اۋعانستاندا كسرو-نىڭ 620 مىڭعا جۋىق، سونىڭ ىشىندە قازاقستاندىق 22 مىڭ ادام اسكەري قىزمەتتەرىن وتەدى
16 اقپاندا مەملەكەتتىك ورتالىق مۋزەيىندە كەڭەس اسكەرىنىڭ اۋعانستاننان شىعارىلۋىنا ارنالعان «اۋعاننىڭ وتتى جالىنى» كورمەسى اشىلادى، دەپ حابارلايدى Almaty-akshamy.kz.
كەڭەس اسكەرلەرى اۋعانستان جەرىندە اۋىر دا ازاپتى توعىز جىل بويى – 1979 جىلدىڭ 25 جەلتوقسانىنان 1989 جىلدىڭ 15 اقپانىنا دەيىن بولدى.
اۋعانستاندا كسرو-نىڭ 620 مىڭعا جۋىق، سونىڭ ىشىندە قازاقستاندىق 22 مىڭ ادام اسكەري قىزمەتتەرىن وتەدى.
15 526 ادام، سونىڭ ىشىندە قازاقستاندىق 924 قازا تاپتى، العان جاراقاتتارىنان جانە اۋرۋلاردان قايتىس بولدى.
333 ادام (كسرو قورعانىس مينيسترلىگى باس شتابىنىڭ دەرەكتەرى بويىنشا)، سونىڭ ىشىندە قازاقستاندىق 21 ادام حابار-وشارسىز جوعالدى جانە تۇتقىنعا ءتۇستى.
اۋعان سوعىسى كەڭەستەر وداعىنا ەشبىر ار-ابىروي، داڭق اكەلگەن جوق.
قۇربان بولعانداردىڭ تۋىستارى مەن جاقىندارى ءۇشىن بۇل قاسىرەتتى سوعىس 1989 جىلى 15 اقپانداعى اسكەرلەردىڭ شىعارىلۋىمەن دە اياقتالعان جوق. ول ءتىپتى ۋاقىتتىڭ ءوزى دە ەمدەۋگە دارمەنسىز قانسىراعان جارا بولىپ قالىپ وتىر. وسى قانتوگىستى وقيعانىڭ تاجىريبەسى ءار مەملەكەت پەن حالىق وزدەرىنىڭ ىشكى ىستەرىن ءوز حالىقتارىنىڭ پايداسى مەن يگىلىكتەرى ءۇشىن دەربەس تۇردە شەشۋگە ۇندەگەن قايتالانباس ساباق بولدى. شايقاس شەبىندە سوعىستى تۇتاندىرۋشىلار ەمەس، مايدانداعى جاۋىنگەرلەر قازا بولدى. كورمە ناق وسىلار حاقىندا.
كورمەنىڭ ماقساتى – اۋعانستان سوعىسى تۋرالى شىندىقتى جەتكىزۋ، جاۋىنگەرلەر مەن جاستاردىڭ جاڭا لەك ۇرپاعىن اۋعانستاندا شايقاسقان سولداتتار مەن وفيسەرلەردىڭ پاتريوتتىق ۇلگىسىندە تاربيەلەۋ، سونداي-اق، سوعىس ساياسي پروبلەمالاردى شەشۋدىڭ ءتاسىلى ەمەس ەكەندىگى تۋرالى ۇعىمدى قالىپتاستىرۋ.
ەكسپوزيسياعا اۋعانستاندا شايقاسقان، قۇربان بولعان جانە وسى وتتى كەشۋدەن امان قالعان قازاقستاندىق جاۋىنگەرلەر مەن وفيسەرلەردىڭ دەرەكتى ماتەريالدارى (وقيعالاردىڭ كۋاگەرلەرى مەن قاتىسۋشىلارىنىڭ فوتوسۋرەتتەرى، حاتتارى، كۋالىكتەرى)، ناگرادالارى مەن جەكە زاتتارى قويىلادى. كورمەگە كەلۋشىلەردى، اسىرەسە، كەڭەس جاۋىنگەرلەرى مەن وفيسەرلەرىنىڭ، سونداي-اق ولاردىڭ قارسىلاستارىنىڭ اسكەري كيىم-مۇلىكتەرى ايرىقشا قىزىقتىرارى ءسوزسىز.
كورمە قازاقستاننىڭ «جاۋىنگەرلىك باۋىرلاستىق» جەرگىلىكتى سوعىستار مەن اسكەري قاقتىعىستار ارداگەرلەرى وداعىنىڭ جانە الماتى قالاسىنداعى اۋعانستان سوعىسى ارداگەرلەرى وداعىنىڭ بەلسەڭدى تۇردە قاتىسۋىمەن ۇيىمداستىرىلىپ وتىر.
كورمە 2023 جىلدىڭ 5 ناۋرىزىنا دەيىن جالعاسادى.