كەز كەلگەن ادام، مەيلى ول ۇلكەن نە كىشى بولسىن، تاڭەرتەڭ ۇيىنەن ءبىرى – جۇمىسقا، ەكىنشىسى – ساباققا نە بالاباقشاعا شىعادى. ال كەشكە ءبارى سول جىلى ۇياسىنا، ياعني وتباسىنا ورالادى. بىر-بىرىمەن قايتا قاۋىشادى. بۇگىنگى كۇندەرىنىڭ قالاي وتكەنىن بىر-بىرىنە جارىسا اڭگىمەلەپ، قىزىقتارىمەن ءبولىسىپ جاتادى. ءبارىمىزدى قۇشاعىنا سىيدىرىپ تۇراتىن وتباسىمىزدىڭ بولعانى قانداي عاجاپ! سوندىقتان دا وتباسى – قاستەرلى ۇعىم. ول – ءبارىمىزدىڭ جۇرەگىمىزگە ەڭ جاقىن اياۋلى ءسوز.
الەم جۇرتشىلىعىنا «تەمىر حانىم» اتانىپ كەتكەن ايگىلى ايەل، 1979–1990 جىلدارى ۇلىبريتانيانىڭ پرەمەر-مينيسترى بولىپ، ۇنەمى ات ۇستىندە جۇرگەن مارگارەت تەچەردەن ءبىر ارىپتەسىمىز «ومىردەگى ەڭ ۇلكەن جەتىستىگىڭىز نە؟» دەپ سۇراعاندا، ول ەش ويلانباستان «وتباسىن قۇرىپ، انا بولعانىم» دەگەن ەكەن. دەمەك، دۇركىرەگەن قىزمەت تە، جەر-جاھانعا جايىلعان اتاق-داڭق تا وتباسىنىڭ جانىندا ەشتەڭە ەمەس.
وتباسى – ماحاببات پەن مەيىرىمنىڭ، قۋانىش پەن مەرەكەنىڭ ۇياسى. ونى شۋاققا بولەيتىن، ارينە، بالالاردىڭ ۋ-شۋى، رياسىز كۇلكىسى. سول بالالار جىلى ۇياسىنان قاناتىن قاتايتادى، بۋىنىن بەكىتەدى. اتا-اناسىنىڭ كورسەتىپ بەرگەن جولىمەن ۇلكەن ومىرگە ساپار شەگەدى. جاقسى بالا سول جاقسىلىقتى كەيىن ەسەلەپ قايتارادى، العان ۇلاعاتىن اتا-اناسىنا، باۋىرلارىنا، اعايىن-تۋىسىنا، قالا بەردى ەلىنە كورسەتەدى. وتباسى – مەملەكەتتىڭ ۋىعى.
كەشە الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى مەن الماتى قالاسى پوليسيا دەپارتامەنتى جەرگىلىكتى پوليسيا قىزمەتى باسقارماسى ايەلدەردى زورلىق-زومبىلىقتان قورعاۋ بولىمشەسىنىڭ قولداۋىمەن «داعدارىس ورتالىقتارىنىڭ وداعى» زتب، كوپبالالى «باقىتتى وتباسى» ورتالىقتارى جانە «جانسايا» داعدارىس ورتالىعى «وتباسى – باقىت مەكەنى» اتتى وتباسىلىق بايقاۋ وتكىزدى. وعان الماتى قالاسىنىڭ اۋداندارىنان كوپبالالى وتباسىلار قاتىستى. بەرەكەلى دە مەرەكەلى شاڭىراقتارعا الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى دانيار الكەباي ۇلى ىزگى لەبىزىن ارناپ، ساتتىلىك تىلەدى.
مەدەۋ اۋدانىنان «ارمان» دەگەن اتپەن قاتىسقان 4 بالالى وتباسىنىڭ وتاعاسىسى نۇرجان ارمان – ەڭبەكقور جان. سپورتتى سەرىك ەتەدى. وتاناسى – مايگۇل قولىنان ءتۇرلى ءىس كەلەتىن ونەرلى ايەل، ياعني پروگرامميست، ماسساجيست، شاشتاراز. ال بالاپاندارى – كۇرەس، تاۋ شاڭعىسى، شاحمات جانە گيمناستيكاعا قاتىسادى. بي بيلەپ، سۋرەت سالىپ، ءان دە ايتادى. ساحاناعا 4 بالا دا ءتۇرلى مەدالدارىن تاعىپ شىققاندا، كوزىمىز ءسۇيسىندى.
