قالانىڭ دەنساۋلىق ساقتاۋ جۇيەسىنىڭ تيىمدىلىگىن ارتتىرۋ – باستى مىندەتتەردىڭ ءبىرى.
الماتى اكىمى باقىتجان ساعىنتايەۆ قالا اكتيۆىنىڭ وتىرىسىندا مەملەكەت باسشىسىنىڭ جولداۋىن ىسكە اسىرۋ ماسەلەلەرى بويىنشا ەپيدەميولوگيالىق احۋالدى تۇراقتاندىرۋ جانە قالانىڭ دەنساۋلىق ساقتاۋ جۇيەسىن دامىتۋ شارالارى تۋرالى ايتتى، دەپ حابارلايدى Almaty-akshamy.kz
قاسىم-جومارت توقايەۆ حالىققا جولداۋىندا كۆي پاندەمياسىمەن كۇرەسۋ، ەڭ الدىمەن حالىقتى ۆاكسينالاۋ جانە پروفيلاكتيكالىق ەكپەنىڭ ۇلتتىق كۇنتىزبەسىن ورىنداۋ مىندەتتەرىن قويدى.
الماتىدا 200-گە جۋىق ەكپە پۋنكتتەرى بار. ءقازىردىڭ وزىندە ءبىرىنشى كومپونەنتپەن 875 مىڭ ادام، ەكىنشىسىمەن 748 مىڭ ادام ۆاكسينالاندى.
ۆاكسينالاردىڭ ۇزدىكسىز جەتكىزىلۋى قامتاماسىز ەتىلدى. قالاعا بارلىعى 992 مىڭ دوزا اكەلىندى. باقىتجان ساعىنتايەۆ تۇرعىندار اراسىندا يممۋندىق قاباتتى قالىپتاستىرۋ بويىنشا جۇمىستى جالعاستىرۋدى تاپسىردى.
الماتى اكىمى كوروناۆيرۋستىق ينفەكسيانىڭ تارالۋ ديناميكاسى تۋرالى ايتا كەلىپ، احۋالدىڭ تۇراقتانا باستاعانى تۋرالى حابارلادى.
«قابىلدانعان شارالاردىڭ ناتيجەسىندە الماتىدا سانيتارلىق-ەپيدەميولوگيالىق احۋال تۇراقتانا باستادى. دەرت دەڭگەيىنىڭ تەندەنسياسى تومەندەۋدە. بۇگىندە ءبىز الماتىلىقتاردىڭ تاۋلىكتىك جۇقتىرۋ دەڭگەيىنىڭ وتكەن اپتالارمەن سالىستىرعاندا 300 ادامعا ازايعانىن بايقادىق»، - دەدى باقىتجان ساعىنتايەۆ.
سونىمەن قاتار، جەدەل جاردەمگە قوڭىراۋ شالۋ سانى كۇنىنە 4 مىڭنان 2،4 مىڭعا دەيىن ازايدى. ناۋقاستاردى اۋرۋحاناعا جاتقىزۋ كورسەتكىشى دە ەكى ەسە تومەندەدى: ءتورتىنشى تولقىننىڭ شارىقتاۋ شەگىندەگى 800-دەن 400-گە جۋىق ادامعا دەيىن. بۇگىندە 9 مىڭعا جۋىق توسەك-ورىن قولدانىستا، تاعى ءبىر مىڭى رەزەرۆتە. ينفەكسيالىق توسەك-ورىنداردىڭ پايدالانىلۋى 55%-دى، رەانيماسيادا 54%-دى قۇرايدى. ەگەر بۇرىن ۇيدەگى ستاسيوناردا 14،5 مىڭ ادام بولسا، ءقازىر ولاردىڭ سانى 9،8 مىڭ.
«دەگەنمەن، اۋىر زارداپتار مەن ولىمگە اكەلەتىن جاڭا ىندەتتەر ءقاۋپى ءالى دە بار. سوندىقتان ينفەكسيانىڭ الدىن الۋ، ەپيدەميولوگيالىق زەرتتەۋلەر جۇرگىزۋ، جۇقتىرۋدىڭ جاپپاي تىزبەگىن بولدىرماۋ ستراتەگيالىق مىندەت بولىپ قالا بەرەدى»، - دەپ اتاپ ءوتتى الماتى اكىمى.
ول مەديسينالىق قىزمەتتەردىڭ بارلىق سپەكترىندەگى ساپالى قىزمەتتىڭ ماڭىزىن قاداپ تۇرىپ ايتتى. امساك جۇيەسى سكرينينگتىك جانە پروفيلاكتيكالىق تەكسەرۋلەردى جالعاستىرۋى ءتيىس.
باقىتجان ساعىنتايەۆ قالانىڭ دەنساۋلىق ساقتاۋ جۇيەسىنىڭ ينفراقۇرىلىمىن جاقسارتۋ جۇمىستارى جالعاسا بەرەتىنىن ايتتى. سوڭعى ەكى جىلدا، پاندەمياعا قاراماستان، ەكى مودۋلدىك اۋرۋحانا مەن 1080 توسەك ورىندى ينفەكسيالىق اۋرۋحانانىڭ فيليالى سالىندى. قالاداعى 18 ءىرى اۋرۋحانادا وتتەگى ستانسيالارى ورناتىلدى. كارىزدىك اعىندار مەن مەديسينالىق قالدىقتاردى زالالسىزداندىرۋ جۇيەلەرى جاڭاردى.
انا مەن بالانىڭ دەنساۋلىعىن قورعاۋ ءۇشىن تيپتىك قابىلداۋ ءبولىمى جانە تازا بولمەلەر كەشەنى ءارى زاماناۋي وپەراسيالىق بلوگى، رەانيماسيا ءبولىمى بار قۇرىلىس جوباسى ازىرلەنۋدە. سونداي-اق، جاڭا دارىگەرلىك امبۋلاتوريالىق-ەمحانالىق مەكەمەلەر سالۋ جوسپارى جاسالدى.
«اكىمدىككە قاراستى قالانىڭ مەديسينالىق ۇيىمدارىندا 19 مىڭنان استام مەديسينا قىزمەتكەرلەرى جۇمىس ىستەيدى. مەديسينالىق كادرلاردىڭ تاپشىلىعىن ازايتۋ ءۇشىن جول كارتاسى جۇزەگە اسىرىلۋدا، 120 رەزيدەنتتى وتە تاپشى مەديسينالىق ماماندىقتار بويىنشا وقىتۋ ءۇشىن جەرگىلىكتى بيۋدجەتتەن قارجى ءبولىندى»، - دەدى باقىتجان ساعىنتايەۆ.