتور روسس پەرري سونىمەن قاتار جاستاردىڭ دەنەسىن جاساندى جولمەن سوليارييگە بارىپ كۇيدىرۋگە اۋەستىگى بارىن دا ەسكە سالدى. ەكى ادەت تە ونكولوگيانىڭ دامۋ ءقاۋپىن ارتتىرىپ قانا قويمايدى، سونىمەن قاتار، تەرىدەگى قارتايۋ داقتارى مەن مايدا اجىمدەردىڭ پايدا بولۋىنا اسەر ەتەدى.
سونىمەن، زۋمەرلەر نەلىكتەن قارتايۋدان قورقادى؟
«Z بۋىنى 30 جاستان كەيىن ومىرلەرىن ەلەستەتە المايدى. 20 جاستاعى جاستار قارتايىپ، تارتىمسىز بولاتىندارىنا كوندىككىسى كەلمەيدى. كەيبىرەۋلەر دۇرىس تاماقتانۋ، اقشا ۇنەمدەۋ نەمەسە مانساپ ءۇشىن باس قاتىرمايدى، ويتكەنى ولار 30-دان كەيىنگى ومىرلەرىن قارتتار ۇيىندە ۇزاق، ماعىناسىز، كوڭىلسىز كۇيدە جانە ءولىمدى كۇتۋمەن وتەدى دەپ سانايدى»، - دەدى Y بۋىنىنا جاتاتىن جاس بلوگەر ارىپتەستەرىنىڭ نە ويلايتىنىن ايتىپ.
نەلىكتەن مۇنداي پەسسيميزم جاستارعا (سونىڭ ىشىندە جاسوسپىرىمدەرگە) ءتان؟ اعا بۋىن تاعى دا الەۋمەتتىك جەلىلەردى كىنالايدى. مىڭجىلدىقتار توعىسىندا تۋعاندار مەن بۋمەرلەردىڭ پىكىرىنشە، اتاقتى ادامداردىڭ وڭدەلگەن فوتوسۋرەتتەرىن كورىپ العاننان كەيىن، جاستار دا سولارعا ەلىكتەپ، كوسمەتولوگتار مەن حيرۋرگتارعا جۇگىنە باستادى. سونىمەن قاتار، Z بۋىنى دۇنيە ەسىگىن اشا سالعاننان گادجەتتەرمەن بىرگە ءوسىپ كەلەدى، ال الەۋمەتتىك جەلىلەردەگى يدەالدى فوتوسۋرەتتەر ولاردىڭ وز-وزىنە دەگەن سەنىمسىزدىگىن كۇشەيتتى.
قورىتا كەلە، زاماننىڭ اعىمى، نەشە ءتۇرلى ترەندتتەردىڭ قاپتاۋى، سيفرلىق تەحنولوگيانىڭ دامۋى، الەۋمەتتىك جەلىنىڭ كەسىرى، ت.ب. كوپتەگەن فاكتورلاردىڭ اسەرىنەن جاستارىمىز «بوياۋشى، بوياۋشى دەگەنگە ساقالىن بوياپتى» دەگەننىڭ كەرى بولعانمەن، «يت ۇرەدى، كەرۋەن كوشەدى». ءبىزدىڭ كوزىمىزگە وعاش، سانامىزعا سىيمايتىنداي كورىنەتىندەي بۇل ادەتتەر دە وسى بۋىنمەن بىرگە «قارتايىپ»، ءبىر كۇنى تاريحقا اينالارى انىق.