جەتىسۋ اۋدانىنان كەلگەن «اسانوۆتار وتباسى» دا 4 بالا تاربيەلەپ وتىر. وتاعاسى سەرعالي قاليبايەۆ – قولى شەبەر قۇرىلىسشى، وتاناسى مەرۋەرت – ۇلاعاتتى ۇستاز. بالالارى ءبىلىم جاعىنان دا، ونەر جاعىنان دا مەكتەبىنىڭ ماقتانىشى.
اۋەزوۆ اۋدانىنىڭ اتىنان قاتىسقان «ابدراحمانوۆتار وتباسى» 5 بالا تاربيەلەپ وتىر. ءۇي يەسى اشير ابدراحمانوۆ – اسكەري قىزمەتكەر. قىزمەتىنە ساي قاتال ءتارتىپتىڭ ادامى بولسا دا، جۇرەگى نازىك، ءان سالاتىن ونەرى بار. ال وتاناسى قارشىعا زاماناۋي ماسساج تۇرلەرىن جاسايدى. بالالارى دا اتا-اناسىنا ۇقساعان ونەرلى. ۇلدارى دزيۋدو، فۋتبول، بوكسپەن اينالىسىپ، قىزدارى ءان سالىپ، بي بيلەيدى.
المالى اۋدانىنان «تەمىرجاندار اۋلەتى» كەلدى. وتاعاسى اۋعان سوعىسىنىڭ ارداگەرى بولعان. وتە ىنتىماقتى وتباسى. وتاناسى – قالجان جۇماباي قىزى ۇلاعاتتى ۇستاز، قازىرگى تاڭدا تەمىرجول سالاسىنىڭ قىزمەتكەرى. ءان سالادى. 4 بالاسىنىڭ وتە مەيىرىمدى بولىپ ءوسىپ كەلە جاتقانىنا سەنىمدى.
ناۋرىزباي اۋدانىنان قاتىسقان 4 بالالى «التايەۆتار وتباسى» دا سالاۋاتتى ءومىر سالتىن ۇستانادى. وتاعاسى – ولجاس ىڭكاربەكوۆ ينجەنەر-قۇرىلىسشى، وتاناسى التىنحان – اق حالاتتى ابزال جان. بۇل وتباسىنىڭ بالالارى دا ونەردەن قۇرالاقان ەمەس.
تۇركسىب اۋدانىنىڭ اتىنان شىققان 6 بالالى «مۋسابايەۆتار اۋلەتى» – قولونەردى وتباسىلىق بيزنەسكە اينالدىرىپ، ۇلتتىق ناقىشتى بالالارىنا دا ۇلگى ەتىپ وتىرعان ەڭبەكقور وتباسى. وتاعاسى پويىز ءماشينيسى بولىپ ەڭبەك ەتەدى. ال وتاناسى – كۇلسارا بالاباقشا مەڭگەرۋشىسى. بالالارى دومبىرانى، سپورتتى، ونەردى سۇيەدى.
الاتاۋ اۋدانىنان كەلگەن «ومىربەكتىڭ وتباسىندا» سۇپ-سۇيكىمدى 5 بالا ءوسىپ كەلەدى. ولار دا بىر-بىرىنە باۋىرمال. ءان سالادى، سپورت ۇيىرمەلەرىنە قاتىسادى. وتاعاسى – ەرىك سالماقتى، سابىرلى. ال كەلىنشەگى جانارگۇلدىڭ جانى جايساڭ جايدارلى جان.
