بۇل قىزمەتكە ول پرەزيدەنت قاۋلىسىمەن تاعايىندالدى.
رينات كەرتايەۆ AMANAT پارتياسىنىڭ حاتشىسى بولىپ تاعايىندالدى، دەپ حابارلايدى Almaty-akshamy.kz.
«پارتيا ءتوراعاسى قاسىم-جومارت كەمەل ۇلى توقايەۆتىڭ قاۋلىسىمەن AMANAT پارتياسىنىڭ حاتشىسى بولىپ رينات دۋمان ۇلى كەرتايەۆ تاعايىندالدى»،- دەلىنگەن اتالعان پارتيانىڭ Twitter-دەگى پاراقشاسىندا.
بۇعان دەيىن «حابار» اگەنتتىگى» اق باسقارما ءتوراعاسىنىڭ مىندەتىن اتقارۋشى بولىپ قىزمەت ەتكەن رينات دۋمان ۇلى 1983 جىلى 23 ساۋىردە جامبىل وبلىسى قورداي اۋدانى قاراكەمەر اۋىلىندا دۇنيەگە كەلدى.
ءال-فارابي اتىنداعى قازاق ۇلتتىق ۋنيۆەرسيتەتىندە «قوعاممەن بايلانىس» ماماندىعى بويىنشا ءبىرىنشى جوعارى ءبىلىمىن الدى.
كەيىن سول جەردە «جۋرناليستيكا» ماماندىعى بويىنشا ماگيستراتۋرانى ءتامامدادى. ءار جىلى د.ا. قونايەۆ اتىنداعى ۋنيۆەرسيتەتتە قۇقىقتانۋ جانە ەكونوميكا سالاسىندا ءوز كاسىبي بىلىكتىلىگىن كەڭەيتتى.
رينات دۋمان ۇلىنىڭ ەڭبەك جولى «حابار» اگەنتتىگى» اق-نىڭ دامۋىمەن تىكەلەي بايلانىستى.
2006 جىلى ءدال وسى جەردە ونىڭ كاسىبي جولى قازاق تىلىندەگى ويىن-ساۋىق باعدارلامالارى رەداكسياسىنىڭ باعدارلامالار ديرەكسياسى پروديۋسەرى پوزيسياسىنان باستالدى. ءۇش جىلدان كەيىن ۇقساس لاۋازىمعا باعدارلامالار ءوندىرىسى بولىمىنە اۋىستى. ءارى قاراي «حابار» تەلەارناسىنىڭ جاڭالىقتار بولىمىندە اقپاراتتىق باعدارلامالار ديرەكسياسىنىڭ رەداكتور-تالداۋشىسى قىزمەتىن اتقاردى.
2011 جىلدان 2012 جىلعا دەيىن باعدارلامالار ديرەكسياسىندا باس پروديۋسەر بولىپ جۇمىس ىستەدى، سودان كەيىن باعدارلامالار ءوندىرىسى بولىمىنە اۋىستى.
2016 جىلعا دەيىن تەلەارنا باعدارلامالارىن ءوندىرۋ ديرەكسياسىنىڭ باس پروديۋسەرى بولدى. 2016 جىلدىڭ شىلدە ايىندا «حابار» تەلەارناسىن باسقاردى. سول جىلى «حابار» اگەنتتىگى» اق باسقارما ءتوراعاسىنىڭ ورىنباسارى بولىپ تاعايىندالدى.
2018 جىلدىڭ تامىز ايىندا باسقارما ءتوراعاسىنىڭ ءبىرىنشى ورىنباسارى بولىپ تاعايىندالدى. 2019 جىلى رينات دۋمان ۇلى «قۇرمەت» وردەنىمەن ماراپاتتالدى.