Nur Otan پارتياسىنىڭ كەزەكتەن تىس سەزىندە ءبىرقاتار وزگەرىستەر ورىن الدى. پارتيانىڭ ساياسي كەڭەس قۇرامى وزگەرتىلدى. باستىسى، پارتيانىڭ اتىن «امانات» دەپ اتاۋ تۋرالى ۇسىنىس ايتىلىپ، ول ءبىراۋىزدان قابىلداندى. ءماجىلىس سپيكەرى ەرلان قوشانوۆ جاساعان بۇل ۇسىنىستى پرەزيدەنت قاسىم-جومارت توقايەۆ قولدادى.
مەنىڭشە، بۇل اتاۋ ماعان دا ۇنادى. كوڭىلىمدە جاقسى اسەر قالدىردى، ءبىر شۋاقتى سەزىنگەندەي بولدىم. "امانات" ءسوزى قۇلاققا جاعىمدى، حالىققا جاقىن ۇعىم عوي. مەنىڭ وسى پىكىرىمدى مەملەكەت باسشىسىنىڭ سەزدە ايتقان: «بۇل - ەلىمىز ءۇشىن دە، ۇلتىمىز ءۇشىن دە ايرىقشا ءمانى بار كيەلى ۇعىم. ەگەمەندىگىمىز، ەلدىگىمىز بەن بىرلىگىمىز، كەڭ-بايتاق جەرىمىز - بىزگە بابالاردان جەتكەن امانات. وسى قاستەرلى قۇندىلىقتارىمىزدى كوزدىڭ قاراشىعىنداي ساقتاپ، بولاشاققا ميراس ەتۋىمىز كەرەك. حالقىمىز ەشقاشان اماناتقا قيانات جاساماعان»، - دەگەن ءسوزى قۋاتتاپ تۇرعانداي.
جاسىراتىنى جوق، باسقارۋشى پارتيا جۇمىستى ۇيىمداستىرۋدا، ەلگە ءتيىمدى شارالاردى جۇرگىزۋدە ايتارلىقتاي قاتەلىكتەر جىبەرگەنى ەشكىمگە قۇپيا ەمەس. Nur Otan پارتياسى جاڭا ساياسي كۇشتەرگە تىركەلۋگە مۇمكىندىك بەرمەي كەلگەنى دە راس.
ەندى سايلانعان جاڭا ساياسي قۇرام وسى ولقىلىقتاردىڭ ورنىن تولتىرۋى ءتيىس. پارتياداعى قاعازباستىلىقتى، بيۋروكراتيانى بولدىرماۋى كەرەك. ءماجىلىس پەن ءماسليحاتتاعى پارتيا فراكسيالارىنىڭ حالىق يگىلىگىنە بەلسەندى ارەكەت جاساۋىنا كۇش سالعان ءجون.
ۇلى ابايدىڭ: «ءسوز تۇزەلدى، وقىرمان، سەن دە تۇزەل» دەگەن ۇراندى ءسوزى بار. وسى ءسوز جاڭا قازاقستان قۇرۋعا قام جاساپ جاتقان ءبىزدىڭ قوعامعا قاراتىلىپ ايتىلعانداي. ولاي بولسا، اتاۋى جاڭارعان پارتيا اتىنا لايىق بولسا، يگى.