ەلدە 8 وبلىس كوكتەمگى سۋ تاسقىنى ءقاۋپى جوعارى ايماقتا تۇر. «قازگيدرومەت» ماماندارىنىڭ بولجامى وسىنداي، دەپ حابارلايدى aqshamnews.kz 24kz-كە سىلتەمە جاساپ.
تاسقىن كەزەڭىنە دايىندىقتىڭ جاي-جاپسارى بۇگىن سەناتتا وتكەن ۇكىمەت ساعاتىندا پىسىقتالدى. ءمينيستردىڭ ايتۋىنشا، ماماندار مەن مۇددەلى مەملەكەتتىك ورگاندار كۇن سايىن قار دەڭگەيىن، وزەندەردىڭ جاي-كۇيى مەن اۋا رايى تۋرالى دەرەكتەردى تالداۋدا. بۇل ءقاۋىپتى ۋچاسكەلەردى ەرتە انىقتاپ، حالىقتى ۋاقتىلى حاباردار ەتۋگە مۇمكىندىك بەرەدى.
سەرگەيەۆ سۋ قويماسى ءقازىردىڭ وزىندە تولىپ تۇر. ارتىق سۋ بوگەتتىڭ ۇستىمەن ەسىلگە توقتاۋسىز قۇيىلۋدا.
ماماندار: «بوگەننىڭ بوساماۋىنا كوكتەمگى تاسقىن، جاز بويى جاۋعان جاڭبىر مەن جەراستى سۋلارىنىڭ كوتەرىلۋى سەبەپ»، - دەيدى. سۋ قويماسى 1969 جىلى سالىنعان. سەناتورلار جاۋاپتى ورگان وكىلدەرىنەن وسى نىسانعا قاتىستى جاعدايدى سۇرادى.
اسەم راحمەتوۆا، ق ر پارلامەنتى سەناتىنىڭ دەپۋتاتى: - ادەتتە قىس ايلارىندا ول جەردە ەرنەۋىنەن سۋ اسپايتىن. ال بيىل 5 قاڭتاردان باستاپ سۋ ارناسىنان اسىپ تۇر. الداعى ۋاقىتتا بۇل جۇمىستى جالعاستىرا بەرەتىن بولساڭىزدار سەرگەيەۆ سۋ قويماسىنداعى جاعداي قالاي بولادى؟
بولات بەكنياز، ق ر سۋ رەسۋرستارى جانە يرريگاسيا ءبىرىنشى ۆيسە-مينيسترى: - سەرگەيەۆ پلوتيناسىنىڭ وتە ۇلكەن مولشەردە سۋدى وتكىزەتىن مۇمكىنشىلىگى بار. بىلتىرعى تاسقىندا وزدەرىڭىز كوردىڭىزدەر، 1 مەتردەن استام سۋ پلوتينانىڭ ۇستىنەن جۇرسە دە، سۋ قويما سوعان شىداپ، وتكىزدى. قازىرگى تاڭدا ول سۋ قويمانىڭ رەكونسترۋكسياسىن جاساپ جاتىرمىز. ءبىزدىڭ بولجام بويىنشا سەرگەيەۆ سۋ قويماسىندا ەشقانداي ءقاۋىپ جوق قازىرگى تاڭدا.
جۋىردا رەسەي، وزبەكستان، قىرعىزستان اۋماعىندا جينالعان قاردىڭ قالىڭدىعى جايىندا مالىمەتتەر الىنادى. سينوپتيكتەر بىلتىردان بەرى تاسقىن ءقاۋپىن بولجاۋ ادىستەمەلەرىن جاقسارتقان. قىسقا جانە ۇزاق مەرزىمدەرگە تالداۋ جاسالۋدا. بيىل گيدرولوگيالىق مونيتورينگپەن قامتىلعان ايماقتاردىڭ ينتەراكتيۆتى كارتاسى جاڭارتىلدى. بۇل تۇسكەن مالىمەتتەردى دەرەۋ وڭدەۋگە مۇمكىندىك بەرەدى.
