سۋ رەسۋرستارى جانە يرريگاسيا مينيسترلىگى وزىق حالىقارالىق تاجىريبەلەردىڭ نەگىزىندە سۋ تاسقىنىن تالداۋ، بولجاۋ جانە مودەلدەۋدىڭ سيفرلىق شەشىمدەرىن بەيىمدەۋ بويىنشا جۇمىس اتقارۋدا.
مينيسترلىك دامىعان مەملەكەتتەردىڭ تاجىريبەسىن زەرتتەۋ ارقىلى TALSIM (گەرمانيا) جانە Delft-FEWS (نيدەرلاندى) جۇيەلەرىن تاڭداپ الدى. سۋ تاسقىنىن بولجاۋدىڭ تيىمدىلىگى مەن دالدىگىن ارتتىرۋ ءۇشىن اتالعان ادىستەردى ءبىرىڭعاي جۇيەگە بىرىكتىرۋ جوسپارلانىپ وتىر، دەپ حابارلايدى aqshamnews.kz
اتالعان جۇيە گيدرولوگيالىق جانە بۇلت، ىلعالدىلىق، جاۋىن-شاشىن سەكىلدى اۋا-رايى دەرەكتەرىنىڭ نەگىزىندە ساراپتاما جاسايدى. قازىرگى ۋاقىتتا جۇيەگە ەسىل وزەنى باسسەينىنىڭ دەرەكتەرى ەنگىزىلىپ جاتىر.
ايتا كەتۋ كەرەك، الداعى ۋاقىتتا ەلىمىزگە نيدەرلاندىدان جۇيەنى ازىرلەۋشى ماماندار كەلەدى. ولار قازاقستاندىق ماماندارمەن بىرگە ءوڭىردىڭ ەرەكشەلىگى مەن سۇرانىسىن ەسكەرە وتىرىپ، جۇيەنى جەرگىلىكتى جاعدايعا بەيىمدەۋ مۇمكىندىكتەرىن پىسىقتايتىن بولادى.
«جۇيەنى ازىرلەۋ بارىسىندا ءبىز سۋ تاسقىنىن بولجاۋ جانە الدىن الۋ باعىتىندا تاجىريبەسى مول مەملەكەتتەردى زەرتتەدىك. وسىلايشا، گەرمانيالىق TALSIM جانە نيدەرلاندىلىق Delft-FEWS جۇيەلەرىن پايدالانىپ، سۋ تاسقىنىن بولجاۋ جانە مودەلدەۋدىڭ سيفرلىق بالاما قۇرالى رەتىندە پيلوتتىق رەجيمدە ەنگىزۋ جونىندە شەشىم قابىلدادىق. وسى شەشىمدەردى پايدالانۋ سۋ تاسقىنىن بولجاۋ جانە الدىن الۋ مۇمكىندىگىن ارتتىرۋداعى ماڭىزدى قادام بولىپ تابىلادى»،- دەدى سۋ رەسۋرستارى جانە يرريگاسيا ۆيسە-مينيسترى اسلان ابدرايموۆ.