ءار اۋداننان سۋىرىلىپ شىققان وتباسىلار «وتباسى ۇستانىمى»، «ءسالت-داستۇر ساباقتاستىعى» جانە «ونەرلىگە نۇر جاۋار» اتتى بولىمدەر بويىنشا سىنعا ءتۇسىپ، بىر-بىرىنەن كەم تۇسكەن جوق. الدىمەن بارلىق وتباسى بىر-بىرلەپ ورتاعا شىعىپ، «وتباسى ۇستانىمى» قانداي ەكەنىن ايتىپ ءوتتى. ماسەلەن، المالى اۋدانىنىڭ تۇرعىنى، تەمىرجاندار اۋلەتىنىڭ وتاناسى قالجان جولماعامبەتوۆا بالالارىنا ۇلتتىق قۇندىلىقتارىمىزدى ۇنەمى ايتىپ وتىرۋدان جالىقپايتىنىن جەتكىزدى. داستارحان باسىنا وتىرعاندا، تاماقتى الدىمەن ۇيدەگى ۇلكەن كىسى باستاماي، باسقالار قول سالمايتىنىن، تاماقتان سوڭ، ۇلكەندەردىڭ رۇقساتىنسىز ەشكىم ءوز بەتىنشە تۇرىپ جۇرە بەرمەيتىنىن دە اتاپ ءوتتى.
الاتاۋ اۋدانىندا تۇراتىن ومىربەكتىڭ وتباسى ورتاعا «باسپالداققا» بەكىتىلگەن سۋرەتتەر الىپ شىقتى. وندا ەرلى-زايىپتىنىڭ جانە بالالارىنىڭ ءار كەزەڭدەگى فوتولارى جەلىمدەلگەن. يدەياسى – شاعىن وتباسىنان بۇگىنگىدەي بيىككە جەتكەنىن كورسەتۋ. بالالارىنا «ويناپ ءجۇرىپ ۇيدەگى باسپالداقتان ءسۇرىنىپ كەتسەڭدەر دە، ومىردە سۇرىنبەڭدەر» دەگەن تىلەك ارنادى اتا-اناسى.
بايقاۋعا مەدەۋ اۋدانىنان قاتىسقان وتاعاسى ارمان نۇرجان كىشكەنتاي ۇلىنا ءوز قولدارىمەن قاعازدان جاساعان اپپاق شاڭىراقتى «بالام، وسى شاڭىراقتىڭ ەرتەڭگى يەسى – ءوزىڭسىڭ» دەپ ۇستاتقانى، سول شاڭىراققا 3 قىزىنىڭ ۋىق بولىپ شانشىلعانى، سوسىن ەرلى-زايىپتىنىڭ كەرەگەسىن بەكىتكەنى اسەرلى شىقتى. كورەرمەندەر وسى ساتتە دۋ قول سوقتى.
ال وزدەرىن «اكە – كۇن، انا – اي، ال بالالارىمىز جارقىراعان جۇلدىزدار» دەپ تانىستىرعان «اسانوۆتار وتباسى» (جەتىسۋ اۋدانى) «ارقان تارتۋ» ونەرىن كورسەتىپ، قوشەمەتكە بولەندى. كوپتىڭ الدىنا اتا-اناسىمەن شىعىپ ونەر كورسەتكەن ۇل-قىزدارى دا ەرەكشە ءماز.
بايقاۋعا قاتىسقان شاڭىراقتار «ونەرلى وتباسى» (اسانوۆتار)، «شەبەر وتباسى» (مۋسابايەۆتار)، «سالاۋاتتى وتباسى» («ارمان»)، «داستۇرگە بەرىك وتباسى» (ومىربەك اۋلەتى)، «مۋزىكالىق وتباسى» (تەمىرجاندار)، «زاماناۋي وتباسى» مەن «مەيىرىمدى وتباسى» (التايەۆتار)، «ىنتىماقتى وتباسى» (ابدراحمانوۆتار) نوميناسيالارىن جەڭىپ الىپ، باعالى سىيلىقتار يەلەندى.
بايقاۋدان تىس كەلگەن ونەرلى بالالار دا ءان سالدى، دوڭگەلەنە بي بيلەيدى. كىشكەنتاي بۇلدىرشىندەر ءوزىنىڭ بالعىن قيالىنداعى ويلارىن ءتۇرلى-تۇستى بورلارمەن اسفالتقا بەدەرلەدى. ءتاتتى سۋسىندار ءىشىپ، كامپيتكە تويدى. اسىر سالىپ وينادى، شاتتاندى. مىنە، وتباسى ءسانى – وسى بالدىرعاندار ەرتەڭ ادىلەتتى قازاقستاندى جاسايدى!