تۋريستەرگە جالعان بيلەتتەر ساتقان الماتىلىق ايەل انىقتالدى
سوتتالماعان 36 جاستاعى ايەل قىلمىستىق ىس-ارەكەتپەن 2020 جىلدىڭ قاڭتار ايىنان باستاپ اينالىسا باستاعان، ونىڭ سوڭعى ارەكەتتەرىن جەدەل ۋاكىلدەر 2021 جىلدىڭ قازان ايىندا تىركەگەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
«تەرگەۋ بارىسىندا كۇدىكتى ءوزىن تۋريستىك كومپانيالاردىڭ ءبىرىنىڭ قىزمەتكەرى رەتىندە تانىستىرىپ، كليەنتتەردىڭ سەنگىشتىگىن پايدالانىپ، ولاردان ۇشاق بيلەتىنىڭ قۇنىن العان جانە ساتىپ العانىن راستايتىن جالعان بيلەت بەرگەنى انىقتالدى. الايدا ءىس جۇزىندە مامىلە جالعان بولىپ شىقتى جانە ەشكىم جولاۋشىعا ناقتى بيلەتتەردى ۇسىنبادى. كليەنت مۇنى جونەلتۋ كۇنى تىركەۋ ورنىندا ءوزى كورسەتكەن رەيستىڭ جولاۋشىلار تىزىمىندە جوق ەكەنىن بىلگەن كەزدە عانا ءتۇسىندى. جابىرلەنۋشىلەردەن بارلىعى 12 ارىز كەلىپ ءتۇستى»، – دەدى بوستاندىق اۋداندىق پب جانىنداعى پوليسيا ءبولىمىنىڭ باستىعى عالىمجان قاسىمبايەۆ.
اتالعان قىلمىستىق ىستەردىڭ بارلىعى ق ر قك-نىڭ 190-بابى 3-بولىگىنىڭ 4-تارماعى (الاياقتىق) بويىنشا تەرگەلىپ جاتقان ءبىر وندىرىسكە بىرىكتىرىلگەن. كۇدىكتىنىڭ جەكە باسى وسىعان ۇقساس قىلمىستارعا قاتىسىنىڭ بار-جوعى تەكسەرىلۋدە. پوليسيا ۇستالعان ايەلدىڭ قىلمىستىق ارەكەتتەرىنەن زارداپ شەككەن ادامداردىڭ مىنا نومىرلەرگە حابارلاسۋىن وتىنەدى: 298-52-82، 8-708-806-41-57، 8-707-426-54-88.