قالامىزداعى ع.مۇسرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ب.ريموۆا اتىنداعى تالدىقورعان دراما تەاترىنىڭ گاسترولدىك كۇندەرى باستالدى.
گاسترولدىك ساپار شىمىلدىعى كەيىنگى كەزدە جۋرناليستيكامەن قاتار ادەبيەت، كينو، تەاتر سالاسىندا جەمىستى ەڭبەك ەتىپ جۇرگەن تالانتتى قالامگەر قانات تىلەۋحاننىڭ رەجيسسەر فارحات مولداعالي ساحنالاعان «مەدال» قويىلىمىمەن اشىلدى. كۇندەلىكتى ومىردە ءوزىمىز كۋا بولىپ جۇرگەن، ءتىپتى قالىپتى جايتقا اينالعان اتاققۇمارلىق، ماقتانسۇيگىشتىك، داڭعويلىق سياقتى جاپپاي بەلەڭ العان كەسەلدى بارىنشا شىنايى سۋرەتتەگەن شىعارما كورەرمەنگە ساۋندراما جانرىندا ۇسىنىلدى.
«سپەكتاكلدە بۇگىنگى ءومىر شىندىعى بولۋى كەرەك. كورەرمەن ءوزىن كورۋ ءۇشىن دە تەاترعا بارۋعا ءتيىس. «مەدال» ساۋندراماسى – ءبىزدىڭ قوعام. كوپ ەلءدىڭ باسىنان وسىنداي وقيعا ءوتتى. تەك دەكوراسياسى، كوستيۋمى، رەكۆيزيتى بولەك. فارحاد مولداعالي مەنىڭ شىعارمامدى گروتەسكە اينالدىرعان. كۇلكى، مازاق، ۇسقىنسىزدىق! ءقازىر «كۇندىك تىرلىكپەن جۇرگەندەردىڭ» زامانى. كىلەڭ مانساپ قۋعان پىسىقايلار! سۋسىلداعان جايداقتار، پارىقسىزدار، قۇلىق ساۋعان پىسىقايلار. مەدالعا دەگەن ماحاببات سونشالىقتى جيىركەنىشتى! ءتىپتى سول مەدال، اتاق، ماراپاتپەن ادامدى قورلاپ تاستاۋعا دا بولادى. اۆتور مەن رەجيسسەر ويىن تەرەڭدەتكەنى، ماتەريالعا ءوز كوزقاراسى مەن ازاماتتىق ۇستانىمىن قوسقانى ءۇشىن تەاتر اكتەرلارىنا مىڭ العىس! بۇل – فارحادتىڭ قوعامداعى فارسقا ينتەللەكتۋالدى قارسىلىعى دەپ بىلەمىن»، – دەيدى قانات تىلەۋحان.
ءان، بي، كۇي، جىر، دراما ساباقتاسا ورىلگەن قويىلىم مازمۇنىمەن عانا ەمەس، اكتەرلىك شەبەر ويىن، رەجيسسەرلىك تىڭ شەشىمىمەن دە ءتانتى ەتتى.
سپەكتاكلدىڭ سوڭىن الا ساحناعا كوتەرىلگەن حالىق ءارتىسى ءاسانالى ءاشىموۆ ساپارلاپ كەلگەن تەاتر ۇجىمىنا اق تىلەگىن ارنادى.
– تەاتر – شىندىقتىڭ ءتورى. بۇل جەردە جالعان ءسوز، جاساندى سەزىم بولمايدى. تەك شىنايىلىق، ادالدىق پەن تازالىق ۇستەمدىك قۇرادى. ساحناعا شىندىقتى شىعارۋ – ۇلكەن جاۋاپكەرشىلىك. وسى باعىتتا ادال ەڭبەك ەتىپ جۇرگەن ونەر ۇجىمدارىنا العىسىمىز زور، – دەگەن ساحنا ساڭلاعى: «ءبىز ءجيى تالدىقورعانعا بارىپ تۇرامىز. ونداعى تەاتر وتە جاقسى دامىپ كەلەدى. اسىرەسە كورەرمەننىڭ بەلسەندىلىگى مەن ىقىلاسى ەرەكشە. جەتىسۋ وبلىسىنىڭ باس تەاترى رەتىندە بۇل مەكەمە ءوڭىردىڭ مادەني تىرەگىنە اينالىپ وتىر. ساحنا جولى – قۇرمەت پەن شىندىق جولى. سول جولدا بيىكتەن كورىنە بەرىڭىزدەر! ونەرلەرىڭنىڭ شۋاعى حالىققا جەتىپ، ەل يگىلىگى ءۇشىن قىزمەت ەتسىن! – دەپ، ۇجىمعا تىلەكتەستىگىن ءبىلدىردى.
جەتىسۋ وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ: «بۇگىنگى ءسات – ءبىز ءۇشىن ەرەكشە قۋانىش، جۇرەككە جىلى، رۋحتى كوتەرەر مەرەكە. الماتى – سۇلۋلىق پەن مادەنيەتتىڭ ورداسى. ءبىزدىڭ تەاتر ۇجىمى ءۇشىن الماتى تورىنە كەلىپ، وسى كيەلى ساحنادا ونەر كورسەتۋ – ۇلكەن مارتەبە. سىزدەردىڭ قولداۋلارىڭىز، ىستىق ىقىلاستارىڭىز بىزگە قۋات بەرەدى» دەي كەلە، ۇجىم ءوزىنىڭ گاسترولدىك ساپارىن الماتىدان باستاۋى تەگىن ەمەستىگىن ايتتى.
«الماتى – ونەردى ومىرلىك سەرىك ەتكەن بيكەن اپامىزدىڭ ءىزى قالعان، قاسيەت تۇنعان رۋحاني وردا. ول كىسى وسى قالادا ەڭبەك ەتە ءجۇرىپ، قانشاما ايشىقتى وبراز سومدادى، كورەرمەننىڭ جۇرەگىنەن ورىن الدى. ءبىز گاسترولدىك ساپارىمىزدى وسى كيەلى ساحنادان باستاۋ ارقىلى رۋحاني جالعاستىققا جول اشىپ وتىرمىز. حالىق ءارتىسى الماحان كەنجەبەكوۆا، تەاتر ارداگەرلەرى مەن جاس ورەندەر، ورتا بۋىن جانە تەاتر باسشىلىعى، تايلى-تاياعىمىز قالماي، ەل ءۇشىن، ونەر ءۇشىن قىزمەت ەتۋگە كەلدىك. تەاتر – ەل رۋحىنىڭ ايناسى. بۇگىن ءبىز سول اينادان ءوزىمىزدى كورىپ، ونەرىمىزبەن ءبولىسىپ، جۇرەكتەرىڭىزگە جىلىلىق سىيلاعىمىز كەلەدى»، – دەدى قۋانىش سۇلتان ۇلى.
قۇرىلعانىنا بيىل 50 جىل بولعان ونەر ۇجىمىنىڭ گاسترولدىك ساپارى بۇدان ءارى الماتى وبلىسىندا، سونداي-اق شىمكەنت قالاسىندا، ارى قاراي سىر وڭىرىندە جالعاسادى. گاسترول رەپەرتۋارىنا سايكەس، بۇگىن الماتى جۇرتشىلىعىنا دۋلات يسابەكوۆتىڭ «بوناپارتتىڭ ۇيلەنۋى» شىعارماسىنىڭ جەلىسى بويىنشا ساحنالانعان، بولات ۇزاقوۆتىڭ «قازاقى كومەدياسى» ۇسىنىلماق.