وسكەمەندە حالىق قاھارمانى، تاۋەلسىز قازاقستاننىڭ تۇڭعىش قورعانىس ءمينيسترى، ارميا گەنەرالى ساعادات نۇرماعامبەتوۆكە ارنالعان مونۋمەنت پەن گۇل باعى اشىلدى، دەپ حابارلايدى Almaty-Akshamy.kz Inform.kz-كە سىلتەمە جاساپ.
ساعادات قوجاحمەت ۇلى نۇرماعامبەتوۆ قارۋلى كۇشتەردىڭ قالىپتاسۋى مەن دامۋىنا ولشەۋسىز ۇلەس قوسقان دارىندى مەملەكەت قايراتكەرى جانە مىقتى قولباسشى رەتىندە ەلدىڭ ەسىندە قالعان اڭىز ادام.
ەسكەرتكىشتىڭ اشىلۋ سالتاناتىنا شىعىس قازاقستان وبلىسىنىڭ اكىمى دانيال احمەتوۆ، قورعانىس ءمينيسترىنىڭ ورىنباسارى، گەنەرال-لەيتەنانت رۋسلان شپەكبايەۆ، وسكەمەن گارنيزونىنىڭ اسكەري قىزمەتشىلەرى، قارۋلى كۇشتەردىڭ ارداگەرلەرى، قوعام وكىلدەرى، سونداي-اق باتىردىڭ نەمەرەسى ليرا نۇرماعامبەتوۆا قاتىستى.
«ۇلى دالامىز ءارقاشان قاۋىپسىزدىكتى سەنىمدى قامتاماسىز ەتىپ، قاھارماندىق پەن ءپاتريوتيزمدى پاش ەتەتىن لايىقتى باتىر ۇلدارىمەن ايگىلى. جاستارىمىز ساعادات قوجاحمەت ۇلى نۇرماعامبەتوۆ سياقتى باتىرلاردى ۇلگى تۇتىپ ءوسۋى ءتيىس. سول سەبەپتى دە، ءبىز ءۇشىن ۇرپاقتار ساباقتاستىعى اسا ماڭىزدى»، - دەدى رۋسلان شپەكبايەۆ.
ەكىنشى دۇنيەجۇزىلىك سوعىس جىلدارىندا ساعادات نۇرماعامبەتوۆ كراسنودار ولكەسىن، ۋكراينانى، مولداۆيانى، باتىس بەلورۋسسيا مەن پولشانى ازات ەتۋگە قاتىستى. پولشا اۋماعىندا جاۋدىڭ قورعانىسىن بۇزىپ وتۋدە قولباسشىلىقتىڭ جاۋىنگەرلىك تاپسىرمالارىن بۇلجىتپاي ورىنداعانى، سونىمەن بىرگە كورسەتكەن ەرلىگى مەن قاھارماندىعى ءۇشىن وعان كەڭەس وداعىنىڭ باتىرى اتاعى بەرىلدى.
«تاۋەلسىزدىك تاڭىندا ساعادات نۇرماعامبەتوۆ جاس مەملەكەتتىڭ قارۋلى كۇشتەرىن قۇرىپ، قورعانىس قابىلەتىن نىعايتتى. ەلىمىزدە اسكەر بولماعان كەزەڭدە وراسان زور بەدەلى مەن كاسىبي شەبەرلىگىنىڭ ارقاسىندا كوماندالىق قۇرامدى، تەحنيكالىق بازانى ساقتاپ، قارۋلى كۇشتەردىڭ قۇرىلىمىن قالىپتاستىرىپ، اسكەري قىزمەتشىلەردىڭ پاتريوتتىق رۋحىن كوتەرە الدى»، - دەدى دانيال احمەتوۆ.