ول ەڭ ءىرى مەدياكومپانيانىڭ باسشىسى بولدى.
Nur Otan پارتياسىنىڭ اتقارۋشى حاتشىسى اسحات ورالوۆتىڭ بۇيرىعىمەن Nur Media اقپاراتتىق حولدينگىنىڭ باس ديرەكتورى قىزمەتىنە رۋسلان الىشيەۆ تاعايىندالدى، دەپ حابارلادى Almaty-akshamy.kz.
رۋسلان الىشيەۆ – م.قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ جانە ا.مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ تۇلەگى.
ول سولتۇستىك قازاقستان وبلىسىنداعى جەرگىلىكتى اتقارۋشى ورگانداردا، پەتروپاۆل قالاسى ىشكى ساياسات ءبولىمىنىڭ مامانى قىزمەتىنەن باستاپ، باسقارما باسشىسى، وبلىس اكىمىنىڭ ورىنباسارىنا دەيىنگى ءتۇرلى لاۋازىمداردى اتقاردى.
اقپارات جانە كوممۋنيكاسيالار مينيسترلىگى اقپارات كوميتەتى ءتوراعاسىنىڭ ورىنباسارى بولدى.
ەكى جىلدان استام ۋاقىت Nur Otan پارتياسى ورتالىق اپپاراتىنىڭ ساياسي جۇمىس دەپارتامەنتىن باسقارعان.
2020 جىلدىڭ مامىر ايىنان باستاپ ق ر پرەزيدەنتى جانىنداعى «ورتالىق كوممۋنيكاسيالار قىزمەتى» رەسپۋبليكالىق مەملەكەتتىك مەكەمەسىنىڭ ديرەكتورى قىزمەتىن اتقاردى.
Nur Media حولدينگى قازاقستانداعى ەڭ ءىرى مەدياكومپانيالاردىڭ بىرىنە جاتادى. 2008 جىلدىڭ قاراشا ايىندا «نۇر وتان» پارتياسىنىڭ باستاماسىمەن قۇرىلعان. بۇگىنگى كۇنى حولدينگتىڭ كومپانيالار توبىنا «استانا» تەلەارناسى، «ايقىن»، «ليتەر»، «تۇركىستان»، «قازاقستان تەمىرجولشىسى» گازەتتەرى، NS راديوسى جانە ORDA FM كىرەدى.