اتىراۋ وبلىسىنىڭ مەديسينا سالاسىندا 201 دارىگەر جەتىسپەيدى. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋالييەۆ ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
وبلىستىق قوعامدىق كەڭەستىڭ كەڭەيتىلگەن وتىرىسىندا مەديسينا سالاسىن كادرمەن قامتۋ ماسەلەسى قارالدى. وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋالييەۆتىڭ ايتۋىنشا، وڭىردە مەديسينا سالاسىنداعى كادر جەتىسپەۋشىلىگىن جويۋ ماقساتىندا ءبىرقاتار جۇمىس قولعا الىنعان.
«اتىراۋ وبلىسىنىڭ مەديسينا سالاسىندا 201 دارىگەر جەتىسپەيدى. اۋرۋحانالار مەن ەمحانالاردا، وزگە ەمدەۋ ورىندارىندا رەانيماتولوگ، اكۋشەر-گينەكولوگ، ينفەكسيونيست، جالپى تاجىريبە دارىگەرى، پەدياتر سەكىلدى جوعارى ءبىلىمدى كادرلاردىڭ ورنى بوس تۇر. اۋىلدىق جەرلەردەگى مەديسينا مەكەمەلەرىنە 40 دارىگەر قاجەت»، -دەپ ءمالىم ەتتى باسقارما باسشىسى اسحان بايدۋالييەۆ.
ونىڭ ايتۋىنشا، ءقازىر اتىراۋ وبلىسىندا 6 747 مەديسينا قىزمەتكەرى جۇمىس ىستەيدى. ونىڭ ىشىندە 1 515 دارىگەر، 5 232 ورتا بۋىن مەديسينا قىزمەتكەرى تۇرعىندارعا مەديسينالىق كومەك كورسەتىپ ءجۇر.
«جوعارى مەديسينالىق وقۋ ورنىن بىتىرگەن اتىراۋ وبلىسىنىڭ تۇلەكتەرىن بىلىكتى دارىگەر رەتىندە ءبىلىمىن ودان ءارى رەزيدەنتۋرادا جالعاستىرۋىنا جاعداي جاساۋ ماقساتىندا جىل سايىن 70-تەن استام گرانت ءبولىپ وتىر. ماسەلەن، 2021 جىلعى جەلتوقساندا اتىراۋ وبلىسىندا اقتوبە قالاسىنداعى م.وسپانوۆ اتىنداعى باتىس قازاقستان مەديسينالىق ۋنيۆەرسيتەتىنىڭ فيليالى اشىلدى. ءقازىر باسقا وڭىرلەردەن كەلگەن 35 رەزيدەنت وبلىستاعى مەديسينالىق مەكەمەلەردە جۇمىس ىستەپ ءجۇر. قابىلدانعان وسىنداي شارالاردىڭ ناتيجەسىندە كادر تاپشىلىعى بىلتىر 2020 جىلمەن سالىستىرعاندا 11%-عا تومەندەدى»، -دەدى اسحان بايدۋالييەۆ.