«قازاقفيلم» كينوستۋدياسىنىڭ اۋماعىندا اتى اڭىزعا اينالعان كينورەجيسسەر، كسرو حالىق ءارتىسى شاكەن ايمانوۆتىڭ تۋعانىنا 108 جىل تولۋىنا وراي ەسكەرتكىشىنە گۇل شوقتارى قويىلدى، دەپ حابارلايدى Almaty-akshamy.kz
سونداي-اق جاقىندا عانا 99 جاسقا تولعان ق ر حالىق ءارتىسى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، قازاقستاننىڭ ەڭبەك ەرى يۋريي پومەرانسيەۆكە ارنالعان ەسكەرتكىش جۇلدىزدىڭ سالتاناتتى اشىلۋى ءوتتى.
اتالعان شاراعا دەنساۋلىعىنا بايلانىستى يۋريي پومەرانسيەۆتىڭ ءوزى قاتىسا المادى. سالتاناتتى شاراعا «قازاقفيلم» كينوستۋدياسى مەن م.لەرمونتوۆ اتىنداعى مەملەكەتتىك اكادەميالىق ورىس دراما تەاترى باسشىلىعى مەن ۇجىمى، ۇلتتىق كينونى قولداۋ مەملەكەتتىك ورتالىعىنىڭ وكىلدەرى، شاكەن ايمانوۆتىڭ تۋعان-تۋىستارى، بەلگىلى كينوگەرلەر مەن جۋرناليستەر قاتىستى.
«مىنە، 40 جىلعا جۋىق ءبىزدىڭ كينوستۋديامىز ۇلى رەجيسسەر شاكەن ايمانوۆتىڭ ەسىمىمەن اتالىپ كەلەدى. ول ءبىزدىڭ مادەنيەتىمىزدىڭ دامۋىنا ۇلكەن ۇلەس قوستى. شاكەن كەنجەتاي ۇلى زامانداستارىمەن بىرگە ۇلتتىق كينونىڭ بەرىك ىرگەتاسىن قالادى. سونداي-اق، بۇگىن قازاق كينوسىنىڭ جۇلدىزدار اللەياسىندا «ءبىزدىڭ سۇيىكتى دارىگەر» فيلمىندە باستى ءرولدى سومداعان ق ر حالىق ءارتىسى، قازاقستاننىڭ ەڭبەك ەرى يۋريي بوريسوۆيچ پومەرانسيەۆكە ارنالعان اتاۋلى جۇلدىز جاندى»، - دەدى «قازاقفيلم» كينوستۋدياسىنىڭ پرەزيدەنتى اقان ساتايەۆ.
اتالعان شاراعا م.لەرمونتوۆ اتىنداعى ۇلتتىق ورىس دراما تەاترىنىڭ ديرەكتورى يۋريي ياكۋشيەۆ قاتىسىپ، كينوستۋديا باسشىلىعىنا ءىلتيپات بىلدىرگەنى ءۇشىن العىس ايتىپ، كەلەسى جىلى يۋريي پومەرانسيەۆتىڭ ءجۇز جىلدىق مەرەيتويى تويلاناتىنىن اتاپ ءوتتى. ءىس-شارادان كەيىن قازاق كينوسىنىڭ مۋزەيىندە قوناقتارعا ارنالعان شاعىن ەكسكۋرسيا وتكىزىلدى.
ەكسكۋرسيا بارىسىندا «ءقازاقفيلمنىڭ» پرەزيدەنتى اقان ساتايەۆ جينالعاندارعا جاڭعىرتۋ باعدارلاماسى بويىنشا كينوستۋدياعا ساتىپ الىنعان جاڭا كينوتەحنيكانى تانىستىردى.