الەۋمەتتىك قىزمەت كورسەتۋ ورتالىعىندا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگى قوعامدىق كەڭەسىنىڭ سىرتتاي وتىرىسى ءوتتى.
اۋقىمدى باسقوسۋدا قالانىڭ سىبايلاس جەمقورلىق تاۋەكەلدەر كارتاسىن جۇزەگە اسىرۋ، بيزنەستى قورعاۋ جانە سىبايلاس جەمقورلىققا قارسى زاڭناماداعى جاڭالىقتار تۋرالى ماسەلەلەر تالقىلاندى. وعان ANTICOR اگەنتتىگى جانىنداعى قوعامدىق كەڭەستىڭ باسشىسى، مۇشەلەرى، الماتى قالالىق قوعامدىق كەڭەسىنىڭ مۇشەلەرى، بەلسەندىلەر، كاسىپكەرلەر قۇقىعىن قورعاۋشىلار، مەملەكەتتىك قىزمەتشىلەر، تىلشىلەر قاتىستى.
جيىندا ءار سالانىڭ ماماندارى جەمقورلىق فاكتىلەرىنىڭ الدىن الۋ، بولدىرماۋ، تۇبەگەيلى جويۋ شارالارىن قاراستىردى. وتىرىستا جاريالىلىق تۋرالى كوپ اڭگىمە ايتىلدى. ءار سالادا جوبانىڭ سمەتالىق قۇجاتتارى بەكىتىلمەي تۇرىپ، قۇقىقتىق-نورماتيۆتىك جاعىن ەسكەرۋ قاجەتتىگى باياندالدى.
مارات باشيموۆ،
ق ر سىبايلاس جەمقورلىققا قارسى ءىس-قيمىل اگەنتتىگى جانىنداعى قوعامدىق كەڭەس ءتوراعاسى:
حالىقارالىق تاجىريبەنى قولدانايىق
ق ر پرەزيدەنتى قاسىم-جومارت توقايەۆ سىبايلاس جەمقورلىقتى جويۋعا بايلانىستى ءبىرقاتار ناقتى تاپسىرما جۇكتەدى. وسى باعىتتاعى جۇمىسىمىز ايقىن. جۇگەنسىز كەتكەن جەمقورلىق تاۋەكەلدەرىن اۋىزدىقتاۋعا باعىتتالعان ءىس-شارالار باستالىپ كەتتى.
سىبايلاس جەمقورلىققا قارسى ءىس-قيمىل اگەنتتىگىنىڭ جانىنداعى قوعامدىق كەڭەستىڭ كوشپەلى وتىرىسى العاش رەت ۇيىمداستىرىلىپ وتىر. بۇعان الماتى قالاسىنداعى ارىپتەستەرىمىز قولداۋ ءبىلدىردى. مەگاپوليستىڭ رەسپۋبليكالىق ماڭىزى جوعارى. مۇنداعى قوردالانعان ماسەلەلەردىڭ شەشىمىن بىرلەسىپ تابۋدى كوزدەيمىز.
