شىعىننىڭ جالپى سوماسى شامامەن 30 ملرد تەڭگەنى قۇرادى.
قازاقستان پرەمەر-مينيسترىنىڭ ءبىرىنشى ورىنباسارى رومان سكليار قاڭتار وقيعاسى كەزىندە نۇقسان كەلگەن نىساندار قاشان قالپىنا كەلتىرىلەتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇكىمەت جەرگىلىكتى اتقارۋشى ورگاندارمەن جانە ۇيىمدارمەن بىرلەسە وتىرىپ، تارتىپسىزدىك كەزىندە زارداپ شەككەن مەملەكەتتىك ورگانداردىڭ نىساندارىن قالپىنا كەلتىرۋ جانە كاسىپكەرلىك سۋبەكتىلەرىنە كەلتىرىلگەن زالالدى وتەۋ بويىنشا جۇمىس جۇرگىزۋدە. قاڭتار وقيعاسى كەزىندە ەلىمىزدىڭ 8 وبلىسىندا مەملەكەتتىك ورگانداردىڭ 42 عيماراتى زارداپ شەكتى. بۇل - الماتى، شىمكەنت، جامبىل، قىزىلوردا، اتىراۋ، اقتوبە جانە شىعىس قازاقستان وبلىستارىنىڭ قالالارى. كەلتىرىلگەن شىعىننىڭ جالپى سوماسى شامامەن 30 ملرد تەڭگەنى قۇرادى. ونىڭ ىشىندە 28 ملرد تەڭگە رەسپۋبليكالىق بيۋدجەتتەن 18 نىساندى قالپىنا كەلتىرۋگە جۇمسالدى»، - دەدى ۇكىمەت باسشىسىنىڭ ءبىرىنشى ورىنباسارى.
سونداي-اق، ول بۇكىل نىساندارعا تەحنيكالىق بايقاۋ جۇرگىزىلگەنىن اتاپ ءوتتى.
«ناتيجەسىندە 28 اعىمداعى جوندەۋ، سونداي-اق 14 عيماراتقا كۇردەلى جوندەۋ جانە قايتا جاراقتاۋ قاجەت ەكەنى انىقتالدى.بۇگىنگى تاڭدا 21 نىساندا اعىمداعى جوندەۋ جۇمىستارى اياقتالدى. ناۋرىز ايىنىڭ سوڭىنا دەيىن 5 عيماراتقا، قالعان 2 نىسانعا مامىر جانە ماۋسىم ايلارىندا جوندەۋ جۇمىستارى جۇرگىزىلەدى. كۇردەلى جوندەۋ جانە قايتا جاراقتاۋدى قاجەت ەتەتىن 14 مەملەكەتتىك نىسان بويىنشا جۇمىستار جۇرگىزىلۋدە. كەستەگە سايكەس، 7 عيمارات بويىنشا جۇمىستار ناۋرىز ايىندا، 5 نىسان بويىنشا اعىمداعى جىلدىڭ ماۋسىم ايىندا اياقتالادى»، - دەدى رومان سكليار.