رۋمىنيادا "دەلتا" شتامى ءورشىپ تۇر

ءتىپتى ەلدىڭ اۋرۋحانالارىندا ورىن جوق

ءبىر تاۋلىكتە كوروناۆيرۋستى 19 مىڭعا جۋىق ادام جۇقتىرىپ، ىندەتتەن 300-دەن استام ادام قايتىس بولعان. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، رۋمىنيا ءقازىر ىندەتتەن قايتىس بولۋشىلاردىڭ سانى بويىنشا الەمدە العاشقى ورىندا، دەپ حابارلايدى Almaty-akshamy.kz

ەپيداحۋالدىڭ ناشارلاۋىنا حالىقتىڭ ەكپەگە سەنىمسىزدىك تانىتىپ، سالدىرتپاۋى سەبەپ دەيدى ماماندار.

كىسى ءولىمى كوبەيگەننەن كەيىن، سوڭعى ەكى كۇندە تۇرعىندار ۆاكسينا سالدىرتۋعا اعىلىپ جاتىر. ءبىر تاۋلىكتە ەكپەنى 150 مىڭنان استام ادام العان. ءقازىر ەل اۋرۋحانالارىندا ورىن جوق. ناۋقاستار ۆەنگريا، پولشانىڭ ەمدەۋ مەكەمەلەرىنە جاتقىزىلۋدا. ەۋرووداق ەلدەرى رۋمىنياعا دارى-دارمەك، تىنىس-الۋ اپپاراتتارىن جىبەرىپ، قولداۋ كورسەتىپ جاتىر.

«پاندەميانىڭ بۇل تولقىنىنان قاتتى زارداپ شەگىپ جاتىرمىز. اۋرۋحاناعا ءتۇسىپ، قايتىس بولىپ جاتقانداردىڭ دەنى - ەكپە الماعاندار. سوندىقتان حالىققا ايتارىمىز - جالعان اقپاراتقا سەنبەي، ەكپە سالدىرۋعا اسىعىڭىزدار. بۇل داعدارىستان شىعۋدىڭ جالعىز جولى - ۆاكسينا»، - دەيدى ەكپە ورتالىعىنىڭ دارىگەرى يونا لۋمينيسا.