الماتىدا ءا. قاستەيەۆ اتىنداعى ق ر مەملەكەتتىك ونەر مۋزەيىندە قازاقستاننىڭ ەڭبەك سىڭىرگەن قايراتكەرى باقىتجان ابىشيەۆتىڭ تۋعانىنا 75 جىل تولۋىنا وراي «كەزدەسۋ. ابىشيەۆ الەمى» اتتى كورمە ۇيىمداستىرىلدى.
ەكسپوزيسياعا اۆتوردىڭ 40-قا جۋىق ءمۇسىن تۋىندىلارى مەن مونۋمەنتالدى ەسكەرتكىشتەردىڭ فوتوسۋرەتتەرى قويىلدى.
ءمۇسىنشى باقىتجان ابىشيەۆتىڭ شىعارماشىلىعى 1970-شى جىلدارى قازاقستان بەينەلەۋ ونەرىنە وزىندىك ۇلتتىق مانەرىمەن ەندى. ونىڭ شىعارماشىلىعىنىڭ قۇندىلىعى، تۋىندىلارىنىڭ سيۋجەتتىك مازمۇنىنىڭ اۋقىمدىلىعىمەن، پلاستيكالىق شەشىمدەردى تابۋداعى شەبەرلىگى مەن كەڭىستىكتە ءمۇسىن جاساۋداعى ەركىندىگىمەن ەرەكشەلەنەدى.
«كورمەنى ارالاپ ءجۇرىپ مۇسىندەرمەن سىرالسقانداي بولدىم. ول كىسىنىڭ جاساعان ەڭبەكتەرى ۇرپاق جادىندا ماڭگىلىك ساقتالادى. شىعارماشىلىنا ۇڭىلە قاراساڭىز اۋىل ءومىرىن، سۇيكىمدى سايگۇلىكتى تاماشالادىق. سونداي-اق، ات جەتەكتەن قازاق جاستارىنىڭ ماڭگىلىك بەينەسى ەسكەرتكىشتە قالعانىنا قۋانىشتىمىن»،–دەيدى كورەرمەن جازيرا ەسكەربەك.
بىلدەك جانرى شەبەرى باقىتجان ابىشيەۆتىڭ جۇمىستارى قازاقستان مەن شەتەل مۋزەيلەرىنە قويىلعان. لوزانناداعى وليمپيادا كوميتەتىنىڭ شتاب-پاتەرىندە «وليمپيەس»، گەرمانياداعى جەكە كوللەكسيادا «كۇيشى»، ماسكەۋدە «توميريس» سياقتى تۋىندىلارى بار.
ءمۇسىنشى اتىراۋدا ماحامبەتتىڭ 200 جىلدىق مەرەيتويىنا ارناپ قازاق حالقىنىڭ كەمەڭگەر ۇلدارى ماحامبەت وتەمىسوۆ پەن يساتاي تايمانوۆتىڭ ات ۇستىندەگى ەرەكشە مونۋمەنتىن جاساعان.
اۆتور تۋىندىلارىندا ءتۇرلى كومپوزيسيالىق جانە ءجيۆوپيستى پلاستيكا ادىستەرىن قولدانادى. ونىڭ «انا پورترەتى»، «ۋران»، «قۇلاگەر»، «ۇماي»، «توميريس»، «بەتاشار»، «بۇركىتشى»، «باتىر» سياقتى ەڭبەكتەرى كەڭىنەن تانىمال.
