ءۇندىستاننىڭ نيۋ-دەليىندە گىر سپورتىنان ءوتىپ جاتقان الەم چەمپيوناتىنىڭ سوڭعى ەكى كۇنىندە قازاقستاندىق اسكەري قىزمەتشىلەر ۇلتتىق قۇرامانىڭ قورجىنىن تاعى 6 التىن جانە 1 قولا جۇلدەمەن تولىقتىردى.
اۋە قورعانىسى كۇشتەرىنىڭ ەكى اسكەري قىزمەتشىسى جەڭىس تۇعىرىنىڭ ءبىرىنشى ساتىسىنان كورىندى. مايور ءادىلحان نۇرعازين 85 كەلىدەن جوعارى سالماقتا جۇلقا، سەرپە جانە كوماندالىق ەستافەتادا 3 "التىن"، سونداي-اق ۇزاق سيكل بويىنشا گىر كوتەرۋدە قولا مەدال جەڭىپ الدى، دەپ حابارلايدى Almaty-akshamy.kz
مەرزىمدى قىزمەتتەگى سارباز قاتارداعى جاۋىنگەر ەربول دايىرباي 95 كەلىدەن جوعارى سالماقتا گىر تاسىن جۇلقي جانە سەرپە كوتەرۋدەن ەكى التىن مەدال ەنشىلەدى.
95 كەلىدەن جوعارى سالماق دارەجەسىندە تاعى ءبىر جوعارى ماراپات "شىعىس" وڭىرلىك قولباسشىلىعىنىڭ اسكەري قىزمەتشىسى 3-سىنىپتى سەرجانت سۇڭقار قۋانىشقا بۇيىردى.
بۇعان دەيىن الەم بىرىنشىلىگىنىڭ العاشقى ءتورت جارىس كۇنىندە قورعانىس مينيسترلىگى ورتالىق سپورت كلۋبىنىڭ وكىلدەرى ۇزدىكتەر ساپىنان كورىنىپ، 6 التىن، 2 كۇمىس جانە 1 قولا مەدال العانى ايتىلعان بولاتىن.