ق ر پرەمەر-مينيسترىنىڭ ءبىرىنشى ورىنباسارى رومان سكليار China Power International Holding Limited كومپانياسىنىڭ ءتوراعاسى ۆان زيچاومەن ونلاين كەزدەسۋ وتكىزدى، دەپ حابارلايدى قازاقپارات ق ر ۇكىمەتىنىڭ باسپا ءسوز قىزمەتىنە سىلتەمە جاساپ.
ق ر پرەزيدەنتى قاسىم-جومارت توقايەۆتىڭ قحر-عا مامىر ايىنداعى ساپارى بارىسىندا China Power International Holding Limited كومپانياسى مەن ق ر ەنەرگەتيكا مينيسترلىگى، «سامۇرىق-قازىنا» اق، SANY Renewable Energy اراسىندا جامبىل وبلىسىندا قۋاتى 1 گۆت جەل ەلەكتر ستانساسىن سالۋ تۋرالى كەلىسىمگە قول قويىلعان بولاتىن.
اڭگىمەلەسۋ بارىسىندا تاراپتار ينۆەستيسيالىق جوبانى جۇزەگە اسىرۋ بارىسىن تالقىلاپ، ەنەرگەتيكا سالاسىنداعى پەرسپەكتيۆالى جوبالار تۋرالى پىكىر الماستى.
China Power International Holding Limited كومپانياسىنىڭ وكىلدەرىنە ىقىلاس تانىتا وتىرىپ رومان سكليار قازاقستان ەلىمىزگە تىكەلەي تارتىلعان شەتەلدىك ينۆەستيسيالاردى ارتتىرۋعا ۇلكەن كوڭىل بولەتىنىن، ىنتىماقتاستىقتى ودان ءارى تەرەڭدەتۋگە مۇددەلى ەكەنىن ءبىلدىردى.
ءوز كەزەگىندە كومپانيا ءتوراعاسى ۆان زيچاو ەكى ەل اراسىنداعى ەنەرگەتيكا سالاسى بويىنشا ءوزارا ءىس-قيمىلدىڭ ماڭىزدىلىعىن اتاپ ءوتتى، سونداي-اق قازاقستاندىق تاراپقا جوبانى جۇزەگە اسىرۋعا دايىن ەكەنىن جەتكىزدى.
