مەملەكەت باسشىسى قاسىم-جومارت كەمەل ۇلى توقايەۆتىڭ بيىلعى قازاقستان حالقىنا جولداۋىن ءبىز اسىعا كۇتتىك، ۇلكەن قوبالجۋمەن تىڭدادىق. سەبەبى، وسى جولى پرەزيدەنت بۇرىنعى ءداستۇردى وزگەرتىپ، ەلدىڭ نەگىزگى باعىت-باعدارىن ايقىنداۋ، جاڭا قازاقستاندى قۇرۋ بويىنشا ناقتى قادامداردى اتادى.
جولداۋدا ايتىلعان ءتۇيىندى ماسەلەلەر قازاقستان ازاماتتارىنىڭ دا كوڭىلىنەن شىقتى دەپ ويلايمىن. اتاپ ايتاتىن بولسام، ەڭسەسى ءتۇسىپ، ابدەن توزىڭقىراپ قالعان وڭىرلەردىڭ قايتا جاندانۋىنا مۇمكىندىك بەرىپ، اباي، ۇلىتاۋ، جەتىسۋ وبلىستارى اشىلدى. بۇل سوڭى ەمەس بولار. ويتكەنى، بىزدە ءالى دە ونداي ايماقتار بار. سونىمەن قاتار، كونستيتۋسيالىق سوت، ۇلتتىق قۇرىلتاي، ەسەپ كوميتەتىنىڭ ورنىنا جوعارى اۋديتورلىق پالاتا قۇرۋ، ءماسليحات ءتوراعاسى لاۋازىمىن ەنگىزۋ، سايلاۋ زاڭنامالارىنىڭ ساقتالۋىن قاداعالاۋ ءۇشىن بايقاۋشىلاردىڭ قۇقىقتارى مەن جاۋاپكەرشىلىگىن ناقتى بەلگىلەۋ، ماجوريتارلىق سايلاۋ جۇيەسىن قولدانۋ، پرەزيدەنتتىڭ وكىلەتتىك كەزەڭىندە پارتياعا مۇشەلىگىن توقتاتۋ مىندەتىن زاڭنامالىق تۇردە رەسىمدەۋ، اكىمدەر مەن ولاردىڭ ورىنباسارلارىنا پارتيا فيليالدارىندا قىزمەت اتقارۋعا زاڭ جۇزىندە تىيىم سالۋ، بۇقارالىق اقپارات قۇرالدارىنىڭ باسەكەگە قابىلەتتى جانە ەركىن بولۋى جانە ت.ب. ءبىز ءۇشىن ۇلكەن قۋانىش. بارلىعى تەگىس قۇپتارلىق. تاعى ءبىر كوڭىل قۋانتاتىنى، الماتى وبلىسىنىڭ ورتالىعى قاپشاعايعا قونايەۆتىڭ ەسىمىن بەرۋ تۋرالى ايتىلدى. ەگەر تاڭداۋ حالىق جاقتا بولسا، ءقازىردىڭ وزىندە 80 پايىزى قولدايدى.
ءوزىنىڭ باسشىلىق مىسىمەن، پرەزيدەنتتىك وكىلەتتىلىگىمەن وسى جىلدىڭ ورتاسىنا دەيىن جوعارىدا اتالعانداردىڭ ورىندالۋىن تالاپ ەتۋى ءبىز ءۇشىن سەرت بەرگەنمەن بىردەي بولدى. ورىندالۋ مەرزىمى بەلگىلەنگەن جولداۋ ءبىر قۇداي بۇيىرتسا ەشقانداي كەدەرگىسىز ەلىمىزگە وڭتايلى وزگەرىستەر اكەلەدى. سونى كورۋگە جازسىن. جاساسىن، جاڭا قازاقستان! پرەزيدەنت جولداۋىنا العىس بىلدىرەمىز.