پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ايەلدەردىڭ دەنساۋلىعىن قورعاۋ ماسەلەلەرىن جانە انا مەن بالا ءولىمىنىڭ پروبلەمالارىن قارادى، دەپ حابارلايدى Almaty-akshamy.kz Inform.kz-كە سىلتەمە جاساپ.
ۇلتتىق كوميسسيانىڭ ساراپتامالىق مونيتورينگتىك توبى وڭىرلەرگە بارىپ، وسى ماسەلەلەردىڭ جاي-كۇيىن ەگجەي-تەگجەيلى زەردەلەپ، ءوز باعالارى مەن ۇسىنىمدارىن جەتكىزگەن.
ۇلتتىق كوميسسيا وتىرىسىنا ساراپشىلار قاۋىمداستىعىنىڭ وكىلدەرى، وڭىرلەر اكىمدەرىنىڭ ورىنباسارلارى، ورتالىق مەملەكەتتىك ورگانداردىڭ باسشىلارى قاتىستى.
وتىرىسقا قاتىسۋشىلار الدىندا ۇلتتىق كوميسسيا ءتوراعاسى، پرەزيدەنت اكىمشىلىگى باسشىسىنىڭ ورىنباسارى ايدا بالايەۆا انا مەن بالا دەنساۋلىعىن قورعاۋ - مەملەكەتتىك ساياساتتىڭ ماڭىزدى باعىتى ەكەنىن اتاپ ءوتتى. بۇل ماسەلەنىڭ جالپىۇلتتىق ماڭىزى بار جانە مەملەكەت ىسكە اسىرىپ جاتقان الەۋمەتتىك-ەكونوميكالىق جانە ەمدەۋ-پروفيلاكتيكالىق شارالار كەشەنىن ءتيىمدى ۇيلەستىرۋدى تالاپ ەتەدى.
«انا مەن بالانى قورعاۋ ماسەلەلەرى جوعارى وزەكتىلىگىن ساقتاپ وتىر. جەرگىلىكتى جەرلەردە ينفراقۇرىلىمنىڭ قولجەتىمدىلىگىن كەڭەيتۋ، تاۋەكەل توپتاردىڭ حاباردار بولۋى، ۋاكىلەتتى ورگانداردىڭ جاۋاپكەرشىلىگىن ارتتىرۋ تالاپ ەتىلەدى. انا مەن بالا ءولىمىنىڭ الدىن الۋ كەشەنىن قالىپتاستىرۋعا جاڭا تاسىلدەر ەنگىزۋ، وسى ماسەلەلەردى زەرتتەۋگە قوعامدىق ۇيىمداردىڭ رەسۋرستارىن، عالىمدار مەن ساراپشىلاردى بەلسەندى تارتۋ ماڭىزدى. جۇكتىلىكتى جۇرگىزۋ جانە انانى قولداپ وتىرۋ پروسەستەرىندە تاۋەكەلدەردى انىقتاۋ جانە الدىن الۋ جۇيەسىن جەتىلدىرۋ قاجەت»، - ايدا بالايەۆا.
وڭىرلەردەگى مونيتورينگتىك ساراپتاما توبىنىڭ جۇمىسىن سەناتور ءلاززات سۇلەيمەن باسقاردى.
ۇلتتىق كوميسسيا وتىرىسىندا ءسوز سويلەگەن ول بوساناتىن ايەلدەر مەن جاڭا تۋعان نارەستەلەر اراسىنداعى ءولىم-جىتىمنىڭ ءوسۋىنىڭ نەگىزگى تەندەنسيالارىن اتاپ ءوتتى. سەناتور وڭىرلەردەگى پەرزەنتحانالارعا، پەريناتالدىق ورتالىقتارعا بارىپ، قاتارداعى دارىگەرلەرمەن جانە بوساناتىن ايەلدەردىڭ وزدەرىمەن تىكەلەي بايلانىس جاساۋ بارىسىندا وسى ماسەلەلەردى ەگجەي-تەگجەيلى زەردەلەگەن ساراپشىلاردىڭ جۇمىسىنا توقتالدى.
