قازاق ۇلتتىق قىزدار پەداگوگيكالىق ۋنيۆەرسيتەتىندە Haileybury Almaty مەكتەبىنىڭ ديرەكتورى سايمون ميللسپەن كەزدەسۋ ءوتتى. كەزدەسۋگە باسقارما ءتوراعاسى – رەكتورى گۇلميرا قاناي، ستۋدەنتتەر، ماگيسترانتتار جانە دوكتورانتتار قاتىستى، دەپ حابارلايدى aqshamnews.kz
سايمون ميللس – ءبىلىم بەرۋ سالاسىنداعى جوعارى بىلىكتى مامان. شوتلانديادا دۇنيەگە كەلىپ، سول جەردە ءبىلىم العان. كەيىن كەمبريدج ۋنيۆەرسيتەتىنىڭ پەمبرۋك كوللەدجىندە گەوگرافيا ماماندىعى بويىنشا ءبىلىم العان. 2020 جىلدىڭ تامىز ايىندا Haileybury Almaty مەكتەبىنىڭ ديرەكتورى قىزمەتىنە تاعايىندالدى.
كەزدەسۋ بارىسىندا سايمون ميللس Haileybury Almaty مەكتەبى تۋرالى، ونىڭ تاريحى، ءبىلىم الۋ مۇمكىندىكتەرى جانە مەكتەپتىڭ قىزمەتى تۋرالى قۇندى اقپاراتپەن ءبولىستى.
«بۇگىن كەرەمەت كەزدەسۋ ءوتتى. بۇل ءبىلىم ورداسى – كوپتەگەن بىلىكتى مۇعالىمدەردى تاربيەلەپ، بۇگىندە 12 000 ستۋدەنتكە ساپالى ءبىلىم بەرىپ وتىرعان ىرگەلى وقۋ ورنى. بۇل مەنى ءسوزسىز شابىتتاندىردى. قازاق ۇلتتىق قىزدار پەداگوگيكالىق ۋنيۆەرسيتەتىن قازاقستانداعى ەڭ بەدەلدى جوعارى وقۋ ورىندارىنىڭ ءبىرى دەپ سانايمىن. ءتىپتى الەمنىڭ كوپتەگەن ەلدەرىندە مۇنداي جوعارى كورسەتكىش سيرەك كەزدەسەدى. مەن ستۋدەنتتەردىڭ جاساندى ينتەللەكت سياقتى جاڭا تەحنولوگيالاردى جەتىك مەڭگەرەتىنىنە سەنىمدىمىن. سونىمەن قاتار ولاردىڭ ءداستۇرلى ءبىلىم بەرۋ ادىستەرىن دە تەرەڭ يگەرۋى ماڭىزدى. وتكەننىڭ دە، بولاشاقتىڭ دا ەڭ جاقسىسىن بويعا ءسىڭىرۋ – ەڭ دۇرىس تاڭداۋ»، – دەدى Haileybury Almaty مەكتەبىنىڭ ديرەكتورى.
سايمون ميللس بۇعان دەيىن ول شوتلاندياداعى ەڭ ءىرى تاۋەلسىز ارالاس كۇندىزگى مەكتەپتەردىڭ ءبىرى – Robert Gordon’s College ديرەكتورى بولىپ جۇمىس ىستەگەن. ءبىلىم بەرۋ سالاسىندا سايمون ميللس جاستاردىڭ الەۋەتىن اشۋعا، سيفرلىق ءبىلىم بەرۋدى دامىتۋعا، وقۋشىلاردىڭ كوشباسشىلىق قابىلەتتەرىن قالىپتاستىرۋعا جانە تۇراقتى دامۋ داعدىلارىن ۇيرەتۋگە ەرەكشە نازار اۋدارادى. ۇلىبريتانيادا جانە شەتەلدەردە مەكتەپ ينسپەكتورى رەتىندە قىزمەت اتقارىپ، بىرنەشە ۇلتتىق ءبىلىم بەرۋ كوميتەتتەرىنىڭ مۇشەسى بولدى جانە FOBISIA-مەن بىرلەسىپ جۇمىس ىستەدى.
ەركىن فورماتتا وتكەن كەزدەسۋدە جاستار وزدەرىن تولعاندىرعان ماسەلەلەردى قوزعادى. قاتىسۋشىلار Haileybury Almaty مەكتەبىنىڭ ديرەكتورى سايمون ميللسقا كوكەيكەستى سۇراقتارىن قويىپ، ناقتى جاۋاپتار الدى.
«ميستەر سايمونسپەن وتكەن كەزدەسۋ تاعىلىمعا تولى بولدى. نaileybury Almaty مەكتەبى تۋرالى تىڭ دەرەكتەر مەنى ەرەكشە قىزىقتىردى. بولاشاقتا باۋىرلارىمنىڭ وسى ءبىلىم ورداسىندا وقۋىن قالايمىن»، –دەدى «شەتەل ءتىلى: ەكى شەتەل ءتىلى» ماماندىعىنىڭ 4 كۋرس ستۋدەنتى جانسايا اليبەكوۆا.
اشىق ديالوگ فورماتىندا وتكەن كەزدەسۋ ستۋدەنتتەردىڭ كوكەيىندە جۇرگەن سۇراقتارعا جاۋاپ الۋعا مۇمكىندىك بەرىپ، ولاردىڭ كاسىبي دامۋ جولىندا جاڭا باعىتتارعا وي سالدى. مۇنداي شارالار جاستاردىڭ ءبىلىم كوكجيەگىن كەڭەيتىپ، بولاشاققا دەگەن سەنىمىن نىعايتا تۇسەتىنى ءسوزسىز.
