ءىس-شاراعا كورنەكتى مادەنيەت جانە ونەر قايراتكەرلەرى، جۋرناليستەر، اقپارات سالاسىنىڭ قىزمەتكەرلەرى قاتىستى. ق ر مادەنيەت جانە اقپارات ءمينيسترى ايدا بالايەۆا ءسوز سويلەپ، قاتىسۋشىلاردى مەرەكەمەن قۇتتىقتادى، دەپ حابارلايدى aqshamnews.kz.
«سىزدەردىڭ قاجىرلى ەڭبەكتەرىڭىزدى ەسكەرىپ، پرەزيدەنتىمىز بۇگىن مەملەكەتتىك ناگرادالار تۋرالى جارلىق شىعاردى. بۇل بارلىعىمىز ءۇشىن ۇلكەن ءسۇيىنشى حابار. سەبەبى، ءار ادام ءۇشىن ءوز ەڭبەگىنىڭ باعالانۋى – ۇلكەن باقىت. بۇل ءبىزدىڭ سالاعا بەرىلگەن جوعارى باعا ءارى مارتەبە دەپ بىلەمىز»، – دەدى ايدا بالايەۆا.
مينيستر ق ر پرەزيدەنتىنىڭ اتىنان ەلدىڭ دامۋىنا ەلەۋلى ۇلەس قوسقان ءبىرقاتار مادەنيەت جانە ونەر سالاسىنىڭ قايراتكەرلەرىنە ماراپاتتار تابىستادى. اتاپ ايتساق، مەملەكەت باسشىسىنىڭ جارلىعىمەن بەلگىلى ەسترادالىق ءانشى مايرا ءىلياسوۆاعا جانە «استانا وپەرا» مەملەكەتتىك وپەرا جانە بالەت تەاترى باس ديريجەرىنىڭ ورىنباسارى ابزال مۇحيتدينگە «قازاقستاننىڭ حالىق ءارتىسى» اتاعى بەرىلدى.
مەملەكەت باسشىسىنىڭ جارلىعىمەن ءبىرقاتار ازاماتتارعا «پاراسات»، ءىى دارەجەلى «دوستىق»، «قۇرمەت» وردەندەرى، «ەرەن ەڭبەگى ءۇشىن» جانە «شاپاعات» مەدالدارى تابىستالدى.
سونىمەن قاتار، ەلۋدەن استام ۆەدومستۆولىق ناگرادالار، قۇرمەت گراموتالارى مەن العىس حاتتار تاپسىرىلدى.