بەرليندە ساداق اتۋدان الەم چەمپيوناتىنىڭ جالاۋى كوتەرىلدى.
بايراقتى باسەكەگە قازاقستان ۇلتتىق قۇراماسى قاتىسىپ جاتىر. گەرمانيا استاناسىنا دۇنيەجۇزىنىڭ 80 ەلىنەن 600-گە جۋىق سپورتشى جينالعان، دەپ حابارلايدى Almaty-akshamy.kz 24.kz-كە سىلتەمە جاساپ.
ەلىمىزدىڭ نامىسىن 12 مەرگەنىمىز قورعايدى. ولار جارىستىڭ 2 ءتۇرى بويىنشا سايىسقا تۇسپەك. ساداق اتۋدان الەم چەمپيوناتى 2 جىلدا ءبىر رەت وتەدى. بيىل حالىقارالىق سايىس گەرمانيادا ۇيىمدىستىرىلىپ وتىر. بەرلينگە ءار ەلدىڭ ەڭ ۇزدىك سپورتشىلارى جينالعان. ولاردىڭ اراسىندا الماتىلىق ۆيكتوريا ليان بار. جەرلەسىمىز سپورتتىڭ بۇل تۇرىمەن 11 جىلدان بەرى اينالىسىپ كەلەدى. ۇلتتىق قۇراما شەڭبەرىندە ءىرى حالىقارالىق جارىستارعا تالاي مارتە قاتىسقان. گەرمانيادا دا جەڭىس تۇعىرىنا كورىنۋدى ماقسات ەتەدى.
ۆيكتوريا ليان، ساداق اتۋدان قازاقستان قۇراماسىنىڭ مۇشەسى: - العاشقى ىرىكتەۋدە 360 ۇپايدىڭ 350ء-ىن جينادىم. ءبىراق ەكىنشى كەزەڭدە اۋا رايى بۇزىلىپ، جاقسى ونەر كورسەتۋىمە ءبىرشاما كەدەرگى بولدى. جەڭىسكە دەگەن قۇلشىنىس زور. ارينە ۇنەمى جەڭىپ وتىرعىڭ كەلەدى.
ۆيكتوريا ليانمەن بىرگە حالىقارالىق سايىسقا 12 سپورتشىمىز قاتىسىپ جاتىر. ولاردىڭ اراسىندا تاجيربەسى مول شەبەرلەرمەن قاتار جاس تالانتتار دا بار.
ءاقبارالى قارابايەۆ، ساداق اتۋدان قازاقستان قۇراماسىنىڭ مۇشەسى: - مەن ءبىزدىڭ كوماندامىزدىڭ ىشىندەگى ەڭ ۇلكەنىمىن. سپورتتىڭ بۇل تۇرىمەن 2005ء-شى جىلدان بەرى شۇعىلدانامىن. بيىل 18 جىل بولادى. وتە كۇردەلى سپورت. تەحنيكالىق، پسيحولوگيالىق جانە فيزيكالىق تۇرعىدان وزىندىك ەرەكشەلىكتەرى كوپ. جارىسقا تالدىقورعاندا كۇن ىستىقتا دايىندالعان ەدىك مىندا اۋا رايى وزگەشە بولىپ تۇر.
بەرليندە جارىسقا قاتىسۋشىلار قولايسىز اۋا رايىنا تاپ بولدى. كۇن بۇزىلىپ، جاۋىن جاۋىپ، جەل سوعۋدا. جارىستا باسەكەلەستىك وتە جوعارى. جالپى ساداق اتۋدان الەمدە وڭتۇستىك كورەيا، اقش، يتاليا، نيدەرلاند مەرگەندەرى ەڭ مىقتى سانالادى. ءبىراق جەڭىپ شىعۋعا مۇمكىندىك مول دەيدى قۇرامامىزدىڭ باس باپكەرى.
باۋىرجان جولدىبايەۆ، قازاقستان قۇراماسىنىڭ جاتتىقتىرۋشىسى: - جالپى دايىندىق جاقسى بولدى، ءبىراق اۋا رايىنا قاتىستى كىشكەنە بالالار دۇرىس ءوزىن جاقسى ناتيجەلەر كورتەسەتە المادى. ەندى كەلەسى كۇنگە جاقسىلاپ دايىندالىپ، كوماندالىق ەسەپتە جاقسى وتكىزەمىز دەپ ويلايمىز. بۇل ساداق اتۋدا كوپنەسە كورەيلىكتەر، ەۋروپا ەلدەرى جاقسى اتادى. ەندى ءبىزدىڭ كوماندا ءالى جاس بولعاندىقتان جايمەن جايمەن جىلسايىن، جارىس سايىن جاقسى ناتيجەلەرگە جەتىپ جاتىر. ەندى جاقسى ۇمىتتەمىز.
بەرليندەگى حالىقارالىق سايىس وسى اپتانىڭ سوڭىنا دەيىن جالعاسادى. ۇزدىكتەردىڭ ۇزدىگى پاريجدەگى وليمپيادا ويىندارىنا جولداما الادى.