بيلىككە ويى وزىق، ءبىلىمدى جاستار كەلۋى كەرەك - مەملەكەت باسشىسى
بۇل تۋرالى مەملەكەت باسشىسى VIII سايلانعان پارلامەنتتىڭ العاشقى سەسسياسىندا ايتتى، دەپ حابارلايدى Almaty-akshamy.kz.
«ەلىمىزدىڭ جاستارى ءاردايىم مەنىڭ ايرىقشا نازارىمدا ەكەنى بارشاعا ءمالىم. مەن بيلىككە ويى وزىق، ءبىلىمدى جاستار كەلۋى كەرەك دەپ ۇنەمى ايتامىن. وسكەلەڭ ۇرپاقتى ەل ىسىنە باۋلۋ – وتە ماڭىزدى ماسەلە. ولار قوعامعا جاڭا قۇندىلىقتار اكەلۋگە ءتيىس. سايلاۋ كەزىندە جاس كانديداتتار بىرىگىپ، ءوز توبىن قۇرعانى بەلگىلى. وسى وداقتىڭ بەلسەندى مۇشەلەرى پارلامەنتكە جانە ءماسليحاتتارعا ءوتتى»، - دەدى پرەزيدەنت.
مەملەكەت باسشىسىنىڭ ايتۋىنشا، بيلىك تارماعىنا ساياساتكەرلەردىڭ جاڭا بۋىنى كەلىپ جاتىر. جاستار مۇنى ەلىمىزدى دامىتۋعا بەرىلگەن بىرەگەي مۇمكىندىك دەپ باعالاۋى قاجەت.
«ايەلدەردىڭ جانە ەرەكشە قاجەتتىلىگى بار جانداردىڭ ماجىلىسكە وتۋىنە جاعداي جاسالدى. ساياسي ناۋقان قوعامداعى ءاربىر ازامات پارلامەنتكە مۇشە بولا الاتىنىن جانە «الەۋمەتتىك ليفت» جۇمىس ىستەيتىنىن ايقىن اڭعارتتى. ادىلەتتى قوعامنىڭ قالىپتاسۋى دەگەنىمىز – وسى!
بۇل سايلاۋ ۇمىتكەرلەرگە قويىلاتىن تالاپ وزگەرگەنىن كورسەتتى. ءقازىر تۇرعىندارمەن تىعىز قارىم-قاتىناس ورناتۋ وتە ماڭىزدى. مۇنى دۇرىس ءتۇسىنىپ، ەلمەن ەتەنە ارالاسا بىلگەن ۇمىتكەرلەر حالىق سايلاعان وكىل اتاندى. سايلاۋشىلار ءوزىنىڭ مۇڭ-مۇقتاجىن بىلەتىن جانە مۇددەسىن قورعاي الاتىن ازاماتتارعا داۋىس بەردى»، - دەدى ول.