مەملەكەتتىك قۇرىلىمنىڭ ءار سالاسىندا جەمقورلىقتى تەجەۋ قاراستىرىلۋدا. ءتىپتى، تۇپ-تامىرىمەن الىپ تاستاۋ قاجەت. ءاربىر ىستە تالداۋ-ساراپتامالىق جۇمىستار جۇرگىزىلۋدە. بۇل باعىتتا كوپتەگەن كۇرمەۋلى سۇراقتارعا تاپ بولۋدامىز. ەڭ نەگىزگىسى، كاسىپكەرلىككە قىسپاق جاساۋدى بولدىرتپاۋ. مۇنداي جۇگەنسىزدىك بەلەڭ الا بەرسە، ونىڭ سالدارىمەن كۇرەس قيىندايدى. سوندىقتان پاراقورلىققا تىيىم سالۋدىڭ بارلىق فورمالارىن ناقتى ىسپەن جۇزەگە اسىراتىن كۇن تۋدى. جەمقورلىقتى جويۋ ءۇشىن قولدان كەلەر ءىس-قيمىلدىڭ ءبارىن جاساۋ كەرەك. بۇل دەرتتى اۋىزدىقتاماساق، ءار سالاعا زيانىن تيگىزىپ بىتەتىن ءتۇرى بار. قوعام دا، مەملەكەت تە پاراقورلىقتىڭ جويىلۋىنا مۇددەلى. بۇل باعىتتاعى ستراتەگيا قولعا العان ىستەردى جانداندىرادى. اشىق بيۋدجەت، كەتكەن ولقىلىق، قاي جەردە وزەكتى ماسەلە تۋىندادى، مىنە، سونى قاداعالاۋ كەرەك. وڭىرلەردىڭ جاعدايى الاڭداتادى. ايماقتارداعى مەملەكەتتىك قۇرىلىمنىڭ تازا ءارى ساپالى جۇمىس ىستەۋىندە كەزدەسەتىن ءبىرقاتار تۇيتكىلدەردى شەشۋ جولدارىن ساراپتايىق. مۇندا قاراپايىم ازاماتتاردىڭ ءۇنى ەسكەرىلسە دەيمىز. بۇل وتە ماڭىزدى ءىس. ساراپشى، بەلسەندى جانە ت.ب. مامانداردىڭ پىكىرى اۋاداي قاجەت.
ءقازىر بىزگە «ۆەلوسيپەد» ويلاپ تابۋدىڭ قاجەتى شامالى. حالىقارالىق كونۆەنسياعا سۇيەنسەك جەتكىلىكتى. ەۋروپالىق تاجىريبە بار. ءبىر نارسەگە ۇمىتتەنەمىز. دالىرەك، ازاماتتىق جاۋاپكەرشىلىك پەن قىلمىستىق جاۋاپكەرشىلىكتى سارالاي قاراستىرىپ، اراجىگىن ناقتىلايىق. جاڭادان سايلاناتىن پارلامەنت وسى ايتىلعاندارعا نازار اۋدارسا ەكەن. قاجەتتى زاڭدى بەكىتىپ، ەل يگىلىگىنە جاراتايىق.
سايان احمەتجانوۆ،
ق ر سىبايلاس جەمقورلىققا قارسى ءىس-قيمىل اگەنتتىگى پريەۆەنسيا قىزمەتىنىڭ باسشىسى:
جەمقورلىقپەن كۇرەس كۇشەيەدى
بيزنەس جەمقورلىققا كوپ ۇشىرايدى. بۇل جاعى بەلگىلى. وكىلەتتى ورگانداردىڭ قىسپاققا الماۋ جاعىن قاراستىرىپ جاتىرمىز. «بيزنەسكە جول» دەگەن باعدارلاما باستالدى. وسىنىڭ اياسىندا كەلىپ تۇسكەن ارىز-شاعىم قاراستىرىلادى. ءبىز كوپتەگەن ىڭعايسىز جاعدايدان حاباردارمىز. بيۋروكراتياعا جول بەرمەۋىمىز كەرەك. ءتىپتى، ونلاين قاراي باستايمىز. جەرگىلىكتى اتقارۋشى ورگاندارمەن بىرلەسىپ ءىس-قيمىل جاسايمىز.
الداعى ۋاقىتتا اتقاراتىن ءىس كوپ. جۇيەلى جۇمىستار بار. جەرگىلىكتى اتقارۋشى ورگانداردىڭ دا كومەگى زور بولايىن دەپ تۇر. ءاربىر كەلىپ تۇسكەن حات، ءوتىنىش، ارىز ناقتى قارالاتىن بولادى. بارلىعىنا تالداۋ جۇرگىزىلەدى. زاڭ شەڭبەرىندە ءتيىستى شارالار جاسالادى.
جەمقورلىقپەن كۇرەستە بۇقارالىق اقپارات قۇرالدارىنىڭ ءرولى زور. قازىرگى ۋاقىت تالابىن ەسكەرەمىز. جاڭا تەحنولوگيانى قولدانىپ، ونلاين فورماتتا دا ءىس اتقارا بەرەمىز.