قاراعاندىلىق وقۋشى ساباققا بارماۋ ءۇشىن بومبا تۋرالى جالعان حابارلاما تاراتقان، دەپ حابارلايدى aqshamnews.kz.
قاراعاندى وبلىسىندا قۇقىق قورعاۋ ورگاندارى ىبىراي التىنسارين اتىنداعى مەكتەپ-ليسەيدە جارىلعىش قۇرىلعىلار ورناتىلعانى تۋرالى ەكى رەت جالعان اقپارات بەرگەن كامەلەتكە تولماعان وقۋشىعا قاتىستى قىلمىستىق ءىس قوزعادى. بۇل وقيعالار 2 جانە 3 قىركۇيەكتە بولعان.
ءوزىن قالا مەكتەپتەرىنىڭ ءبىرىنىڭ وقۋشىسى رەتىندە تانىستىرعان بەلگىسىز ادام توتەنشە جاعدايلار دەپارتامەنتىنىڭ كەزەكشى بولىمىنە حابارلاسىپ، وقۋ ورنىنداعى "جارىلعىش زات" تۋرالى ايتقان. تەكسەرۋ بارىسىندا اقپارات راستالمادى. جەدەل-ىزدەستىرۋ ءىس-شارالارى ناتيجەسىندە قاراعاندى وبلىسى پوليسيا دەپارتامەنتىنىڭ ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى مەكتەپ-ليسەيدىڭ كامەلەتكە تولماعان وقۋشىسىنىڭ "جالعان تەرروريزمگە" قاتىسى بار ەكەنىن انىقتادى، - دەلىنگەن حابارلامادا.
ۇستالعان بالانىڭ ايتۋىنشا، ول ساباققا قاتىسقىسى كەلمەي، وسىنداي قادامعا بارعان. ونىڭ اتا-اناسى تاربيەلەۋ بويىنشا مىندەتتەمەلەرىن ورىنداماعانى ءۇشىن اكىمشىلىك جاۋاپكەرشىلىككە تارتىلدى. تەرگەۋ ارەكەتتەرى جالعاسىپ جاتىر.