الماتىدا قۇقىق قورعاۋ ورگاندارى ينتەرنەت-الاياقتىق پەن نەسيەلەردى زاڭسىز راسىمدەۋ فاكتىلەرىنە قاتىسى بار قىلمىستىق توپتاردى اشكەرەلەپ، جالپى شىعىنى 300 ملن تەڭگەدەن اساتىن قىلمىستاردىڭ جولىن كەستى، دەپ حابارلايدى Aqshamnews.kz ءتىلشىسى.
تەرگەۋ دەرەكتەرىنە سايكەس، العاشقى ەپيزودتا كۇدىكتىلەر وزدەرىن مەملەكەتتىك ورگان جانە بانك قىزمەتكەرلەرى رەتىندە تانىستىرىپ، نەگىزىنەن قارت ادامداردى الداپ سوققان. ولار ازاماتتاردىڭ پاتەر ساتۋدان تۇسكەن قاراجاتىن جانە بانك دەپوزيتتەرىندەگى اقشاسىن يەمدەنگەن. اقشانى بەرۋ فاكتىلەرى جەتكىزۋ قىزمەتتەرىنىڭ كۋرەرلەرى ارقىلى جۇزەگە اسقان.
ەكىنشى جاعداي بويىنشا الەۋمەتتىك وسال توپتاعى ادامداردىڭ اتىنا قايتارىمسىز اۆتونەسيەلەر راسىمدەلىپ، كەيىن كولىكتەردى قايتا ساتىپ جىبەرگەن ۇيىمداسقان توپ انىقتالعان. كەي اۆتوكولىكتەردىڭ قازاقستان اۋماعىنان تىس جەرگە شىعارىلىپ، قايتا ساتىلعانى ايتىلادى. قارجى ۇيىمدارىنا كەلتىرىلگەن شىعىن 66 ملن تەڭگەدەن اسقان.
جەدەل-ىزدەستىرۋ جانە تەرگەۋ شارالارى بارىسىندا 10-نان استام كۇدىكتى ۇستالىپ، ءبىر ادامعا ىزدەۋ جاريالانعان. سونداي-اق ونداعان ءتىنتۋ جۇرگىزىلىپ، اقشا قاراجاتى، قارۋ، ۇيالى تەلەفوندار جانە قۇجاتتار تاركىلەنگەن.
الماتى قالاسىنىڭ پروكۋراتۋراسى ازاماتتارعا ەسكەرتۋ جاساپ، مەملەكەتتىك ورگاندار مەن بانكتەر اقشا تالاپ ەتپەيتىنىن، «قىلمىستىق ءىس» دەپ قورقىتىپ نەمەسە قوقان-لوققى كورسەتىپ قوڭىراۋ شالمايتىنىن مالىمدەدى. كۇدىكتى قوڭىراۋلار بولعان جاعدايدا دەرەۋ قۇقىق قورعاۋ ورگاندارىنا حابارلاسۋ قاجەت.