سايلاۋدى قاداعالايتىن ەقىۇ ميسسياسىنىڭ جۇمىسى باستالدى

ميسسيانىڭ قۇرامىندا 11 حالىقارالىق ساراپشى، 32 بايقاۋشى بار.

ميسسيا سايلاۋدىڭ ەقىۇ مىندەتتەمەلەرىنە جانە دەموكراتيالىق سايلاۋ وتكىزۋ جونىندەگى باسقا دا حالىقارالىق مىندەتتەمەلەر مەن ستاندارتتارعا، ۇلتتىق زاڭناماعا سايكەستىگىن باعالايدى، دەپ حابارلايدى Almaty-akshamy.kz   

ەقىۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ قازاقستانداعى پارلامەنتتىك سايلاۋدى باقىلاۋ جونىندەگى ميسسياسى جۇمىسىن باستادى.

ميسسيا ەلورداداعى 11 حالىقارالىق ساراپشىدان، 17 اقپاننان باستاپ رەسپۋبليكا بويىنشا ورنالاستىرىلاتىن 32 ۇزاق مەرزىمدى بايقاۋشىلار توبىنان تۇرادى.

بۇدان بولەك دەموكراتيالىق ينستيتۋتتار جانە ادام قۇقىقتارى جونىندەگى بيۋروسى سايلاۋ كۇنى جاقىنداعاندا 300 قىسقا مەرزىمدى بايقاۋشى سۇراۋدى جوسپارلاپ وتىر.

"ەقىۇ-نىڭ 57 قاتىسۋشى مەملەكەتى بار. ولاردىڭ بارلىعى، سونىڭ ىشىندە قازاقستان دا، دەموكراتيالىق وزگەرىستەرگە، ادام قۇقىقتارى مەن نەگىزگى بوستاندىقتارعا قاتىستى ءبىرقاتار مىندەتتەمەلەردى قابىلدادى"، - دەدى سايلاۋدى باقىلاۋ ميسسياسىنىڭ باسشىسى وۋەن مەرفي.

ميسسيانىڭ جۇمىسى نورماتيۆتىك-قۇقىقتىق بازانى قولداۋ، سايلاۋ كوميسسيالارىنىڭ قىزمەتكەرلەرىن وقىتۋ جانە ت.ب. سالالاردى قامتيدى.

باقىلاۋشىلار ۇگىت-ناسيحات جۇرگىزۋ، سايلاۋ زاڭناماسىنىڭ ورىندالۋى، سونداي-اق سايلاۋعا قاتىستى بۇرىنعى ۇسىنىمداردىڭ ورىندالۋىن قاداعالايدى.

وۋەن مەرفيدىڭ سوزىنشە، ميسسيا سايلاۋ كۇنى سايلاۋ ۋچاسكەلەرىنىڭ اشىلۋى، داۋىس بەرۋ، بيۋللەتەندەردى ساناۋ، ناتيجەلەردى شىعارۋدى باقىلايتىن بولادى.

ول ەقىۇ ميسسياسى جۇمىسىنىڭ ماقساتى سايلاۋ ناۋقانىن قاداعالاۋ، قانداي دا ءبىر زاڭنامالىق وزگەرىستەردىڭ اسەرىن باقىلاۋ ەكەنىن جەتكىزدى.

"ءبىزدىڭ ميسسيانى قازاقستان بيلىگى شاقىرعانىن، ءوز كەزەگىندە ءبىز تاۋەلسىز باقىلاۋ جۇرگىزەتىنىمىزدى اتاپ وتكىم كەلەدى. نەگىزگى بايقاۋشىلار تاجىريبەلى ساراپشىلار بولىپ ەسەپتەلەدى. ولار سايلاۋ، رەفەرەندۋم ماسەلەلەرى بويىنشا بىلىكتى ماماندار"، - دەدى سايلاۋدى باقىلاۋ ميسسياسىنىڭ باسشىسى وۋەن مەرفي.