بۇگىن قاسىم-جومارت توقايەۆتىڭ 2022 جىلعى جالپىۇلتتىق سايلاۋدا جەڭىسكە جەتىپ، ەل پرەزيدەنتى قىزمەتىنە رەسمي تۇردە كىرىسكەنىنە تۋرا 1 جىل تولىپ وتىر. وسىعان وراي، سەنات ءتوراعاسى ماۋلەن اشىمبايەۆ ءوزىنىڭ Facebook-تەگى پاراقشاسىندا جۇرەكجاردى لەبىزىن ءبىلدىردى.
اتالعان سايلاۋدا قازاقستان حالقىنىڭ باسىم كوپشىلىگى مەملەكەت باسشىسى ۇسىنعان رەفورمالار باعدارلاماسىن جانە ادىلەتتى قازاقستان قۇرۋ باعدارىن قولداپ، داۋىس بەرگەن ەدى. وسى ۋاقىت ىشىندە ەلىمىزدىڭ قوعامدىق-ساياسي ومىرىنە جانە ەكونوميكاسىنا اسەر ەتكەن ايتارلىقتاي وزگەرىستەر بولدى. بيلىكتىڭ بارلىق تارماقتارى قايتا جاڭعىرتىلدى. ساياسي جۇيەنى دەموكراتيالاندىرۋ جولىندا ماڭىزدى قادامدار جاسالدى. تەجەمەلىك پەن تەپە-تەڭدىك جۇيەسى كۇشەيە ءتۇستى. وڭىرلەردىڭ دەربەستىگى دە نىعايىپ كەلەدى. اكىمشىلىك رەفورما ىسكە اسىرىلا باستادى، - دەپ اتاپ ءوتتى ماۋلەن اشىمبايەۆ.
سونداي-اق ول سايلاۋ جۇيەسى دە جاڭارتىلىپ، سونىڭ نەگىزىندە ءماجىلىس جانە بارلىق دەڭگەيدەگى ءماسليحاتتار سايلاۋى وتكەنىن، اۋداندار مەن اۋىل اكىمدەرىنىڭ سايلاۋى دا جاڭا تالاپتارعا سايكەس وتكىزىلىپ جاتقانىن العا تارتتى.
حالىقتىڭ ءال-اۋقاتىن جاقسارتۋ جانە ءومىر ءسۇرۋ ساپاسىن ارتتىرۋ باعىتىندا دا اۋقىمدى جۇمىس اتقارىلدى. الەۋمەتتىك ساياساتتىڭ تيىمدىلىگىن ارتتىرۋ ءۇشىن ارنايى الەۋمەتتىك كودەكس قابىلداندى. «جايلى مەكتەپ»، «اۋىلدا دەنساۋلىق ساقتاۋدى جاڭعىرتۋ»، «اۋىل اماناتى» سياقتى ۇلتتىق جوبالار جۇيەلى تۇردە ىسكە اسىرىلىپ كەلەدى. كەلەسى جىلدان باستاپ «ۇلتتىق قور – بالالارعا» پرەزيدەنتتىك باعدارلاماسى اياسىندا تولەمدەر تولەنە باستايدى.
ءقازىردىڭ وزىندە ادىلەتتى ەكونوميكالىق جۇيە قۇرۋ باعىتىنداعى جۇمىستاردىڭ ناقتى ناتيجەلەرىن كورىپ وتىرمىز. مونوپوليامەن جانە سىبايلاس جەمقورلىقپەن قاتاڭ كۇرەس قارقىندى جۇرگىزىلىپ جاتىر. جالپى سوماسى 1 ترلن تەڭگە بولاتىن زاڭسىز يەمدەنىلگەن اكتيۆتەر جانە شامامەن 8 ملن گەكتار پايدالانىلماي جاتقان جەر مەملەكەتكە قايتارىلدى. شاعىن جانە ورتا بيزنەستى قولداۋعا ارنالعان جۇيەلى شارالار قولعا الىندى»، - دەپ ءتىزدى ول ودان ءارى اتقارىلىپ جاتقان جۇمىستاردى.
وسى ورايدا ەل ەكونوميكاسىنا شەتەلدىك ينۆەستيسيالاردى تارتۋدىڭ بەلسەندى جالعاسىپ كەلە جاتقانى دا تىلگە تيەك ەتىلدى. سىرتقى ساۋدانىڭ ءوسۋ قارقىنى ارتىپ وتىر. سپيكەردىڭ ايتۋىنشا، وسىنداي شارالاردىڭ ارقاسىندا 2023 جىلدىڭ قورىتىندىسى بويىنشا ەل ەكونوميكاسىنىڭ ءوسۋى 5 پايىز كولەمىندە بولادى دەپ بولجانىپ وتىر.
مۇنداي ناتيجەلەر پرەزيدەنتىمىزدىڭ باستاماسىمەن ىسكە اسىرىلىپ جاتقان رەفورمالاردىڭ تيىمدىلىگىن ايقىن كورسەتەدى. وسىلايشا، ءبىر جىلدا كوپ جۇمىس ىستەلدى. الدا ءالى تالاي اۋقىمدى مىندەتتەر تۇر. مەملەكەت باسشىسى 2029 جىلعا قاراي ەلدىڭ جالپى ىشكى ءونىمىن 2 ەسە ۇلعايتۋدى، ياعني 450 ملرد دوللارعا جەتكىزۋدى مىندەت ەتىپ بەلگىلەپ بەردى. سونداي-اق ەكونوميكانى ءارتاراپتاندىرۋ، وڭدەۋ ونەركاسىبىن دامىتۋ، اۋىل شارۋاشىلىعىنىڭ ونىمدىلىگى مەن تيىمدىلىگىن ارتتىرۋ، ەلىمىزدىڭ بارلىق وڭىرىندە ينفراقۇرىلىمدى جاڭعىرتۋ جانە قازاقستاندىقتاردىڭ ءال-اۋقاتىن ودان ءارى جاقسارتۋ سياقتى ستراتەگيالىق مەجەلەر بار.
وسىنداي ماقسات-مىندەتتەردى ناتيجەلى ىسكە اسىرۋ ءۇشىن قازاقستاندىقتاردىڭ الداعى ۋاقىتتا دا پرەزيدەنتىمىز قاسىم-جومارت كەمەل ۇلى توقايەۆتىڭ ساياساتىن قولداپ، مەملەكەت باسشىسىنىڭ توڭىرەگىنە توپتاسۋى اسا ماڭىزدى. «بىرلىگى بەكەم ەل بيىكتى باعىندىرادى» دەيدى. شىن مانىندە ءبىز ادىلەتتى، جاڭارعان، ينكليۋزيۆتى جانە دەموكراتيالىق قازاقستان قۇرۋ جولىندا جۇدىرىقتاي جۇمىلا بىلسەك، كوزدەگەن ماقساتتارىمىزعا قول جەتكىزەمىز»، - دەپ تۇيىندەدى ءسوزىن سەنات ءتوراعاسى.