5 قىركۇيەكتە الماتى مۋزەيىندە قالا كۇنى اياسىندا التىنبەك قورازبايەۆتىڭ 75 جاسقا تولۋىنا وراي «ساعىندىم الماتىمدى» كورمەسىنىڭ سالتاناتتى اشىلۋى وتەدى، دەپ حابارلايدى Almaty-akshamy.kz.
قازاقستان رەسپۋبليكاسىنىڭ (1993 ج.)، قىرعىزستان رەسپۋبليكاسىنىڭ (1994 ج.) حالىق ءارتىسى، ءتۇرلى وردەندەر مەن ماراپاتتاردىڭ يەسى، وتاندىق مادەنيەت سالاسىنىڭ ماقتانىشى التىنبەك قورازبايەۆ تىڭدارمانداردىڭ شىنايى ىقىلاسىنا بولەنگەن جان.
بۇگىندە جالپاق قازاق، ىرگەلەس جاتقان قىرعىز، وزبەك حالىقتارىنا ەسىمى، شىعارماشىلىق جولى جاقسى تانىس التىنبەك قورازبايەۆ انشى-كومپوزيتور عانا ەمەس، سوڭىنان شاكىرت ەرتىپ، باۋلىپ كەلە جاتقان، ونەردەگى مەكتەبىن دە قالىپتاستىرعان ۇستاز. ول جەتىسۋ ءان ونەرى مەكتەبىنىڭ ۇلى ءداستۇرىن جالعاستىرىپ، دامىتۋشى، ىزدەنىمپاز ءارى تالعامپاز، ەڭبەكقور، شىعارماشىل تۇلعا.
كورمەدە التىنبەك قورازبايەۆتىڭ جەكە زاتتارى مەن فوتوقۇجاتتارى، دوستارى مەن ارىپتەستەرىنەن كەلگەن سىيلىقتارى، ساحنالىق كوستيۋمدەرى، الماتى مۋزەيى قورىنان فوتوقۇجاتتار ۇسىنىلادى.
كورمەنىڭ سالتاناتتى اشىلۋىنىڭ قوناقتارى: الماتى قالاسى مادەنيەت باسقارماسى وكىلدەرى، شىعارماشىلىق ينتەلليگەنسيا وكىلدەرى، ونەر قايراتكەرلەرى، ب ا ق جانە باسقالار.
وتەتىن ورنى مەن ۋاقىتى: الماتى ق.، قابانباي باتىر ك.، 132
باستالۋى: ساع 15.00-دە.