ساۋدا-ەكونوميكالىق ءوزارا ءىس-قيمىل، ەنەرگەتيكا، اۋىل شارۋاشىلىعى جانە «جاسىل» ەكونوميكا سالاسىنداعى سەرىكتەستىك.
قازاقستان مەن ەو وسى سالالارداعى ىنتىماقتاستىقتى ءارى قاراي جالعاستىرماق. سونداي-اق بريۋسسەلدە قاسىم-جومارت توقايەۆتىڭ باستاماسىمەن ەلىمىزدە جۇزەگە اسىرىلىپ جاتقان الەۋمەتتىك-ەكونوميكالىق جانە ساياسي رەفورمالارعا وڭ باعا بەرىلدى، دەپ حابارلايدى Almaty-akshamy.kz
بۇل جونىندە ەۋروكوميسسيا جانە ەۋروپالىق كەڭەس وكىلدەرىمەن وتكەن ەكى كۇندىك كەلىسسوزدەر ناتيجەسىندە بەلگىلى بولدى. تاراپتار ەو-نىڭ كورشى رەسەيگە سالعان سانكسيالارىنىڭ رەسپۋبليكاعا ىقتيمال اسەرى تۋرالى ءسوز ەتتى. بريۋسسەل قازاقستاننىڭ الاڭداۋشىلىعىن تولىق تۇسىنەتىنىن ايتىپ، بۇل ماسەلەدە بارىنشا قولداۋ كورسەتۋگە دايىن ەكەنىن مالىمدەدى.
«قازاقستان ەو-نىڭ كوپتەگەن ەلىنە مۇنايدىڭ ۇلكەن كولەمىن جەتكىزىپ وتىر. اسىرەسە ءبىزدىڭ كوپۆەكتورلى مۇناي قۇبىرى ستراتەگياسى ساياساتىنىڭ كونتەكستىندە قازاقستاننىڭ ترانزيتتىك-كولىكتىك الەۋەتىن دامىتۋ ماسەلەسىن تالقىلاۋ ءبىز ءۇشىن وتە ماڭىزدى ەكەنىن اتاپ وتكىم كەلەدى. قازاقستان تەڭىزگە شىعا المايتىن ءىرى مەملەكەت بولعاندىقتان، ترانزيتتىك كورشىلەرىنە تاۋەلدى. ءبىز وزگە مەملەكەتكە تاۋەلدىلىكتى ازايتىپ، حالىقارالىق نارىققا بارىنشا كوبىرەك قول جەتكىزگىمىز كەلەدى. ماسەلەن، «ورتا ءدالىز» دەپ اتالاتىن ترانسكاسپيي باعىتى تۋرالى ايتۋعا بولادى. وزدەرىڭىز بىلەتىندەي، ەلىمىز يران، جۇڭگو باعىتىن پايدالانادى. سونداي-اق بۇرىنعىداي سولتۇستىك باعىتتى دا پايدالانا الادى دەپ سەنەمىز»، - دەيدى قازاقستان رەسپۋبليكاسى پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحانوۆ.