قازاقستان رەسپۋبليكاسى پارلامەنت ءماجىلىسى مەن ءماسليحات دەپۋتاتتارىن سايلاۋ 19 ناۋرىزعا بەكىتىلدى. بۇل ساياسي ۇدەرىس كەزىندە پارتيالار، جەكەلەگەن تۇلعالار دوداعا قاتىسادى. وسى ماسەلەگە وراي ساياسي ساراپشىلار دا ءۇن قوسۋدا.
فيلوسوفيا، ساياساتتانۋ جانە ءدىنتانۋ ينستيتۋتىندا الداعى سايلاۋعا قاتىستى جيىن ءوتتى. شارادا «پارلامەنت ءماجىلىسى مەن ءماسليحاتتار سايلاۋىنىڭ سايلاۋ پروسەسىنە ەتنو-مادەني بىرلەستىكتەردىڭ قاتىسۋىن تالقىلاۋ» تاقىرىبى ورتاعا سالىندى. ءىس-شارانى العىسوزبەن وسى ينستيتۋتتىڭ باس ديرەكتورى سەرىك سەيدۋمانوۆ اشىپ بەردى. ال مودەراتورلىقتى شايكەمەل مۇحتاربەك جۇرگىزدى.
جيىنعا بەلگىلى قازاقستاندىق عالىمدار مەن ساراپشىلار، ەتنو-مادەني بىرلەستىكتەردىڭ وكىلدەرى مەن الماتى قالاسى قحا مۇشەلەرى، سونداي-اق قوعام وكىلدەرى مەن جۋرناليستەر قاتىستى.
بەلگىلى عالىم، فيلوسوفيا عىلىمىنىڭ كانديداتى ايدار امرەبايەۆ قازاقستان حالقى اسسامبلەياسىنىڭ جۇمىستارى توڭىرەگىندە وي قوزعادى. سونىمەن قوسا، ونىڭ قوعام ومىرىندەگى ماڭىزدىلىعىنا توقتالدى. الداعى ۋاقىتتا مۇنداي ينستيتۋسيونالدىق قۇرىلىمنىڭ قانشالىقتى قاجەتتىگى جانە وزەكتىلىگى جونىندە ويلارىمەن ءبولىستى.
– قازاقستان حالقى اسسامبلەياسى ءوز كەزەڭىندە ماڭىزدى رولگە يە بولدى. ەلدىڭ ساياسي ومىرىندە اسا بەلسەندىلىك تانىتتى. ءبىراز يگى جۇمىستارعا اتسالىستى. ول جاعى انىق. ساياسي ارەنادا دا قوماقتى ۇلەسىنەن ايرىلمادى. ۇدايى قولداۋ تاۋىپ ءجۇردى. ەلدەگى پارلامەنت سايلاۋى كەزىندە بەلسەندى جۇمىس كەرەك. وسى تۇستا اسسامبلەيا جارقىراپ كورىنەتىن شاعى دەپ بىلەمىز. ءارقاشان «جەڭىلدىڭ استىمەن، اۋىردىڭ ۇستىمەن» جۇرمەي، اشىق بەلسەندى جۇمىس ىستەسە دەگەن نيەتتەمىز. وتانىمىز بارشامىزعا ىستىق، ورتاق، قاسيەتتى ءۇي ەكەنىن ۇمىتپايىق، – دەدى عالىم ايدار مولداش ۇلى.
پارلامەنت سايلاۋىنا وراي قحا مۇشەلەرى دە بەلسەندىلىك تانىتىپ ءجۇر.
– ەلدە اۋقىمدى ساياسي ناۋقان باستالدى. كوپتەگەن وزگەرىستەر بولىپ تا، جاسالىپ تا جاتىر. اسسامبلەيا بەلسەندى ءارى شيراق قيمىلداۋ ۇستىندە. بارلىق ىستەن شەتكەرى قالمادى. سىن كوپ ايتىلۋى مۇمكىن. ءبىراق سايلاۋدا ءوز تاڭداۋىمىزدى ءبىر كىسىدەي بىلدىرەمىز دەپ ويلايمىن، – دەدى قحا مۇشەسى شايكەمەل مۇحتاربەك.