سايكەستەندىرۋ قۇرالدارىمەن تاڭبالاۋدى ەنگىزۋ ناتيجەسىندە ءسۇت باعاسى وسپەيدى

اۋىل شارۋاشىلىعى مينيسترلىگىنىڭ ماماندارى ارنايى تۇسىندىرمە جاسادى.

اۋىل شارۋاشىلىعى مينيسترلىگىنىڭ ماماندارى تاڭبالاۋدىڭ ەنگىزىلۋىنە بايلانىستى ءسۇت باعاسى وسەدى دەگەن اقپاراتقا بايلانىستى تۇسىنىكتەمە بەردى، دەپ حابارلايدى Almaty-akshamy.kz.

مامانداردىڭ ايتۋىنشا، ءبىرقاتار قازاقستاندىق بۇقارالىق اقپارات قۇرالدارى تاڭبالاۋدىڭ ەنگىزىلۋىنە بايلانىستى ءسۇت باعاسىنىڭ قىمباتتاۋى تۋرالى حابارلاما جاريالاعان. اۆتورلار ءسۇتتىڭ باستاپقى قۇنى 29%-عا، ال سوڭعى تۇتىنۋشى ءۇشىن 40-50%-عا دەيىن قىمباتتاعانىن ايتقان. باعانىڭ ءوسۋى تاۋارلاردى تاڭبالاۋ شىعىندارى ەسەبىنەن بولادى دەپ جازىلعان.

وسىعان بايلانىستى اۋىل شارۋاشىلىعى مينيسترلىگى قازىرگى ۋاقىتتا ءبىرىڭعاي وپەراتور ءسۇت ونىمدەرىن تاڭبالاۋ بويىنشا پيلوتتىق جوبا جۇرگىزىپ جاتقانىن حابارلايدى. 

«پيلوتتىق الاڭدى ەلىمىزدىڭ 4 وڭىرىندە ءارتۇرلى ءوندىرىس كولەمى بار 7 ءسۇت وڭدەۋ كاسىپورنى ۇسىنعان.بارلىق پروسەستەر «اتامەكەن» ۇكپ مەن سالالىق قوعامدىق بىرلەستىكتەردىڭ تىكەلەي قاتىسۋىمەن ۆەدومستۆوارالىق دەڭگەيدە جۇزەگە اسىرىلادى. رەتتەۋشىلىك اسەردى تالداۋدى كەلىسۋگە جانە بارلىق قاجەتتى نورماتيۆتىك قۇجاتتاردى قوعامدىق تالقىلاۋعا بيزنەس وكىلدەرى دە قاتىسۋدا. پيلوتتىق جوبانى جۇرگىزۋ كەزىندە الەۋمەتتىك-ەكونوميكالىق تاۋەكەلدەر مەن قۇقىقتىق سالدارلارى ەسكەرىلەتىن بولادى. وسىعان بايلانىستى، پيلوتتىق جوبا اياقتالعانعا دەيىن ءسۇت ونىمدەرى باعاسىنىڭ قىمباتتاۋى تۋرالى تۇجىرىمدامالار مەرزىمىنەن بۇرىن جاسالعان دەپ سانايمىز»، – دەلىنگەن اۋىل شارۋاشىلىعى مينيسترلىگىنىڭ باسپا ءسوز قىزمەتىنىڭ حابارلاماسىندا.