بۇل تۋرالى ەكولوگيا جانە تابيعي رەسۋرستار ۆيسە-مينيسترى عاليدوللا ازيدۋللين ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الدىن الا بولجامعا سايكەس، ناۋرىز ايىندا رەسپۋبليكانىڭ باسىم بولىگىندە اۋا تەمپەراتۋراسى كليماتتىق نورماعا جاقىن بولادى. باتىس وڭىرلەردە 1°س نورمادان جوعارى، ال ەلدىڭ سولتۇستىك-شىعىس، ورتالىعىندا جانە وڭتۇستىك ايماقتاردىڭ سولتۇستىگىندە 1°س نورمادان تومەن. ناۋرىز ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورمادان تومەن، سولتۇستىك قازاقستان، شىعىس قازاقستان وبلىستارىندا، اقمولا، پاۆلودار، اباي وبلىسىنىڭ باسىم بولىگىندە، قوستاناي وبلىسىنىڭ سولتۇستىك-شىعىسىندا، الماتى وبلىسىنىڭ وڭتۇستىك-شىعىسىندا، جەتىسۋ اۋماقتارىندا نورماعا جۋىق بولجانادى»، - دەدى ول ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ۆيسە-مينيستردىڭ ايتۋىنشا، قارداعى سۋ قورىنىڭ مولشەرىن، توپىراقتىڭ كۇزگى ىلعالدىلىعىن، توپىراقتىڭ قاتۋ تەرەڭدىگىن قاراستىرا وتىرىپ، سۋ تاسقىنى ءقاۋىپتى ايماقتارعا الدىن-الا باعا بەرىلدى.
«جوعارى ءقاۋىپ: قاراعاندى، اقمولا، سولتۇستىك قازاقستان، قوستاناي، شىعىس قازاقستان، اباي، اقتوبە، باتىس قازاقستان، اتىراۋ الماتى، جەتىسۋ، جامبىل، تۇركىستان وبلىستارى. ورتاشا ءقاۋىپ: پاۆلودار، ۇلىتاۋ، ماڭعىستاۋ جانە قىزىلوردا وبلىستارى»، - دەدى عاليدوللا ازيدۋللين.