«استانا بالەت» تەاترى الماتىلىقتارعا ءمان-ماعىناسى تەرەڭ، ايشىقتى باعدارلاما ۇسىنباق، دەپ حابارلايدى aqshamnews.kz
استانالىق تەاتر الماتىلىقتارعا روك-بالەتتەگى تانگو مانەرىندەگى «جىل ماۋسىمى» دەيتىن ۇلكەن باعدارلاما ۇسىنعالى وتىر. وندا كلاسسيكا دا، ۇلتىق حورەوگرافيا دا، قازىرگى بالەت پەن سيمفونيالىق مۋزىكا دا بار. الماتىنىڭ وڭىرلىك كوممۋنيكاسيالار ورتالىعىندا وتكەن كونفەرەنسيادا وسى كونسەرتتىڭ جاي-جاپسارى ايتىلدى.
«الماتىعا گاسترولدىڭ ساپارمەن كەلەتىن «استانا بالەت» تەاترىنىڭ قويىلىمى مامىر ايىنىڭ 10-18 ارالىعىندا «Almaty Theatre ساحناسىندا وتەدى. بۇل قالاداعى ۇلكەن مادەني جاڭالىق بولعالى تۇر. باعدارلامادا – پرەمەرالار، ايگىلى قويىلىمدار، الەمگە تانىمال ونەر جۇلدىزى ەرجان قۇلىبايەۆتىڭ ءوزى قاتىساتىن سيمفونيالىق مۋزىكا كەشى مەن قازاق مادەنيەتى تۋرالى ەلدى ەلەڭ ەتكىزەر سپەكتاكل دا قويىلماق.
«الماتى – ءبىزدىڭ جولىمىز تۇسەتىن ەڭ ءبىرىنشى قالا. ءبىز سۇيىكتى قالامىزعا جىل سايىن كەلىپ تۇرامىز. ودان كەيىن تارازدا، اقتوبەدە، تالدىقورعان، پاۆلودار مەن تۇركىستاندا بولدىق. شەتەلگە دە شىعىپ تۇرامىز. سوڭعى جىلدارى جەنيەۆادا، تبيليسيدە، افينا مەن انتاليادا دا ونەر كورسەتە باستادىق. سونىمەن بىرگە، ءبىزدىڭ توپ كىشىگىرىم قۇراممەن پاريجدە، دەلي مەن مۋمبايدا دا ونەر كورسەتىپ قايتتى»، - دەپ قوستى، ۆالەريي كۋزەمبايەۆ.
گاسترولدىك ساپار مامىر ايىنىڭ 10-11 كۇنى ونەردى مودەرنمەن، تەاتر دراماتيزمىمەن ۇشتاستىرعان كيريل رادەيەۆتىڭ حورەوگرافياسىنداعى «Blind Forgiveness» دەيتىن قويىلىمىمەن اشىلادى. ارسەنيي سميرنوۆتىڭ مۋزىكاسىنىڭ دەمەۋىمەن، وندا جان-دۇنيەڭدەگى ارپالىسپەن كۇرەسۋ، كەشىرە ءبىلۋ سياقتى عيبارتتى اڭگىمە ايتىلماق.
«ءبىزدىڭ تەاتردىڭ ەرەكشە شىعارماشىلىق ستاتۋسى بار. ءبىز ءوزىمىزدى ەشقانداي اكادەميالىق رامكامەن شەكتەپ تاستاعان جوقپىز. رەپەرتۋارىمىزدا ءارتۇرلى شىعارما بار. ءبىز قازىرگى زامانعى بولسىن، مودەرن، ۇلتتىق ناقىشتاعى قويىلىم بولسىن، ءبارىن الا بەرەمىز. سوڭعى جىلدارى قازىرگى حورەوگرافيانىڭ شەديەۆرى سانالاتىن تالاي دۇنيەنى ساحنالاپ ۇلگەردىك. كەشە، ارعى كۇندەرى وتكەن قازىرگى روك-بالەت «Blind Forgiveness»ء-تى الماتىعا اكەلگەنىمىز دە سودان. الماتىلىقتار وتە جاقسى قابىلدادى ونى»، - دەدى، ۆالەريي كۋزەمبايەۆ.
