قوي ءسۇتى - قورعاسىن

قوي ءسۇتى سيىردىڭ سۇتىنەن الدەقايدا قۇنارلى، مايلى بولادى. حالىق ونى «قويدىڭ ءسۇتى – قورعاسىن» دەپ باعالايدى (قويدىڭ ءسۇتى – قورعاسىن، قويدى تەپكەن (سوققان) وڭباسىن. ماقال). مامانداردىڭ ايتۋىنشا، قوي ءسۇتىنىڭ ەشكى سۇتىنەن دە ەداۋىر ايىرماشىلىعى بار. ماسەلەن ەشكى سۇتىندە 4،5 پايىزداي بەلوك بولسا، قويدا ول 6 پايىزعا جەتەدى، ال ماي ەشكى سۇتىندە 4،5 پايىزداي بولسا، قوي سۇتىندەگى ماي 6 پايىزدان اسادى.

قويدىڭ ءسۇتىن ۇيدە، تۇزدە قايناتىپ ىشۋمەن بىرگە ودان ايران، قاتىق، كىلەگەي، قايماق، سۇزبە، اق ىرىمشىك، قىزىل ىرىمشىك، سارىسۋ، ىركىت، تاسقورىق، ۋىز، سىرنە، قۇرت  جاساعان. قوي ءسۇتى تىم قويۋ بولعاندا، وعان ازداپ سۋ قوسىپ تا پايدالانادى. سۋ قوسىلعان ءسۇتتى ەرتەرەكتە سۇمەسىن دەپ اتاعان. وسىعان بايلانىستى «سۇتكە سۋ قوسساڭ، سۇمەسىن بولادى، سوزگە ءسوز قوسساڭ، سۇيەسىن بولادى» دەگەن ماقال پايدا بولعان. سۇمە دەپ بۇرىنعى ۋاقىتتا مالدىڭ جەلىنى مەن ەمشەگىن ايتقان. كەيىنىرەك سۇمە «ءسۇت»، «اعارعان» ماعىناسىندا قولدانىلعان. مال تولدەپ جاتقاندا، ولاردىڭ ساۋىلاتىن كەزدەرىندە مالدىڭ سۇمەسىن (ءسۇتىن، ءسۇت تاعامدارىن) كوبىرەك پايدالانعان. ءتىپتى ەت تاپشىلاۋ بولعاندا «مالدىڭ سۇمەسىمەن كۇن كورىپ وتىرمىز» دەگەن. حالىقتىڭ ۇعىمىندا سۇمەسىن «ءسۇت تاعامدارى» دەگەندى بىلدىرگەن. قازىرگىشە ايتقاندا «ءسۇت ونىمدەرى».

                                                                                                                                                                                                                                                                                           اقپارات: El.kz