الماتىعا گاسترولدىك ساپارمەن ات باسىن بۇرعان «قازاقكونسەرت» ۇيىمىنا قاراستى «Astana Musical» مەملەكەتتىك تەاترى روزا باعلانوۆانىڭ 100 جىلدىعىنا وراي «روزا باعلانوۆا» ميۋزيكلىن ۇسىندى.
ميۋزيكل قالىڭ كورەرمەنگە حالىقتىڭ سۇيىكتى ءانشىسىنىڭ ىشكى جان-دۇنيەسى مەن ونىڭ قايتالانباس ونەر الەمىن پاش ەتتى.
«روزا باعلانوۆا» ميۋزيكلىنىڭ رەجيسسەرى ءارى تەاتردىڭ كوركەمدىك جەتەكشىسى ەسلام نۇرتازين مالىمدەگەندەي، جاڭا تۋىندى ءانشىنىڭ بالالىق شاعىنان باستاپ، سوعىس جىلدارىنداعى تاعدىرى تۋرالى سىر شەرتەدى. «ميۋزيكلدە روزا باعلانوۆانىڭ ءان الەمىنە كەلۋى، سوعىس جىلدارىنداعى قايسارلىعى، ونەر جولىنداعى قيىندىقتارى مەن تاعدىرىنداعى سىن ساعاتتار كورىنىس تاپقان. وقيعا جەلىسى ءانشىنىڭ 1930–1945 جىلدار ارالىعىنداعى ءومىرىن سۋرەتتەيدى. ساحنادا روزا باعلانوۆا ورىنداعان اتاقتى تۋىندىلار، ارنايى جازىلعان اۆتورلىق تۋىندىلار شىرقالدى»، – دەيدى رەجيسسەر.
جالپى، قويىلىم بارىسىندا ساحنادا 60-تان استام ءارتىس ونەر كورسەتتى. ءارقايسىسى سول جىلدارداعى حالىقتىڭ، ەڭبەك ادامدارىنىڭ، جاۋىنگەرلەردىڭ بەينەسىن شەبەر سومدادى. اندەرىن دە شىرقاپ سالىپ، حالىقتىڭ اسەم انمەن كوڭىلدەرىن تەربەدى. باستى ءرولدى سومداعان ءارتىستىڭ ءبىرى – زارينا جاكەنوۆا روزا باعلانوۆانىڭ وبرازىن سومداۋ ءۇشىن بارىنشا ىزدەنگەنىن جەتكىزدى.
«روزا ءتاجىباي قىزى – ۇلتتىڭ ءۇنى اتانعان اتاقتى ءانشى. ونىڭ وبرازىن سومداۋ – بۇل ۇلكەن جاۋاپكەرشىلىك. ول كىسىنىڭ تۇلعالىق قاسيەتتەرىن، سوعىس جىلدارىنداعى قايسارلىعىن، ءان ايتۋداعى وزىندىك قايتالانباس ەرەكشەلىكتەرىن قالىڭ كوپشىلىك وتە جاقسى بىلەدى. بۇگىنگى قويىلىمدا ءانشىنىڭ ءومىربايانىنداعى وسى تۇستارىن ءبىز جاڭا قىرىنان اشۋعا تىرىستىق»، – دەيدى اكتريسا.
جاڭا ميۋزيكل كورەرمەندەرگە ۇمىتىلماس اسەر سىيلاپ، ولاردىڭ زور ىقىلاسىنا بولەندى. قويىلىمدى تاماشالاۋعا كەلگەن بەلگىلى تەاتر قايراتكەرلەرى، ونەرتانۋشىلار مەن زيالى قاۋىم وكىلدەرى جاڭا تۋىندىنى جوعارى باعالادى.
«كوپتەن بەرى وسى قويىلىمدى كورۋدى ارمانداپ جۇرگەن ەدىم. قۇربىلارىمنان سپەكتاكل جايلى جاعىمدى پىكىر ەستىدىم. كەلدىم، كوردىم، قۋانىپ قايتتىم. جاستارىمىز سونداي تالانتتى. ءار ءاندى ءوز جۇرەگىمەن ورىنداپ، بىزگە ۇسىنىپ جاتىر. اراسىندا ءوزىم دە قوسىلىپ شىرقاپ كەتەمىن. قالامىزدا وسىنداي مادەني شارالار كوپتەپ وتكىزىلىپ جاتقانى كوڭىل قۋانتادى»، – دەيدى كورەرمەن جادىرا اسىلبەك قىزى.
ەسكە سالساق، مەملەكەت باسشىسى ۇلى ءانشىنىڭ ەسىمىن حالىق جادىندا ماڭگى ساقتاۋ شارالارىن قابىلداۋدى تاپسىرىپ، بىلتىر سوعان سايكەس «قازاقكونسەرت» مەملەكەتتىك كونسەرتتىك ۇيىمىنا» روزا باعلانوۆانىڭ ەسىمى بەرىلگەن ەدى. بيىل ءانشىنىڭ مەرەيتويى يۋنەسكو كولەمىندە اتالىپ وتىلۋدە.