مامىردىڭ 13 كۇنى كورەرمەندەر – قازىرگى زاماننىڭ ەڭ ايگىلى سكريپكا شەبەرلەرىنىڭ ءبىرى ەرجان قۇلىبايەۆتىڭ سيمفونيالىق وركەسترىمەن قاۋىشادى. «جىل ماۋسىمىنداعى» انتونيو ۆيالديدىڭ كلاسسيكاسى مەن ارگەنتينالىق ماەسترو استور پياسسوللانىڭ سيكلىن ورىندايدى وندا. ەرجان قۇلىبايەۆ زامانداستارىنا اتى ءماشھۇر سوليست، Washington Award پرەمياسىنىڭ لاۋرەاتى، حالىقارالىق بايقاۋلاردىڭ جەڭىمپازى، الەمنىڭ ەڭ ۇزدىك ساحنالارىندا ونەر كورسەتىپ، ەلىمىزدىڭ اتىن شىعارىپ جۇرگەن جەرلەسىمىز.
«الماتىعا گاسترولدىك ساپارمەن بارۋ – ۇلكەن جاۋاپتىلىقتى تالاپ ەتەدى. الماتىلىق كورەرمەننىڭ تالعامى قانداي ەكەنىن بىلەمىز. سوندىقتان وسىندا كەلەردە، ءبىز باعدارلامانى قىزىقتى ەتىپ دايارلاۋعا تىرىسامىز. ەرجان قۇلىبايەۆ قاتىساتىن سيمفونيالىق وركەستردىڭ باعدارلاماسىنا كەلسەك، ەرجان بۇكىل الەم بىلەتىن دارىندى سكريپكا شەبەرى. ول وتە قىزىقتى باعدارلاما الىپ كەلدى وسى جولى. وندا پياسسوللانىڭ دا، ۆيۆالديدىڭ دا مۋزىكاسى بار. كورەرمەن جالىقپاس دەپ ويلايمىن»، - دەدى، «استانا بالەت» تەاترىنىڭ كوركەمدىك جەتەكشىسى نۇرلان قانەتوۆ.
مامىر ايىنىڭ 15-16 ارالىعىندا، تەاتر يۋريا گريگوروۆيچتىڭ حورەوگرافياسىنداعى «ماحاببات تۋرالى اڭىز» دەيتىن اتىشۋلى قويىلىمىن ۇسىنباق. شارپىسقان سەزىم مەن تەرەڭ ويدان تۇراتىن بۇل سپەكتاكل بالەت ونەرىن جاڭا ساتىعا كوتەرگەن. نازىم حيكمەتتىڭ ءپالساپالىق پەساسىن نەگىزگى العان سپەكتاكلدىڭ مۋزىكاسىن اريف مەليكوۆ جازىپ، ۆيزۋالدىق ەستەتيكا جاعىن سيمون ۆيرسالادزە وڭدەپ شىعىپتى.
حورەوگورافيا ونەرىمەن قازاق مادەنيەتىن ناسيحاتتاپ جۇرگەن قازاقستاننىڭ ونەر قايراتكەرى ايگۇل ءتاتيدىڭ «ۇلى دالانىڭ مۇراسى» دەگەن قويىلىمى مامىردىڭ 18 كۇنى وسى گاسترولدىك ساپاردىڭ سوڭعى نۇكتەسىن قويادى. ەتنوگرافيالىق وبرازدار، قازاقتىڭ بىرەگەي مادەنيەتى مەن بالەت ونەرىنىڭ ەرەكشە قولتاڭباسى ۇشتاسقان وسى سپەكتاكل «استانا بالەت» تەاترىنىڭ ەڭ ۇزدىك ءونىمى سانالادى.
قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن وتەتىن بۇل گاسترول ونەردى ءقادىر تۇتاتىندارعا، ۇلتىمىزدىڭ بالەت ونەرىن باعالايتىندارعا توسىن سىي بولماق.