دانارا الىمبايەۆا، «قازگيدرومەت» رمك باس ديرەكتورى: - كوكتەمگى سۋ تاسقىنى كەزەڭىنە ارنالعان الدىن الا بولجامدى كەشە عانا بارلىق مەملەكەتتىك ورگاندارعا جولدادىق. ولار ءتيىستى شەشىم قابىلدايدى. تاسقىن ءقاۋپى جوعارى ايماقتارعا اباي، شىعىس قازاقستان، قاراعاندى، ۇلىتاۋ، سولتۇستىك قازاقستان، قوستاناي، اقمولا جانە باتىس قازاقستان وبلىستارى جاتادى.
سونىمەن قاتار ورتا دەڭگەيدەگى ءقاۋىپتى ايماقتارعا جەتىسۋ، جامبىل، تۇركىستان، اتىراۋ وبلىستارى كىرەدى.
شىڭعىس ءارىنوۆ، ق ر توتەنشە جاعدايلار ءمينيسترى: - الداعى سۋ تاسقىنى كەزەڭىنە جەدەل دايىندىق ماقساتىندا ازاماتتىق قورعاۋ قىزمەتتەرىنەن جانە جەكە قۇرامنىڭ جالپى سانى 37 مىڭنان استام ادام، 13 مىڭنان استام تەحنيكا، 4096 سۋ ايداۋ جانە 640 ءجۇزۋ قۇرالى بار كۇشتەر توپتاماسى قۇرىلدى. مينيسترلىكتىڭ اۋماقتىق بولىمشەلەرىنەن قوسىمشا رەزەرۆتىك توپتارى دايىندالدى. جالپى مينيسترلىكتىڭ قۇتقارۋشىلارى كەز كەلگەن توتەنشە جاعدايلار مەن وقيعالارعا دەن قويۋعا دايىن.
ىرگەگە جەتكەن اپاتپەن ەرلىكپەن كۇرەسكەننەن گورى ونى بولدىرماعان ءتيىمدى. سەناتور جاقىپ اسانوۆ ەگەر جىل سايىن تاسقىننىڭ سەبەبىمەن ەمەس، تەك سالدارىمەن كۇرەسە بەرسەك، قازىنا قارجىسى ورتاياتىنىن ەسكە سالدى.
جاقىپ اسانوۆ، ق ر پارلامەنتى سەناتى ءتوراعاسىنىڭ ورىنباسارى: - ءار كوكتەمدى ۋايىممەن كۇتۋ ءبىزدىڭ ادەتىمىزگە اينالدى. بىلتىر ەستەن كەتپەيتىن اپاتتى باستان كەشتىك. بۇگىننىڭ وزىندە كوكتەم كەلمەي جاتىپ رەسەيدىڭ كەي وڭىرىندە سۋ تاسقىنى باستالۋدا. «ءبىر عاسىردان بەرى بولماعان جاعداي»، - دەپ جاتىر سينوپتيكتەر. شەكارالاس ورىنبور، ورسك، ومسكىدە سۋ ارناسىنان شىعىپ، ماڭايىن باسۋدا. دەمەك، ول توپان سۋ كوپ ۇزاماي بىزگە دە كەلەدى.
بيىل دا ارقانى كەڭگە سالۋعا بولمايدى. الدا ءبىرقاتار ماڭىزدى مىندەت تۇر. سۋ قويمالارىن جاڭعىرتۋ، سۋارۋ كانالدارىن رەتكە كەلتىرۋ، عارىشتىق مونيتورينگتىڭ كومەگىمەن ءقاۋىپ باسىم جەرلەردىڭ كارتاسىن ءتۇزۋ، تۇرعىندارعا ءىس-قيمىل الگوريتمىن ۇيرەتۋ. مۇلىكتى ساقتاندىرۋ تەتىكتەرىن ازىرلەۋ قاجەت. ايتپاقشى، سوڭعىسى ءازىر تەك جۇمىس توبى اياسىندا پىسىقتالىپ جاتىر.