اكۋشەرلىك، گينەكولوگيا جانە پەريناتولوگيا سالاسىنداعى ساراپشى زاۋرەش امانجولوۆا امبۋلاتوريالىق جانە ستاسيونارلىق كومەكتىڭ وڭ جانە كەيبىر پروبلەمالىق ماسەلەلەرىن اڭگىمەلەدى.
س. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ بالالار اۋرۋلارى كافەدراسىنىڭ پروفەسسورى، نەوناتولوگ نيشانكۇل بوجبانبايەۆا نارەستەلەر ءولىمىن تومەندەتۋ بويىنشا ناقتى ۇسىنىستار جاسادى.
دەنساۋلىق ساقتاۋ ءمينيسترى اجار عينيات اعىمداعى جاعداي مەن وسى سالاداعى جۇمىس جۇيەسىن جەتىلدىرۋ شارالارى تۋرالى باياندادى.
ايتىلعان باياندامالار مەن پىكىرلەردى ەسكەرە وتىرىپ، وتىرىسقا قاتىسۋشىلار انا مەن بالانى قورعاۋ ساياساتىن قايتا جۇكتەۋ، ورتالىق جانە وڭىرلىك دەڭگەيلەردە قابىلداناتىن شارالاردى جەتىلدىرۋ قاجەتتىلىگى تۋرالى پىكىر ءبىلدىردى.
ۇلتتىق كوميسسيا باسشىسى دەنساۋلىق ساقتاۋ مينيسترلىگىنە ساراپشىلار ايتقان ەسكەرتۋلەر مەن ۇسىنىستاردى ەسكەرۋدى تاپسىردى.
انا مەن بالا ءولىمىن ازايتۋ جونىندەگى رەسپۋبليكالىق جانە جەرگىلىكتى شتابتاردىڭ جۇمىسىن جانداندىرۋ قاجەتتىگى ايتىلدى، ونى دەنساۋلىق ساقتاۋ ءمينيسترى مەن وڭىرلەردىڭ اكىمدەرى باسقارۋعا ءتيىس.
ا.بالايەۆا شالعاي ەلدى مەكەندەردە بوساناتىن ايەلدەر ءۇشىن قولايلى ورتا مەن ءتيىمدى ينفراقۇرىلىم قۇرۋ قاجەت ەكەنىن اتاپ ءوتتى.
سونداي-اق، فەلدشەرلىك-اكۋشەرلىك پۋنكتتەر مەن دارىگەرلىك امبۋلاتوريالارداعى مەديسينالىق پەرسونال تاپشىلىعى ماسەلەسىن مەديسينالىق جوعارى وقۋ ورىندارىنىڭ تۇلەكتەرىن ماقساتتى ءبولۋ ارقىلى شەشۋ مىندەتى قويىلدى.
دارىگەرلەردىڭ كاسىبي ءوسۋى ءۇشىن جاعدايلاردى قامتاماسىز ەتۋدىڭ ماڭىزدىلىعى جانە ونىڭ بوساندىرۋ كەزىندەگى دارىگەرلىك قاتەلىكتەردىڭ ءقاۋپىن ازايتۋعا اسەرى ەرەكشە اتاپ ءوتىلدى.
دەنساۋلىق ساقتاۋ مينيسترلىگىنە قارجى مينيسترلىگىمەن جانە اكىمدىكتەرمەن بىرلەسىپ، ناقتى شىعىنداردى ەسكەرە وتىرىپ، بوساندىرۋ قىزمەتتەرىنە تاريفتەردى ارتتىرۋ مۇمكىندىگىن قاراستىرۋ تاپسىرىلدى.
ۇلتتىق كوميسسياعا وڭىرلىك دەڭگەيدە انا مەن بالانى قورعاۋ سالاسىنداعى ەگجەي-تەگجەيلى مونيتورينگتى جالعاستىرۋ جانە بەلگىلەنگەن مىندەتتەردى شەشۋ بارىسىنا قوعامدىق باقىلاۋدى جۇزەگە اسىرۋ جۇكتەلدى.