26 جانە 27 قاڭتار كۇندەرى الماتى قالاسىندا دۇنيەجۇزىلىك سايلاۋ كۇنىنە وراي ءبىرقاتار ءىس-شارالار ءوتتى. ەكى كۇن ىشىندە قالانىڭ اۋماقتىق سايلاۋ كوميسسيالارى ءار ءتۇرلى فورماتتاعى 16 ءىس-شارا – سەمينارلار، دارىستەر، پىكىرتالاستار، دوڭگەلەك ۇستەلدەر مەن ينتەراكتيۆتى كەزدەسۋلەر ۇيىمداستىرىپ، جالپى سانى 825 ادامدى قامتىدى. ونىڭ ىشىندە 626-سى – جاستار.
بارلىق ءىس-شارالار «ەلەكتورالدى قاعيداتتار – سايلاۋشى سەنىمىنىڭ نەگىزى» ۇرانىمەن ءوتىپ، زاڭ ۇستەمدىگى، سايلاۋ قۇقىعى، ازاماتتىق جاۋاپكەرشىلىك جانە ەلەكتورالدى مادەنيەتتى دامىتۋ ماسەلەلەرىنە ارنالدى.
العاشقى كۇنى قالانىڭ بارلىق اۋداندارىندا ۋچاسكەلىك سايلاۋ كوميسسيالارى مۇشەلەرىنىڭ قۇقىقتىق ساۋاتىن ارتتىرۋعا باعىتتالعان وقىتۋ سەمينارلارى مەن دارىستەر، سونداي-اق وقۋشىلار مەن ستۋدەنتتەرگە ارنالعان سايلاۋ زاڭناماسىنىڭ نەگىزدەرى جانە ادال ءارى اشىق سايلاۋ قاعيداتتارى جونىندەگى تاقىرىپتىق كەزدەسۋلەر ءوتتى.
ەكىنشى كۇنى جاستارمەن جۇمىس ىستەۋدىڭ ينتەراكتيۆتى فورماتتارىنا باسىمدىق بەرىلدى. مەگاپوليستىڭ ءبىلىم بەرۋ ۇيىمدارىندا قوناق دارىستەر، پىكىرتالاس، دوڭگەلەك ۇستەلدەر جانە شىعارماشىلىق بايقاۋلار ۇيىمداستىرىلىپ، ونىڭ بارىسىندا قاتىسۋشىلار جەكە تاڭداۋدىڭ ماڭىزىن، ازاماتتىق ۇستانىمدى قالىپتاستىرۋ جولدارىن جانە سايلاۋعا قاتىسۋدىڭ ەل بولاشاعىنا ىقپالىن تالقىلادى.
«مۇنداي باستامالار قۇقىقتىق ساۋاتتىلىق دەڭگەيىن ارتتىرىپ قانا قويماي، جاستارمەن تۇراقتى ءارى ناتيجەلى ديالوگ ورناتۋعا مۇمكىندىك بەرەدى، سونىمەن قاتار بەلسەندى ءارى سانالى بولاشاق سايلاۋشىلار بۋىنىن قالىپتاستىرادى»، – دەپ اتاپ ءوتتى الماتى قالاسىنىڭ اۋماقتىق سايلاۋ كوميسسياسىندا.
وتكىزىلگەن ءىس-شارالار قاتىسۋشىلاردىڭ قۇقىقتىق مادەنيەتىن نىعايتۋعا، ازاماتتىق بەلسەندىلىكتى دامىتۋعا جانە سايلاۋ ۇدەرىسىنە جاۋاپكەرشىلىكپەن قاراۋ كوزقاراسىن قالىپتاستىرۋعا ىقپال ەتتى.