كۇننىڭ كوزى نۇرىن توگىپ، اينالاڭ جاسىل كىلەمگە ورانعان شاقتا اعاشتىڭ ساياسىندا دەمالىپ، ساياباق ارالاپ، سەرۋەن قۇرعانعا نە جەتسىن، شىركىن؟!
اتىن اتاپ، ءتۇسىن تۇستەمەسەك تە، قازىرگى ۋاقىتتا الماتىنىڭ ساياباقتارى قالا تۇرعىندارىنىڭ سۇيىكتى دەمالىس ورنىنا اينالدى دەۋگە بولادى. ويتكەنى، قالانىڭ قاي جاعىنا بارساڭىز دا ءدال وسى كورىنىستى كورەسىز.
جاسىل جەلەك جامىلعان سايالى باقتا ادام قاراسى كەشكە قاراي كوبەيە تۇسەدى. بۇل مەكەن، اسىرەسە، تىنىشتىقتى جانى سۇيەتىن، ءبىر مەزگىل بوي سەرگىتىپ، تازا اۋامەن تىنىستاعىسى كەلەتىندەر ءۇشىن تاپتىرماس ورىن. سەبەبى، مۇنداعى قۇستاردىڭ سايراعان ءۇنى مەن سۋبۇرقاقتان ەسكەن سالقىن لەپ جانىڭدى سەرگىتەدى. ساياباق ىشىندەگى ورىندىقتارعا جايعاسقان جاستار دا، اڭگىمە-دۇكەن قۇرىپ وتىرعان قاريالار دا جاپ-جاسىل باقتىڭ جايلىلىعىن بىلدىرەدى. ال كىشكەنتاي بالعىنداردىڭ ويىنشىق كولىكتەرىمەن ىزعىتىپ جۇرگەنى، ولاردىڭ الاڭسىز كۇلكىسى ساياباق ءسانىن ەسەلەي تۇسكەن...
الماتىدا بارلىعى 211 ساياباق اۋماعى بار. اۋدانى 631،2 گا قۇرايتىن جاسىل ايماقتىڭ ىشىندە 12ء-سى ساياباق، 124ء-ى سكۆەر، 21ء-ى بۋلۆار، 10 جاعالاۋ، 13 جاسىل ايماق، 31ء-ى جاياۋ جۇرگىنشى ايماعىنا جاتادى.
الماتى قالاسى ەكولوگيا جانە قورشاعان ورتا باسقارماسى ماماندارىنىڭ ايتۋىنشا، بوي كوتەرگەن ساياباقتار اۋدانداردىڭ بالانسىنا بەرىلەدى، ياعني جاۋاپكەرشىلىك ساياباق ورنالاسقان اۋدان اكىمدىكتەرىنىڭ قۇزىرىندا بولادى. حالىقتىڭ جايلى دەمالىسىن قامتاماسىز ەتۋ ماقساتىندا وتكەن جىلى قالادا ورنالاسقان جالپى اۋماعى 87،9 گا قۇرايتىن 10 ساياباققا قۇرىلىس-جوندەۋ جۇمىستارىن جۇرگىزدى. سولاردىڭ قاتارىندا ساۋلەتى مەن تاريحي كەلبەتىن ساقتاي وتىرىپ، مەملەكەتتىك مۇراجاي مەن وقۋشىلار سارايىنىڭ جانىنداعى تىنىمباقتار، ءاليا – مانشۇك، اەروپورت داڭقى، قازاق–بريتان ۋنيۆەرسيتەتى تىنىمباقتارى، بايسەيىتوۆا كوشەسىندە ورنالاسقان تىنىمباقتار قايتا جاڭعىرتۋدان ءوتتى. ناتيجەسىندە سەرۋەن قۇراتىن ايماقتارى، بالالار ويىنى مەن سپورت الاڭدارى بار، جاسىل اۋماقتار ەل يگىلىگىنە ۇسىنىلدى.
بۇل ءۇردىس بيىل دا جالعاسىن تاۋىپ، الاتاۋ، ناۋرىزباي، تۇركسىب، مەدەۋ مەن بوستاندىق اۋداندارىن قامتيتىن جاسىل ايماقتار قاتارى كوبەيە تۇسپەك.
ساياباقتاردى ارالاپ ءجۇرىپ، تۇرعىندارمەن دە تىلدەستىك.
– جازدىڭ اپتاپ ىستىعىندا جانعا سايا. جەرگە شانشىلعان اعاشتار ەتەك جايىپ جايقالىپ تۇرعان سوڭ تىنىسىڭ اشىلادى. ءبىزدى تانىستىرعان دا، تابىستىرعان دا وسى ساياباق. جولداسىمىز ەكەۋمىز وسىندا تانىسقانبىز. سوندىقتان بولار، وتباسىمىزبەن وسى ساياباقتا كوپ سەرۋەندەيمىز. جاستىعىمىزعا كۋا بولعان بۇل مەكەننىڭ بۇگىنگى كوركى كوز تويارلىق. بارلىق جاعداي جاسالعان. الماتى وسىنداي جاسىل جەلەگىمەن دە ەرەكشە عوي، – دەيدى بالالارىمەن سەرۋەندەپ جۇرگەن سىمبات ەسىمدى كەلىنشەك.
ءيا، قالاي دەسەك تە، ساياباقتار قالانىڭ ءسانى ەكەنى راس. سوندىقتان ءسىز بەن بىزگە جايلىلىق سىيلايتىن وسىنداي دەمالىس ورىندارىن كۇتىپ ۇستاۋ، ول جەردىڭ تازالىعىن ساقتاۋ تەك جاۋاپتى مەكەمەلەرگە عانا ەمەس، سونىمەن قاتار تۇرعىندارعا دا جۇكتەلگەن جاۋاپتى ءىس ەكەنىن ۇمىتپاساق بولعانى.