«سالاماتتى قازاقستان» مەديسينالىق پويىزى ساپارىن ودان ءارى جالعاستىرۋدا.
بۇگىنگە دەيىن پويىز التى وبلىستىڭ، ياعني ماڭعىستاۋ، اتىراۋ، اقتوبە، باتىس قازاقستان، سولتۇستىك قازاقستان جانە اقمولا وبلىستارىنداعى 48 ستانسانى ارالادى، دەپ حابارلايدى aqshamnews.kz دەنساۋلىق ساقتاۋ مينيسترلىگىنە سىلتەمە جاساپ.
جوبا اياسىندا 10 مىڭ بالانى قوسا العاندا بارلىعى 32 مىڭ ادام پويىزداعى مەديسينا ماماندارىنا قارالدى، سونىمەن قاتار ولارعا 91 مىڭنان استام مەديسينالىق قىزمەت كورسەتىلدى. سونىڭ ىشىندە ستوماتولوگيالىق قىزمەتتەر، زەرتحانالىق زەرتتەۋلەر، كىشىگىرىم حيرۋرگيالىق وتالار، ۋلترادىبىستىق جانە رەنتگەنولوگيالىق زەرتتەۋلەر بار.
اۋرۋلاردىڭ ەرتە دياگنوستيكاسى مەن دەر كەزىندە ەمدەلۋىنە ەرەكشە نازار اۋدارىلادى. قازىرگى ساتتە جۇرەك-قان تامىرلارى اۋرۋلارى، قانت ديابەتى جانە بالالاردىڭ اۋرۋلارىن قوسقاندا ءتۇرلى دەرتكە شالدىققان 1933 ناۋقاس انىقتالدى. 255 بالانى قوسا العاندا بارلىق ناۋقاستار تۇرعىلىقتى جەرى بويىنشا ەمحانالاردىڭ تۇراقتى باقىلاۋىنا الىندى.
جوبا تەك دياگنوستيكالاۋ ءۇشىن عانا ەمەس، سونىمەن بىرگە كۇردەلى جانە توتەنشە جاعدايدا شۇعىل مەديسينالىق كومەك كورسەتۋدە دە ماڭىزدى بولىپ شىقتى. ماسەلەن، جاقسى ستانساسىندا كارديولوگقا قارالعان ناۋقاستىڭ اۋرۋىن دەر كەزىندە انىقتاۋ ارقىلى ول ءبىر اجالدان امان قالدى. ونىڭ بويىندا ميوكاردا ينفاركتى اۋرۋىنىڭ بەلگىلەرى انىقتالىپ، دەرەۋ اۋرۋحاناعا جاتقىزىلدى. مەديسينالىق پويىز جابدىقتارىنىڭ ارقاسىندا ءقاۋىپتى اۋرۋلاردى جەدەل انىقتاپ، شۇعىل كومەك كورسەتۋ مۇمكىن بولدى.
مەديسينالىق پويىزدىڭ جۇمىسى ءالى دە جالعاسۋدا، ەندى جىلدىڭ سوڭىنا دەيىن قازاقستاننىڭ 11 وبلىسىنداعى تاعى 44 ستانسانى قامتۋ كوزدەلۋدە. جوبا كومانداسىندا پەدياتر، كارديولوگ، رەنتگەنولوگ، حيرۋرگ جانە باسقالارىن قوسا العاندا 14 تار بەيىندى سالالىق مامان بار. ولاردىڭ ءبارى دە ەلىمىزدىڭ ەڭ شالعاي جەرلەرىندەگى تۇرعىنداردىڭ قاجەتتى مەديسينالىق كومەكتى دەر كەزىندە جانە جوعارى دەڭگەيدە الۋىنا نيەتتى.
ەسكە سالا كەتسەك، «سالاماتتى قازاقستان» مەديسينالىق پويىزى» الەۋمەتتىك جوباسى ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا، ق ر دەنساۋلىق ساقتاۋ مينيسترلىگى جانە «سامۇرىق-قازىنا» اق كومپانيالار توبى اتىنان «Samruk-Kazyna Trust» الەۋمەتتىك جوبالاردى دامىتۋ قورى اراسىنداعى ىنتىماقتاستىق اياسىندا جۇزەگە اسىرىلۋدا. جوبانىڭ باستى ماقساتى – شالعاي ستانسالارداعى تۇرعىندارعا بىلىكتى مامانداردىڭ مەديسينالىق كومەگىن بەرۋ جانە دەنساۋلىق ساقتاۋ سالاسىنا قارالۋعا مۇمكىندىگى شەكتەۋلى وڭىرلەردىڭ مەديسينالىق قىزمەتكە قولجەتىمدىلىگىن ارتتىرۋ.