ماجىلىسكە كوزقاراسى ءارتۇرلى ساياسي ۇستانىمداعى كۇشتەر كەلدى. بۇل تۋرالى پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى almaty-akshamy.kz
«سايلاۋ ناۋقانى كەزىندە كوپتەگەن ورىندى سىن، بايىپتى ۇسىنىس ايتىلدى. ءبىز ايتىلعان سالماقتى ۇسىنىستاردى مىندەتتى تۇردە زەردەلەيمىز. باسەكە جوعارى بولعاندىقتان، سايلاۋ ناتيجەسىن الدىن-الا بولجاۋ مۇمكىن ەمەس بولدى. ونىڭ قورىتىندىسى ەلىمىزدىڭ ناعىز كوپپارتيالى مەملەكەتكە اينالۋ جولىندا ماڭىزدى قادام جاساعانىن كورسەتتى. مەملەكەت باسشىسى رەتىندە ايتارىم، ماجىلىسكە كوزقاراسى ءارتۇرلى ساياسي ۇستانىمداعى كۇشتەر كەلدى دەپ ەسەپتەيمىن»، - دەدى پرەزيدەنت.
مەملەكەت باسشىسى العاش رەت ۇزاق جىل بويى وپپوزيسيادا بولعان پارتيا پارلامەنتكە وتكەنىن دە اتاپ ءوتتى.
«ءبىز وسىنىڭ بارىنە اۋقىمدى ساياسي رەفورمانىڭ ارقاسىندا قول جەتكىزدىك. پارتيالاردى تىركەۋ ماسەلەسىن رەتتەيتىن زاڭنامانىڭ وزگەرۋى دە بۇعان سەپتىگىن تيگىزدى. ەندى پارتيالار ەلىمىزدىڭ بولاشاعىنا زور ىقپال ەتەتىن ساياسي ۇدەرىستىڭ باسى-قاسىندا جۇرەتىن بولادى. ماجىلىسكە ءبىر مانداتتى وكرۋگتەن دە دەپۋتاتتار سايلاندى. ياعني، پارلامەنتكە ءتۇرلى الەۋمەتتىك توپتان شىققان وكىلدەردىڭ كەلۋىنە جول اشىلدى. سونداي-اق، ۇزاق جىلدان بەرى العاش رەت ءوزىن-وزى ۇسىنعان ۇمىتكەرلەر دەپۋتات اتاندى. ءبىرقاتار ازامات پارتيا اتىنان شىققان ۇمىتكەرلەردى تارتىستى باسەكەدە جەڭىپ شىقتى. وسىلايشا، ەلىمىزدە دەموكراتيا ءداستۇرى جاڭا دەڭگەيگە كوتەرىلىپ، نىعايا ءتۇستى. ساياسي كۇشتەردىڭ بارىنە بىردەي مۇمكىندىك بەرىلەتىنىنە ازاماتتاردىڭ سەنىمى ارتتى»، - دەدى قاسىم-جومارت توقايەۆ.