قورعانىس مينيسترلىگى ورتالىق سپورت كلۋبىنىڭ نۇسقاۋشى-سپورتشىسى كىشى سەرجانت ساكەن بيبوسىنوۆ بوكستان يوردانيانىڭ استاناسى – امماندا ءوتىپ جاتقان ازيا بىرىنشىلىگىنىڭ العاشقى كەزدەسۋىندە سەنىمدى تۇردە جەڭىسكە جەتتى، دەپ حابارلايدى Almaty-akshamy.kz.
ارميانىڭ 51 كەلى سالماقتاعى بىلعارى قولعاپ شەبەرى 1/8 فينالدا ءۇندىستاندىق قارسىلاسى كۋمار سپارشتان باسىم ءتۇستى. شيرەك فينالدا ول مالايزيالىق بوكسشى كايۋم اريففينمەن جۇدىرىقتاسپاق.
قورعانىس مينيسترلىگى ورتالىق سپورت كلۋبىنىڭ اسكەري قىزمەتشىسى كىشى سەرجانت ساكەن بيبوسىنوۆ – ەڭبەك سىڭىرگەن سپورت شەبەرى. ونىڭ قورجىنىندا 2020 جىلعى وليمپيادانىڭ «قولا» جانە 2021 جىلعى الەم چەمپيوناتىنىڭ جەڭىمپازى اتاعى بار.
– ءبىزدىڭ سپورتشىلاردىڭ جەڭىسكە جەتۋگە بارلىق مۇمكىندىگى بار. تالىمگەرلەردىڭ كۇش-جىگەرى مەن قارقىندى جاتتىعۋلارى جاقسى ناتيجە بەرەدى دەپ ۇمىتتەنەمىز. قازاقستاندىق بوكسشىلارعا تاباندىلىق پەن ساتتىلىك تىلەيمىز، – دەدى قورعانىس مينيسترلىگى ورتالىق سپورت كلۋبىنىڭ باستىعى ولگا شيشيگينا.
ازيا چەمپيوناتىندا قازاقستان قۇراماسىنىڭ ساپىندا قورعانىس مينيسترلىگى ورتالىق سپورت كلۋبىنىڭ تاعى ءبىر سپورتشىسى – اسلانبەك شىمبەرگەنوۆ تە شارشا الاڭدا بىلعارى قولعاپ تۇيىستىرۋدە. ول 71 كەلىگە دەيىنگى سالماقتا باعى مەن بابىن سىناپ ءجۇر.