قازاقستان رەسپۋبليكاسى قورعانىس مينيسترلىگى بىتىمگەرلىك وپەراسيالار ورتالىعىندا «بۇۇ بىتىمگەرلىك وپەراسيالارىنداعى گەندەرلىك اسپەكتىلەر» اتتى پيلوتتىق كۋرسى ۇيىمداستىرىلدى.
اتالعان كۋرستىڭ باعدارلاماسىن قورعانىس مينيسترلىگىنىڭ بىتىمگەرلىك وپەراسيالار ورتالىعىنىڭ نۇسقاۋشىلارى ازىرلەدى، دەپ حابارلايدى Almaty-akshamy.kz.
كۋرس تىڭداۋشىلارىنا ارنالعان دارىستەردى 2-سىنىپتىڭ توتەنشە جانە وكىلەتتى وكىلى – قازاقستانداعى «بۇۇ-ايەلدەر» قۇرىلىمىنىڭ باس كەڭەسشىسى مادينا جاربوسىنوۆا، زاڭ عىلىمدارىنىڭ PhD دوكتورى حاليدا ءاجىعۇلوۆا، «قازاقستاننىڭ قوعامدىق قۇقىقتار جانە تەڭ مۇمكىندىكتەر ينستيتۋتى» قوعامدىق قورىنىڭ پرەزيدەنتى، ARASHA تۇرمىستىق زورلىق-زومبىلىق قۇرباندارىنا ارنالعان باسپانا ديرەكتورى مارگاريتا وسكەمبايەۆا وقيدى.
– قارۋلى قاقتىعىستار ورىن الاتىن تۇراقسىز ايماقتاردا ەڭ وسال ساناتتاعىلار – ايەلدەر مەن بالالار. سوندىقتان ايەلدەردىڭ بۇۇ بىتىمگەرلىك ميسسيالارىنا قاتىسۋى وتە ماڭىزدى. ولار ماسەلەلەردى بەيبىت جولمەن رەتتەۋگە، وسى ساناتتاعى ازاماتتاردىڭ قۇقىقتارىن قورعاۋعا ىقپال ەتەدى. بۇل تۇرعىدا ۇلتتىق كونتينگەنتتى گەندەرلىك اسپەكتىنى ەسكەرە وتىرىپ دايىنداۋ ەرەكشە ماڭىزدى، – دەپ اتاپ ءوتتى بىتىمگەرلىك وپەراسيالار ورتالىعى باستىعىنىڭ وقۋ جۇمىسى جونىندەگى ورىنباسارى پولكوۆنيك رۋسلان ماەرمانوۆ.
كۋرستاردى قارۋلى كۇشتەردىڭ، ۇقك شەكارا قىزمەتىنىڭ، توتەنشە جاعدايلار مينيسترلىگىنىڭ، ىشكى ىستەر مينيسترلىگىنىڭ، ۇلتتىق ۇلان جانە باس پروكۋراتۋرانىڭ ايەلدەرىنە وتكىزەدى. تىڭداۋشىلار بىتىمگەرلىك وپەراسيالارعا قولدانىلاتىن حالىقارالىق قۇقىقتىڭ نەگىزدەرىمەن، حالىقتى قورعاۋدىڭ قۇقىقتىق نەگىزدەرىمەن جانە تۇجىرىمداماسىمەن تانىسادى. ودان بولەك جىنىستىق قاناۋ جانە قارۋلى قاقتىعىسقا بايلانىستى زورلىق-زومبىلىق تاقىرىپتارى دا قاراستىرىلادى.
ساباقتار بۇۇ قاۋىپسىزدىك كەڭەسىنىڭ «ايەلدەر، بەيبىتشىلىك جانە قاۋىپسىزدىك» 1325 (2000) قارارىن ىسكە اسىرۋ ماسەلەلەرىندە تىڭداۋشىلاردىڭ حاباردارلىعىن ارتتىرادى. جالپى بۇل پيلوتتىق جوبا قازاقستانداعى ايەلدەردىڭ جاعدايىن جاقسارتۋ جانە ق ر قارۋلى كۇشتەرىنىڭ بۇۇ بىتىمگەرلىك ميسسيالارىنا قاتىسۋىن كەڭەيتۋ جونىندەگى ۇلتتىق ءىس-قيمىل جوسپارىنىڭ ماقساتتارىنا قول جەتكىزۋگە باعىتتالعان.