2024 جىلى ساكەن سەيفۋلليننىڭ تۋعانىنا 130 جىل تولادى. وسىعان وراي فيلم ءتۇسىرۋ جوسپارلانعان. بۇل جايىندا مادەنيەت جانە سپورت ءمينيسترى اسحات ورالوۆ Telegram-پاراقشاسىندا جازدى، دەپ حابارلايدى Almaty-akshamy.kz.
ءمينيستردىڭ جازۋىنشا، ول ارنايى اشىلعان ورتالىقتا ازاماتتاردى قابىلداعان.
«كەلەسى جىلى ساكەن سەيفۋلليننىڭ 130 جىلدىعىن مەرەكەلەۋ تاقىرىبى تالقىلاندى. اكتەر جانە جازۋشى قانات ءجۇنىسوۆ كورنەكتى جازۋشى جانە قوعام قايراتكەرىنە ارنالعان ءفيلمنىڭ سەنارييى مەن وپەراسىن ۇسىندى. ۇسىنىس قىزىق. اسىرەسە، وپەرالىق قويىلىم. ءبىز وتاندىق اۆتورلاردان سپەكتاكلدەر سانىن كوبەيتۋگە باعىت الدىق، سوندىقتان بۇل ماسەلە مۇقيات زەرتتەلەدى. 2030 جىلعا قاراي قازاقستاندىق اۆتورلاردىڭ قويىلىمدارىنىڭ سانىن 600-گە دەيىن ارتتىرۋدى جوسپارلاپ وتىرمىز»، - دەدى اسحات ورالوۆ.
ۆەدومستۆو باسشىسىنىڭ اتاپ وتۋىنشە، قابىلداۋ كەزىندە فيلم ءتۇسىرۋ جانە ەرەكشە قاجەتتىلىكتەرى بار ارتىستەرگە ارنالعان كونسەرتتىك الاڭداردى ۇسىنۋ ءۇشىن قولدانىلاتىن رەترو تەحنيكانى ساقتاۋ ماسەلەلەرى كوتەرىلگەن.
«مەن جاۋاپتى كوميتەتكە وسى ۇسىنىستاردى ەگجەي-تەگجەيلى قاراستىرۋدى تاپسىردىم. سونداي-اق قابىلداۋدا ءانشى التىنشاش مۇقاتايەۆا بولدى. ول ءبىزدىڭ مينيسترلىكتىڭ قولداۋىمەن شىعارماشىلىق جولىن جالعاستىرۋعا نيەت ءبىلدىردى. ءبىز ءارقاشان ەرەكشە قاجەتتىلىكتەرى بار ارتىستەردىڭ جانە ينكليۋزيۆتى شىعارماشىلىق ۇجىمداردىڭ ونەرىن قولدايمىز. مۇنداي كەزدەسۋلەر مۇنىمەن توقتامايدى. بۇدان بولەك وڭىرلەردى ارالاپ، تۇرعىندارمەن ەسەپتىك كەزدەسۋلەر وتكىزۋدى جالعاستىرامىن»، - دەدى مينيستر.