ماقساتىمىز – كىتاپقۇمارلار قاتارىن ارتتىرۋ

بۇگىندە مەملەكەت تاراپىنان كىتاپحالالارعا ۇلكەن قولداۋ كورسەتىلىپ  وتىر دەۋگە بولادى. ەلىمىزدە 11 مىڭعا  جۋىق كىتاپحانا بار دەسەك، وندا 300 ميلليوننان استام  كىتاپ قورى ساقتالعان ەكەن.  الماتىداعى  ۇلتتىق كىتاپحانىڭ وزىندە 7 ميلليوننان استام كىتاپ قورى بار.

جاقىندا ۇلتتىق كىتاپ كۇنىنە وراي الماتى قالاسى  مادەنيەت باسقارماسىنا قاراستى   «ورتالىقتاندىرىلعان كىتاپحانا  جۇيەسى» كمم-نىڭ   №31 كىتاپحان-بولىمشەسىندە  «قازاق ادەبيەتى – عاسىرلار قويناۋىنان جەتكەن  ادەبي مۇرا» تاقىرىبىندا  كەلۋشىلەرگە شەبەرلىك ساعاتى وتكىزىلىپ، «كىتاپ – تاريح، شەجىرە!» اتتى كىتاپ كورمەسى  ۇيىمداستىرىلدى.

ءبىزدىڭ كىتاپحانادا ايتۋلى كۇندەرگە، سونداي-اق بەلگىلى تۇلعالاردىڭ مەرەيتويلارىنا وراي، ولاردان  قالعان مۇرالاردى   دارىپتەۋ ماقساتىندا  كوپتەگەن شارالار ءوتىپ تۇرادى. بۇل  ورايدا  «مادەني مۇرا – رۋحاني قازىنا»، «قوعام ءۇشىن ەڭبەك ەتۋ – پارىز»،  «جىل كىتاپتارىن بىرگە وقيىق»  جانە «كىتاپتاعى قۇپيالاردى بىلگىم كەلەدى» تاقىرىپتارىنداعى  شارالار بۇعان دالەل. اسىرەسە №193 مەكتەپتىڭ   5-6 سىنىپتارىنىڭ وقۋشىلارى   كىتاپحاناعا كەلىپ،  وقىعان كىتاپتارىن ءوزارا تالقىلاپ، پىكىر-سايىستارعا قاتىسۋعا  داعدىلانعانىن ايتۋعا بولادى.

تاياۋدا عانا «ۇلى جەڭىسكە ماڭگىلىك تاعزىم» ەرلىك ساباعى وتكىزىلىپ، «ۇرپاققا ۇران بولعان ۇلى جەڭىس» تاقىرىپتارىندا  كورمە ۇيىمداستىرىلدى، ءاليا مولداعۇلوۆانىڭ تۋعانىنا 100 جىل تولۋىنا وراي،  «باتىر قىزى حالقىنىڭ» تاقىرىبىندا ەسكە الۋ ساعاتى  جوسپارلانىپ وتىر. بۇدان بولەك،  قازاقتىڭ باس اقىنى  اباي قۇنانباي ۇلىنىڭ  تۋعانىنا 180 جىل، قازاقتىڭ كورنەكتى اقىندارى  تۇمانباي مولداعاليۆ پەن قادىر مىرزا-ءالىنىڭ  90 جىلدىعى دا  ەسكەرۋسىز قالماي، اقىنداردىڭ كىتاپتارى مەن گازەت-جۋرنالدار بەتىندە  جاريالانعان ماقالالارىنان  كىتاپ كورمەسى ۇيىمداستىرىلعان.

ءقازىر كىتاپحانا قورىندا 6832  كىتاپ بار. ونىڭ ىشىندە قازاق تىلىندە – 1962، ورىس تىلىندە – 2939، اعىلشىن،  تۇرىك، قىرعىز، وزبەك  تىلدەرىندە – 44  كىتاپ  ساقتالعان. بيىل قورىمىز  قوسىمشا 821 كىتاپپەن تولىقتى.  تەك مەكتەپ وقۋشىلارى عانا ەمەس، ءتۇرلى سالا ماماندارى مەن  زەينەتكەرلەر دە كىتاپ الىپ وقيدى.  بۇگىندە وقىرمان سانى 13 مىڭنان اسىپ،  تۇراقتى  كەلەتىندەر  مىڭعا جۋىقتاعان. كىتاپحانادا كىتاپتاردان بولەك،  مەملەكەتتىك جانە رەسمي تىلدە  مەرزىمدى باسپاسوزدەرمەن دە قامتاماسىز ەتىلگەن.

كىتاپحانا ۇجىمى ۇلكەن-كىشى دەمەي، جالپى حالىقتى كىتاپ وقۋعا تارتا وتىرىپ، كىتاپقۇمارلار قاتارىن ارتتىرۋدى، بالالاردىڭ ساۋاتتىلىعى مەن ءبىلىمىن جەتىلدىرۋدى ءارى تىلگە دەگەن قۇرمەت پەن  وتانسۇيگىشتىككە تاربيەلەۋدى كوزدەيدى.