تۇركىستاندا بەيبىت كۇننىڭ باتىرلارى «تۇركىستان وبلىسىنا سىڭىرگەن ەڭبەگى ءۇشىن» توسبەلگىسىمەن ماراپاتتالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
توسبەلگى تاققانداردىڭ ىشىندە باتىرلىقتىڭ ناعىز ۇلگىسىن كورسەتكەن ازاماتتار بار. سولاردىڭ ءبىرى - كۇنى كەشە عانا ەرلىگىنىڭ ارقاسىندا ەلگە تانىلعان قانسەيىت مۇحاممەد. سايرام اۋداندىق حالىقتى جۇمىسپەن قامتۋ ورتالىعىنىڭ قىزمەتكەرى اقسۋكەنت اۋىلىندا ورنالاسقان ءارى ءوزى جۇمىس ىستەيتىن عيماراتتا بولعان ءورت كەزىندە شاتىر ۇستىندەگى مەملەكەتتىك تۋدى وتتان الىپ شىقتى.
ال جەتىساي اۋداندىق پوليسيا ءبولىمى ميگراسيا بولىمشەسىنىڭ باسشىسى ايان حايرۋللايەۆ وزىنە تونگەن قاۋىپكە قاراماي، بەيتانىس كەيۋانانى ءورتتىڭ ورتاسىنان قۇتقارىپ قالدى. كەنتاۋ قالاسى، №12 ءورت ءسوندىرۋ ءبولىمىنىڭ بولىمشە كومانديرى، ازاماتتىق قورعاۋ اعا سەرجانتى نۇرعالي كەرىمبەكوۆ سۋ قۇبىرىنا قۇلاپ كەتكەن 2 جاستاعى بالانى الىپ شىقتى. قازىعۇرت اۋدانىنىڭ تۇرعىنى مەيىربەك رىسبەك اجەتحاناعا ءتۇسىپ كەتكەن 1 جاستاعى بالانى قۇتقارىپ، ەلدىڭ ىقىلاسىنا بولەندى. ەرلىك جاساۋ اركىمنىڭ قولىنان كەلە بەرمەيتىندىگىن ايتقان تۇركىستان وبلىسىنىڭ اكىمى ءومىرزاق شوكەيەۆ بەيبىت كۇننىڭ باتىرلارىنا قۇرمەت كورسەتتى. باتىل ازاماتتار ءوڭىر باسشىسىنىڭ ءىلتيپاتىنا ريزاشىلىق ءبىلدىرىپ، قوعامنىڭ دامۋىنا قىزمەت ەتۋگە دايىن ەكەندەرىن جەتكىزدى.