18 قاراشاعا دەيىن كانديداتتار ءوز شتابىمەن بىرلەسە وتىرىپ، حالىقپەن كەزدەسەدى
پرەزيدەنتتىككە ۇسىنىلعان 6 كانديدات پەن ولاردىڭ قولداۋشى شتابتارى وڭىرلەردى ارالۋدا. ءار كەزدەسۋدە تۇرعىنداردىڭ كوكەيتەستى سۇراقتارىنا جاۋاپ بەرۋ، ۇمىتكەرلەردىڭ سايلاۋالدى باعدارلاماسىن تانىستىرۋ سىندى جۇمىستار جالعاسىپ جاتىر، دەپ حابارلايدى Almaty.tv ءتىلشىسى.
پرەزيدەنتتىككە كانديدات توقايەۆتىڭ رەسپۋبليكالىق قولداۋ شتابى الماتى وبلىسىنا باردى. وتەگەن باتىر كەنتىندەگى مەديسينا قىزمەتكەرلەرىمەن كەزدەسۋدە ۇمىتكەردىڭ سايلاۋالدى باعدارلاماسىندا كورسەتىلگەن ۇلتتىق دەنساۋلىق ساقتاۋ جۇيەسىن دامىتۋدىڭ نەگىزگى ماقساتى تالقىلاندى.
«ەلىمىز ءۇشىن تاعدىر شەشۋشى كەزىندە ءبىز دۇرىس تاڭداۋ جاساۋىمىز كەرەك دەپ، دۇرىس ەل باسقاراتىن ادامدى سايلاۋىمىز كەرەك»، – دەدى ق ر پرەزيدەنتتىگىنە ۇمىتكەر ق. توقايەۆتىڭ رەسپۋبليكالىق قوعامدىق شتابى مۇشەسى ازات پەرۋاشيەۆ.
ال ۇمىتكەر مەيرام قاجىكەن اباي وبلىسىنا ساپارىندا كاسىپوداق وكىلدەرىمەن جولىقتى. سەمەيدەگى ۇگىت-ناسيحات جۇمىستارى كەزىندە مەديسينالىق ۋنيۆەرسيتەتكە بارعان كانديدات رەزيدەنت دارىگەرلەرمەن جانە پروفەسسورلارمەن كەزدەسىپ، ءوزىنىڭ سايلاۋالدى باعدارلاماسىن تانىستىردى.
«حالىق كوپ جىلداردان بەرى ءبىز جەكە ءوڭىر بولايىق، وبلىس بولايىق دەپ اڭساعان ەكەن. جەتتى. بەلسەندى. بولاشاعى بار»، – دەدى ق ر پرەزيدەنتتىگىنە ۇمىتكەر مەيرام قاجىكەن.
اقتوبە وبلىسىنا بارعان پرەزيدەنتتىككە كانديدات قاراقات ابدەن ايماقتاعى ىسكەر ايەلدەرمەن كەزدەستى. سايلاۋالدى تۇعىرناماسىنىڭ نەگىزگى باسىمدىقتارىنا توقتالىپ ءوتتى. ودان بولەك، بيزنەس وكىلدەرىنىڭ پىكىر الماسىپ، ولاردىڭ ءبىرقاتار سۇراقتارىنا جاۋاپ بەردى.
«100 پروسەنت سول جۇمىسقا بەرىلسە، جاقسى كورسە، تازا ادال جاساسا، بارلىق ەسىكتەر اشىق دەپ ويلايمىن»، – دەدى كاسىپكەر گۇلجازيرا ەشنياز
كانديدات جيگۋلي دايرابايەۆ پاۆلودار وبلىسىنداعى ۇگىت-ناسيحات جۇمىستارىن ەكىباستۇز قالاسىنان باستادى. ارداگەرلەر كەڭەسىنە ات باسىن بۇرىپ ءوڭىردىڭ چەمپيونىمەن شاحمات وينادى. سودان كەيىن حالىق بازارىنا بارىپ، ازىق-تۇلىك باعاسىمەن تانىستى.
«ەشقانداي دەلدالسىز شارۋالار تىكەلەي وسى نارىققا كەلىپ تاپسىرادى. ءبىر شەتىنەن باعا حالىققا قولجەتىمدى. ەكىنشى جاعىنان شارۋالارعا مۇمكىندىك»، – دەدى ق ر پرەزيدەنتتىگىنە ۇمىتكەر ج. دايرابايەۆتىڭ رەسپۋبليكالىق قوعامدىق شتابى باسشىسىنىڭ ورىنباسارى اناس باققوجايەۆ.
پرەزيدەنتتىككە وپپوزيسيالىق پارتيا اتىنان ۇسىنىلعان كانديدات نۇرلان اۋەسبايەۆ شىمكەنتكە ساپارىندا قالالىق قولداۋ شتابىنىڭ جۇمىسىمەن تانىستى. جاقتاستارىمەن كەزدەسۋ كەزىندە پىكىر الماسىپ، ۇگىت-ناسيحات جۇمىستارى بويىنشا ۇيىمداستىرىلاتىن ءىس-شارالاردىڭ جوسپارىن پىسىقتادى.
«ولار وزدەرىنىڭ اتقارىپ جاتقان جۇمىستارى تۋرالى بارلىق ماسەلەلەر جونىندە پىكىر الماسىپ، الداعى اتقارىلاتىن جۇمىستار تۋرالى ءبىرشاما كەلىسىمگە كەلدىك»، – دەدى ق ر پرەزيدەنتتىگىنە ۇمىتكەر نۇرلان اۋەسبايەۆ.
تۇركىستان وبلىسىنا بارعان كانديدات سالتانات تۇرسىنبەكوۆا «شاپاعات» موتيۆاسيا ورتالىعىنا بارىپ، ەم الىپ جاتقان ادامدارمەن جۇزدەستى. كەيىن كەنتاۋداعى ترانسفورماتور زاۋىتىنا ات باسىن بۇرىپ، ونداعى مامانداردىڭ ءبىرقاتار سۇراقتارىنا جاۋاپ بەردى.
«ماسەلەلەردى قوزعادىق. ءوندىرىس ورنىن كورسەتتىك. ەندى ەكسپورتقا نەگىزدەلگەن مەكەمە بولعاننان كەيىن پروبلەماسىز بولمايدى. سولاردى ايتتىق»، – دەدى كاسىپورىننىڭ باسقارما ءتوراعاسى باۋىرجان قۇدايبەرگەنوۆ.
ۇمىتكەرلەر جانە ولاردىڭ جاقتاستارى ۇگىت-ناسيحات جۇمىستارىن «تىنىشتىق» كۇنىنە دەيىن وتكىزەدى. وعان دەيىن وڭىرلەردى ارالاپ، تۇرعىندارمەن كەزدەسۋ ۇيىمداستىرىپ، سايلاۋالدى باعدارلاماسىن تانىستىرا بەرەدى.