الماتى پوليسياسى سايران كولىنىڭ ماڭىندا جوعالىپ كەتكەن 4 جاسار بالانى تاپتى
“102” پۋلتىنە 4 جاسار ءامىردىڭ جوعالعانى تۋرالى حابار ءبىر كۇن بۇرىن ساعات 19:15-تە كەلىپ تۇسكەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
ءسابيدىڭ اكەسىنىڭ ايتۋىنشا، ول بۋتيكتە كوڭىلى اۋىپ، ءامىردى كوزدەن تاسا قىلىپ العان. تاۋەلسىز ىزدەستىرۋلەر ناتيجە بەرمەگەن سوڭ، ول پوليسياعا قوڭىراۋ شالعان. بالانى ىزدەستىرۋ ءۇشىن پد-نىڭ الدىڭعى ساپتاعى جانە جەدەل بولىمشەلەرىنىڭ ماكسيمالدى كۇشتەرى: پاترۋلدىك پوليسيا، ۋچاسكەلىك ينسپەكتورلار، كريمينالدىق جانە يۋۆەنالدى پوليسيا قىزمەتكەرلەرى جۇمىلدىرىلدى. كولگە جاقىن ورنالاسقان تۇرعىن اۋدان، بالا جىلىنۋعا بولاتىن تاماقتاندىرۋ ورىندارى، قاراۋسىز قالعان اۋماقتار جانە ت.ب.تەكسەرىلدى. ساعات 21:25 شاماسىندا پوليسيا راديوەفيرى ارقىلى “بۋران-052” پاترۋلدىك ەكيپاجىنىڭ ينسپەكتورلارى ەرجان امانبول مەن ەرسىن سمايل “بالا تابىلدى، ول ءتىرى!” دەگەن قۋانىشتى حاباردى جەتكىزدى.
«تۇرعىن ۇيلەردىڭ اۋلالارى مەن ويىن الاڭدارى نازاردان تىس قالمادى. “كاۋسار” تۇرعىن ءۇي كەشەنىنە كىردىك. اۋلانىڭ ورتاسىندا ءبىر بالا تۇردى. ول ابدىراپ قالعان، شاماسى، تۋىستارىن نەمەسە ءۇيىن ىزدەپ كوردى، ءبىراق ول جىلامادى، ءوزىن جاقسى ۇستادى. سول كۇنى كەشكە وتە سۋىق بولدى. ەڭ الدىمەن ءبىز ونى جىلىتىپ، جاقىن ماڭداعى دۇكەننەن تىسكەباسار ساتىپ الىپ، اكەسىنە اپاردىق. كوپشىل بالا. سوندىقتان دا بولار، اكەسى باسقا جاققا الاڭداپ كەتكەندە، سەرۋەندەۋگە بەل بۋعان. ەڭ باستىسى – ءامىر امان-ەسەن تابىلدى جانە ءقازىر وتباسىمەن بىرگە»، – دەيدى ەرجان امانجول.